រដ្ឋាភិបាល ដាក់ផែនការលុបបំបាត់ឲ្យអស់នូវអំពើហិង្សាលើកុមារ ត្រឹមឆ្នាំ២០២១

ជាតិ

សង្គមជាតិ

រដ្ឋាភិបាល ដាក់ផែនការលុបបំបាត់ឲ្យអស់នូវអំពើហិង្សាលើកុមារ ត្រឹមឆ្នាំ២០២១

01, Jun 2019 , 10:19 pm

រូបភាព

រូបភាពពីក្រសួងព័ត៌មាន

ដោយ: ឡាយ សុភាវតី

ក្រសួងសង្គមកិច្ច អតីតយុទ្ធជន និងយុវនីតិសម្បទា អះអាងថា ត្រឹមឆ្នាំ២០២១ នឹងលុបបំបាត់អំពើហិង្សាលើកុមារគ្រប់ទម្រង់ ដោយបានបង្កើតក្រុមការងារអន្តរស្ថាប័ន ដើម្បីធ្វើការងារនេះ។ នេះបើតាមការចេញផ្សាយរបស់ក្រសួងព័ត៌មាន។

ក្រសួងព័ត៌មាន បានស្រង់សម្តីរបស់លោក តូច ចាន់នី អគ្គនាយកនៃអគ្គនាយកដ្ឋានបច្ចេកទេសរបស់ក្រសួងសង្គមកិច្ច ទៅចុះផ្សាយថា «ក្រុមការងារអន្តរស្ថាប័នលុបបំបាត់អំពើហិង្សាលើកុមារ បានបង្កើតឡើងនៅពាក់កណ្ដាលឆ្នាំ២០១៩នេះ។ ក្រុមការងារនេះ នឹងធានាការដោះស្រាយ ចាត់វិធានការទប់ស្កាត់អំពើហិង្សាលើកុមារ តាមរយៈការសម្របសម្រួល កិច្ចសហប្រតិបតិ្តការ និងពហុវិស័យចំពោះកិច្ចការពារកុមារ។ លើសពីនេះ បង្កើតនិងធ្វើវិសិធនកម្មច្បាប់ ហើយការពារតាមដានវាយតម្លៃពីវឌ្ឍនភាពនៃអំពើហិង្សាលើកុមារ»។

ការថ្លែងរបស់លោក តូច ចាន់នី គឺធ្វើឡើងក្នុងសន្និសីទស្ដីពីកុមារនិងយុវជន ដែលផ្ដោតលើប្រធានបទបញ្ចប់អំពើហិង្សាលើកុមារនៅកម្ពុជា។ ក្នុងសន្និសីទនេះ មានការចូលរួមពីក្រសួងស្ថាប័នពាក់ព័ន្ធរបស់រាជរដ្ឋាភិបាល ទីភ្នាក់ងារអង្គការសហប្រជាជាតិ និងអង្គការសង្គមស៊ីវិលជាតិនិងអន្តរជាតិ ព្រមទាំងកុមារ និងយុវជន មកពីបណ្តាខេត្តចំនួន១៣ កាលពីថ្ងៃទី២៧ ខែឧសភា ឆ្នាំ២០១៩។

មន្ត្រីជាន់ខ្ពស់របស់ក្រសួងសង្គមកិច្ចខាងលើ បានឲ្យដឹងថា រាជរដ្ឋាភិបាល បានខិតខំលុបបំបាត់អំពើហិង្សាលើកុមារ តាមរយៈការចុះផ្សព្វផ្សាយអប់រំតាមវេទិកានានា ដើម្បីសម្រេចផែនការសកម្មភាពស្តីពីការទប់ស្កាត់និងឆ្លើយតបចំពោះអំពើហិង្សាលើកុមារ២០១៧-២០២១ របស់កម្ពុជានិងជាអង្គការសហប្រជាជាតិ។

ទន្ទឹមនឹងនេះ លោក សុន ពេញ នាយកប្រតិបត្តិអង្គការសម្ព័ន្ធកុមារកម្ពុជា បានលើកថា ការលុបបំបាត់អំពើហិង្សាលើកុមារនៅកម្ពុជា មានការលំបាក ដោយសារតែផ្នត់គំនិតប្រជាពលរដ្ឋគិតថា ជារឿងសាមញ្ញ និងមិនបានចូលរួមសហការក្នុងការទប់ស្កាត់អំពើហិង្សាក្នុងគ្រួសារ សហគមន៍ និងសង្គម។

សូមបញ្ជាក់ថា កម្ពុជា មានការអង្កេតថ្នាក់ជាតិស្តីពីអំពើហិង្សាលើកុមារ ក្រោមភាពជាដៃគូជាមួយមជ្ឈមណ្ឌលសម្រាប់ការត្រួតពិនិត្យ និងបង្ការជំងឺ របស់សហរដ្ឋអាមេរិក និងអង្គការយូនីសេហ្វ កាលពីឆ្នាំ២០១៣។ ការអង្កេតសិក្សាស្រាវជ្រាវនេះ បានកំណត់ពីទំហំ វិសាលភាព ការផ្តល់ភស្តុតាងជាក់លាក់នៃអំពើហិង្សាលើកុមារទាំងផ្លូវភេទ ផ្លូវកាយ និងផ្លូវចិត្ត ដែលកុមារបានជួបប្រទះ និងកំពុងប្រឈម ដើម្បីឈានទៅបញ្ចប់អំពើហិង្សាគ្រប់ទម្រង់លើកុមារឲ្យបានជោគជ័យនៅត្រឹមឆ្នាំ២០២១។

ការសិក្សាមុនគម្រោងឆ្នាំ២០១៨ របស់អង្គការទស្សនពិភពលោក បានរកឃើញថា ប្រហែល៤៩,៣ភាគរយ ឬស្មើជិតពាក់កណ្តាលនៃកុមារ មានអាយុ១២ ដល់ ១៨ ឆ្នាំ បានរងគ្រោះដោយអំពើហិង្សាលើរាងកាយ៕