ជាតិ
សង្គមជាតិ
កម្ពុជា នឹងចូលជាសមាជិកអង្គការបណ្ដាញអន្តរជាតិសម្រាប់ឫស្សីនិងផ្ដៅ
× ក្រសួងកសិកម្ម នឹងចូលជាសមាជិកអង្គការបណ្ដាញអន្តរជាតិសម្រាប់ឫស្សីនិងផ្ដៅ នៅឆ្នាំ២០១៩នេះ ដែលអាចឲ្យកម្ពុជាទទួលបានផលប្រយោជន៍ តាមការបណ្ដុះបណ្ដាល កែច្នៃ ផ្ដល់ប្រឹក្សាជំនាញ និងគ្រប់គ្រងប្រកបដោយនិរន្តភាព។ នេះបើតាមលោក ស្រី វុឌ្ឍី អ្នកនាំពាក្យក្រសួងកសិកម្ម ដែលប្រាប់សារព័ត៌មានថ្មីៗ នៅថ្ងៃទី២៩ឧសភានេះ។
លោក វេង សាខុន រដ្ឋមន្រី្តក្រសួងកសិកម្ម បានចូលរួមការពារសេចក្ដីព្រាងច្បាប់ស្ដីពីការបង្កើតអង្គការបណ្ដាញអន្តរជាតិសម្រាប់ឫស្សីនិងផ្ដៅ ជាមួយគណៈកម្មការជំនាញទី៣ និងគណៈកម្មការជំនាញទី៥ នៃរដ្ឋសភា នៅថ្ងៃទី២៧ឧសភានេះ។ កម្ពុជា នឹងទទួលបានផលប្រយោជន៍យ៉ាងច្រើន តាមរយៈការផ្ដល់ជំនួយគម្រោងបច្ចេកទេស អភិវឌ្ឍឫស្សីនិងផ្ដៅប្រកបដោយនិរន្តភាព សេដ្ឋកិច្ចបៃតង និងរួមចំណែកការប្រែប្រួលអាកាសធាតុ។
តាមការឲ្យដឹងពីរដ្ឋមន្រីក្រសួងកសិកម្មថា បច្ចុប្បន្ន មានសហគមន៍ព្រៃឈើចំនួន៦១៤សហគមន៍ លើផ្ទៃដីជាង៥០០ពាន់ហិកតា។ លោក ជឿជាក់ថា សហគមន៍ទាំងអស់នោះ នឹងអាចទទួលបានការគាំទ្រ និងផលប្រយោជន៍ជាច្រើនពីកិច្ចសហប្រតិបត្តិការយ៉ាងល្អផងដែរ។
ថ្ងៃទី២៩ ខែឧសភា នៅទីស្តីការក្រសួងកសិកម្ម លោក វេង សាខុន បានជួបលោកស្រី Jiang Zehui សហប្រធានក្រុមប្រឹក្សាភិបាលនៃអង្គការអន្តរជាតិឫស្សីនិងផ្តៅហៅកាត់ថាអ៊ីនបា (INBAR: International Network for Bamboo and Rattan) និងលោក Wang Wentian ឯកអគ្គរដ្ឋទូតចិនប្រចាំកម្ពុជា ដើម្បីពិភាក្សាអំពីកិច្ចសហប្រតិបត្តិការរវាងអង្គការ INBAR អំពីការចូលបណ្ដាញអន្តរជាតិសម្រាប់ឫស្សីនិងផ្ដៅនៅកម្ពុជា។ លោកស្រី Jiang Zehui បានលើកឡើងថា កម្ពុជា គឺជាប្រទេសដែលមានសក្តានុពល និងអំណោយផលទាំងធនធានដី និងអាកាសធាតុសម្រាប់ការដាំដុះឫស្សី។
អង្គការ INBAR នឹងមានលទ្ធភាពច្រើនក្នុងការជួយឧបត្ថម្ភ គាំទ្រដល់ការអភិវឌ្ឍវិស័យព្រៃឈើនៅកម្ពុជា។ ជាមួយគ្នាដែរ លោកស្រី Jiang Zehui ក៏បានលើកឡើងលើការអភិវឌ្ឍរុក្ខជាតិផ្កានៅកម្ពុជា ដែលប្រទេសចិនមានសក្តានុពលខ្ពស់ទាំងបច្ចេកទេសនៃការដាំដុះ និងទីផ្សារផងដែរ។
ទន្ទឹមនឹងនេះ រដ្ឋមន្ត្រីក្រសួងកសិកម្ម ក៏បានស្នើដល់ភាគីចិន ឲ្យជួយផ្តល់ការគាំទ្រដល់ការបង្កើតវិទ្យាស្ថានស្រាវជ្រាវ និងពិសោធន៍ពូជឫស្សី និងជាពិសេសពូជរុក្ខជាតិផ្កា រួមជាមួយការរៀបចំគម្រោងសួនច្បារគំរូមិត្តភាពកម្ពុជា-ចិន ដើម្បីអភិវឌ្ឍវិស័យព្រៃឈើ និងអាចបង្កើតជាតំបន់ទេសចរណ៍ធម្មជាតិ។
អង្គការបណ្ដាញអន្តរជាតិសម្រាប់ឫស្សីនិងផ្ដៅ ហៅកាត់ថាអ៊ីនបា បង្កើតឡើងឆ្នាំ១៩៩៧ ដោយសន្ធិសញ្ញាតម្កល់ទុកនៅអង្គការសហប្រជាជាតិ។ គោលនយោបាល និងផែនការយុទ្ធសាស្ត្រអង្គការនេះ គឺលើកកម្ពស់ជីវភាពប្រជាពលរដ្ឋ និងកែប្រែទម្លាប់ពលរដ្ឋពីការប្រើប្រាស់ឈើមកប្រើប្រាស់ឫស្សីនិងផ្ដៅ តាមរយៈការអភិវឌ្ឍការដាំដុះ តាមគោលការណ៍អភិវឌ្ឍន៍បៃតង៕
Tag:
ឫស្សីនិងផ្ដៅ
ក្រសួកសិកម្ម
INBAR
© រក្សាសិទ្ធិដោយ thmeythmey.com