កីឡាជាតិ
ជាតិ
កុមារី៥រូបមកពីមូលនិធិកុមារកម្ពុជា ទៅបោះជំរំបាល់ទាត់កុមារី នៅសហរដ្ឋអាមេរិក
× កុមារី៥រូប និងគ្រូបង្វឹកមកពីមូលនិធីកុមារកម្ពុជា(CCF) ទទួលបានឱកាសទៅទស្សនកិច្ចកីឡាបាល់នៅសហរដ្ឋអាមេរិកចំនួន២សប្តាហ៍។ កុមារី និងគ្រូបង្វឹកកម្ពុជាទាំងនេះ នឹងចូលរួមបោះជំរំកីឡាបាល់ទាត់នៅរដ្ឋ New Jersey និង New York នាអំឡុងទស្សនកិច្ចកីឡានេះ។ ថ្នាក់ដឹកនាំស្ថានទូតអាមេរិករំពឹងថា កុមារីកម្ពុជាទាំងនេះនឹងទទួលបានបទពិសោធថ្មីៗពីសហរដ្ឋអាមេរិក ដើម្បីមកចែករំលែកដល់កុមារដទៃក្នុងមូលនិធិកុមារកម្ពុជា។
ក្រោយទទួលបានការវាយតម្លៃជាសិស្សលេចធ្លោ និងយកចិត្តទុកដាក់ក្នុងការរៀនសូត្រ ពីវគ្គបណ្តុះបណ្តាលស្តីពី«ការលើកម្ពស់សមត្ថភាពរបស់យុវជនតាមរយៈកីឡា» កុមារី៥រូប និងគ្រូបង្វឹក១រូបរបស់មូលនិធីកុមារកម្ពុជា ទទួលបានឱកាសទៅទស្សនកិច្ចកីឡារយៈពេល២សប្តាហ៍នៅសហរដ្ឋអាមេរិក។
វគ្គបណ្តុះបណ្តាលរយៈពេល៦ខែដែលរៀបចំដោយមូលនិធី ASA ខាងលើ មិនត្រឹមតែផ្តល់ការយល់ដឹងផ្នែកកីឡាបាល់ទាត់ដល់កុមារានិងកុមារីប៉ុណ្ណោះ តែជួយឲ្យពួកគេយល់ដឹងពីសារៈសំខាន់នៃវិន័យ ការគ្រប់គ្រង និងការធ្វើការងារជាក្រុមដើម។ លើសពីនេះវគ្គនេះបានចូលរួមចំណែកលើកកម្ពស់ស្ត្រី និងយុវជនក្នុងការកំណត់គោលដៅឈានទៅរកភាពជោគជ័យនៅថ្ងៃអនាគត។
អនុប្រធានស្តីទីនៃស្ថានទូតសហរដ្ឋអាមេរិកលោក Gary Anderson ជឿជាក់ថា កុមារីកម្ពុជាទាំងនេះនឹងយកចំណេះដឹងដែលទទួលបានពីវគ្គបណ្តុះបណ្តាលខាងលើ ទៅចែករំលែកដល់កុមារាកុមារីសហរដ្ឋអាមេរិក ក្នុងអំឡុងពេលបោះជំរំកីឡាបាល់ទាត់នៅរដ្ឋ New Jersey និង New York។ លោក ក៏រំពឹងផងដែរថា កុមារទាំងនេះនឹងទទួលបានចំណេះដឹង និងបទពិសោធថ្មីៗពីសហរដ្ឋអាមេរិក ដើម្បីអភិវឌ្ឍសមត្ថភាព ក៏ដូចជាចែករំលែកដល់កុមារដទៃក្នុងន័យជួយឲ្យសហគមន៍មូលនិធិ CCF មានការរីកចម្រើនកាន់តែប្រសើរ។
«តាមរយៈកីឡា សិស្សទាំងនេះបានរៀនពីភាពជាអ្នកដឹកនាំ ដំណោះស្រាយជម្លោះ ការពង្រឹងក្រុម និងលើកកម្ពស់សមត្ថភាពស្ត្រី និងយុវជន ដើម្បីកំណត់គោលដៅ និងឈានទៅសម្រេចបានតាមការស្រម៉ៃចង់បានរបស់គេ។ តម្លៃនៃកីឡា បានបង្រៀនយើងពីសារៈសំខាន់នៃវិន័យ ការងារក្រុម និងការផ្តោតអារម្មណ៍យកចិត្តទុកដាក់។ ពេលសិស្សរបស់យើងធ្វើដំណើរទៅកាន់សហរដ្ឋអាមេរិក ខ្ញុំសង្ឃឹមថា ពួកគេនឹងយកទៅអនុវត្តនៅសហរដ្ឋអាមេរិក នូវមេរៀនដែលគេបានរៀននៅកម្ពុជា»។ នេះជាការលើកឡើងរបស់លោក Gary Anderson៕
Tag:
បាល់ទាត់
មូលនិធិកុមារកម្ពុជា
CCF
សហរដ្ឋអាមេរិក
© រក្សាសិទ្ធិដោយ thmeythmey.com