ខ្សែប្រយុទ្ធ Alexis Sanchez មិនបានជួយ Manchester United ឲ្យសមនឹងតម្លៃប្រាក់ឈ្នួលឡើយនារដូវកាលកន្លងទៅ ប៉ុន្តែរូបគេសង្ឃឹមថានឹងទទួលបានជោគជ័យជាមួយខ្សែភាពយន្តដំបូងរបស់ខ្លួន។
Sanchez ជាតួឯកមួយរូបក្នុងខ្សែភាពយន្តមួយមានចំណងជើងថា Mi Amigo Alexis ដែលបានចាក់បញ្ចាំងជាលើកដំបូងក្នុងប្រទេសស៊ីលីហើយ នៅថ្ងៃទី៣០ ខែឧសភា។
អ្នកនាង Rocio Jadue ដែលជាផលិតករ បានប្រាប់ BBC Sport ថាខ្សែភាពយន្តនេះគឺជាគំនិតផ្តួចផ្តើមរបស់ Sanchez និងចាប់ផ្តើមថតកាលពីឆ្នាំមុន។ មូលហេតុដែលនាំឲ្យមានការផលិតរឿងនេះឡើងគឺបន្ទាប់ពីមានក្មេងប្រុសម្នាក់បានជួប Idol របស់គេគឺ Sanchez ហើយសាច់រឿងនេះគឺនិយាយពីក្មេងប្រុសឈ្នោះ Tito អាយុ១២ឆ្នាំ នោះតែម្តង។
Mi Amigo Alexis ជាខ្សែភាពយន្តទីមួយរបស់អតីតខ្សែប្រយុទ្ធកាំភ្លើងធំ Arsenal និង Barcelona ក្រៅតែពីរូបគេបង្ហាញខ្លួនក្នុងការផ្សាយពាណិជ្ជកម្មជាវីដេអូកន្លងមក។
Sanchez វ័យ៣០ឆ្នាំ ដែលទទួលបានប្រាក់ឈ្នួលច្រើនជាងគេនៅ Man Utd បានធ្លាក់ទម្រង់លេងយ៉ាងខ្លាំងចាប់តាំងពីផ្លាស់ទៅ Old Trafford កាលពីខែមករាឆ្នាំ ២០១៨ ដោយរកបានតែ១គ្រាប់ប៉ុណ្តោះសម្រាប់ការបង្ហាញខ្លួន ៤៥ប្រកួតក្នុងក្របខណ្ឌ Premier League រដូវកាលកន្លងទៅនេះ។ សព្វថ្ងៃរូបគេកំពុងមានព័ត៌មានថាអាចនឹងត្រូវចាកចេញពីក្រុមបិសាចក្រហម នារដូវកាលថ្មីខាងមុខនេះផងដែរ៕