អន្តរជាតិ
លោក ប្រាយុទ្ធ ណែនាំឲ្យពលរដ្ឋថៃអានសៀវភៅដែលសរសេររិះគន់របបផ្តាច់ការ ប្រភពរូប៖ កាសែត The Nation
× នាយករដ្ឋមន្ត្រីថៃ ប្រាយុទ្ធ ចន្ទអូចា កាលពីថ្ងៃទី៣០ ខែឧសភា បានណែនាំថា ប្រជាជនថៃ គួរអានសៀវភៅប្រលោមលោកមួយក្បាល ដែលចំណងជើងថា «កសិដ្ឋានសត្វចិញ្ចឹម (Animal Farm)»។ ប្រលោមលោកនេះ ជាស្នាដៃរបស់លោក George Orwell ដែលសរសេររិះគន់អតីតមេដឹកនាំផ្តាច់ការសហភាពសូវៀត លោក Joseph Stalin ។
បោះពុម្ពផ្សាយជាលើកដំបូងក្នុងឆ្នាំ១៩៤៥ «Animal Farm» ជាសៀវភៅប្រលោមលោក ដែលកវីជនជាតិអង់គ្លេស Orwell រិះគន់ឥតសំចៃមាត់លើរបបដឹកនាំផ្តាច់ការ ដែលសំដៅលើសហភាពសូវៀតក្រោយពេលការធ្វើបដិវត្តន៍។
ប្រលោមលោកនេះ និយាយអំពីសត្វចិញ្ចឹមជាច្រើនក្នុងកសិដ្ឋានមួយកន្លែង ដែលត្រូវបានម្ចាស់ធ្វើទុក្ខបុកម្នេញ និងប្រើឲ្យធ្វើការធ្ងន់ធ្ងរ។ សត្វចិញ្ចឹមទាំងនេះ រួមមាន សេះ មាន់ ឆ្កែ និងលា ជាដើម ត្រូវបានដឹកនាំដោយជ្រូក ក្នុងគោលដៅបោះបោរប្រឆាំងនឹងម្ចាស់កសិដ្ឋាន និងយកទីតាំងកសិដ្ឋាននោះមកកាន់កាប់ដោយខ្លួនឯង។ ក្រោយពីពួកជ្រូក ចូលកាន់កាប់កសិដ្ឋាននោះ និងដាក់កិច្ចការផ្សេងៗទៅកាន់សត្វចិញ្ចឹមទាំងអស់ធ្វើ។ ជាលទ្ធផល ក្រោមការដឹកនាំរបស់ជ្រូក វាពុំបានបង្ហាញពីភាពល្អប្រសើរជាងការដឹកនាំរបស់មនុស្សឡើយ។
យោងតាមការចុះផ្សាយរបស់កាសែតថៃ The Nation អ្នកប្រើប្រាស់បណ្តាញសង្គមហ្វេសបុកក្នុងប្រទេសថៃ ដែលប្រហែលអានប្រលោមលោកនេះ មុនលោកប្រយុទ្ធណែនាំ បានប្រៀបធៀបការធ្វើរដ្ឋប្រហារក្នុងឆ្នាំ២០១៤ ដែលដឹកនាំដោយឧត្តមសេនីយ៍ ប្រាយុទ្ធ ដូចទៅនឹងការធ្វើបដិវត្តន៍របស់សត្វជ្រូក ក្នុងសៀវភៅប្រលោមលោកនេះ។ ត្រង់ចំណុចនេះ ពួកគេនិយាយថា ការដឹកនាំរបស់របបសឹកថៃ ពុំមានភាពល្អប្រសើរ ហើយប្រហែលជាអាក្រក់ខ្លាំងជាងរបបដែលលោក ប្រាយុទ្ធ បានដឹកនាំផ្តួលរំលំកាលពីឆ្នាំ២០១៤ ទៅទៀតផង។
យ៉ាងណាមិញ អ្នកនាំពាក្យរដ្ឋាភិបាលថៃ លោក Werachon Sukondhapatipak បកស្រាយថា លោក ប្រាយុទ្ធ ពុំចង់ឲ្យប្រជាជនថៃភ្ជាប់ការណែនាំអានសៀវភៅប្រលោមលោកនេះ ទៅនឹងរឿងនយោបាយឡើយ។ ត្រង់នេះ លោក ថា៖«ប្រជាជន ពុំគួរបកស្រាយការណែនាំនេះជាការប្រមាថទៅនឹងភាពចេះដឹងរបស់ពួកគេឡើយ។ សៀវភៅ តែងតែផ្តល់ចំណេះដឹងជានិច្ច ហើយវាអាស្រ័យលើការបកស្រាយរបស់មនុស្សនីមួយៗ»។
ឆ្លៀតឱកាសដែលប្រជាជនថៃរិះគន់លើការណែនាំសៀវភៅរបស់លោកប្រាយុទ្ធ ប្រធានគណបក្សអនាគតឈានទៅមុខ លោក Thanathorn Juangroongruangkit បានប្រើប្រាស់សារនេះ ដើម្បីវាយប្រហារលើក្រុមប្រឹក្សាជាតិសម្រាប់សណ្តាប់ធ្នាប់ និងសន្តិភាពថៃ (NCPO) ដែលបានចូលក្តោបក្តាប់អំណាចតាមរយៈការធ្វើរដ្ឋប្រហារកាលពី៥ឆ្នាំមុន៕
Tag:
ថៃ
ប្រាយុទ្ធចន្ទអូចា
សៀវភៅ
Animal Farm
© រក្សាសិទ្ធិដោយ thmeythmey.com