អន្តរជាតិ
បច្ចេកវិទ្យា
តើយន្តហោះដឹកអ្នកដំណើរត្រូវប្រើប្រាស់សោបញ្ឆេះដូចរថយន្តឬទេ?
× មុននឹងឆ្លើយទៅនឹងសំណួរខាងលើ គេត្រូវយល់ពីប្រភេទយន្តហោះមួយចំនួនខ្លះៗជាមុនសិន។ យន្តហោះតូចៗ ប្រភេទជិះលេងកំសាន្តជិតៗ ដែលភាគច្រើនជារបស់ឯកជន ឬរបស់ពលរដ្ឋម្នាក់ៗតាមផ្ទះ ក្នុងនោះមានដូចជាម៉ាក Cessna (ប្រើប្រាស់ម៉ាស៊ីនពីស្តុង) ជាដើមពិតជាត្រូវការសោចាក់ទ្វារចេញចូល និងសម្រាប់ការចាប់ផ្តើមបញ្ឆេះម៉ាស៊ីន។
គេហទំព័រ Howstuffworks.com បានពន្យល់ពីមូលហេតុថា ពពួកយន្តហោះ Cessna ជាប្រភេទយន្តហោះតូចៗ អាចចតចោលនៅតាមទីតាំងធម្មតា មានដូចជាដីនៅខាងក្រោយផ្ទះជាដើម។ ហេតុនេះ វាមានភាពងាយស្រួលសម្រាប់ចោរនៅពេលដែលមានគេចង់លួច។ ប្រភេទយន្តហោះតូចៗនេះ ប្រៀបបានទៅនឹងរថយន្តធម្មតាដែរ។
ចុះពពួក Jetliners ធំៗដូចជា Boeing 787 ឬ Airbus A330 វិញ តើប្រភេទយន្តហោះទាំងនោះមានសោសម្រាប់បញ្ឆេះម៉ាស៊ីនដែរឬទេ? ចម្លើយគឺ វាគ្មានទេ។ សូម្បីតែទ្វារក៏គេមិនត្រូវការសោដើម្បីចាក់ដែរ។ វាគ្រាន់តែត្រូវការគន្លឹះមួយសម្រាប់ទាញបើក ឬបិទប៉ុណ្ណោះ។ នេះពេលដែលអ្នកបើកចង់ឲ្យម៉ាស៊ីនចាប់ផ្តើមដំណើរ គាត់គ្រាន់តែកាច់កុងតាក់បញ្ឆេះតែប៉ុណ្ណោះឯង។
មូលហេតុមកពីអ្វី? យន្តហោះធំៗដែលគេឃើញទាំងនោះ មិនមែនចតនៅតាមទីវាលធម្មតានោះទេ។ អាកាសយាន្តដ្ឋានគឺជាកន្លែងមួយដែលមានការយាមត្បាត និងការការពារ សណ្តាប់ធ្នាប់យ៉ាងតឹងរ៉ឹង។ ភ្នាក់ងារសន្តិសុខ និងប៉ូលីសមាននៅគ្រប់ទីកន្លែង ថែមទាំងកាមេរ៉ាសុវត្ថិភាពផងដែរ។
យន្តហោះធំៗទាំងនោះមិនមែនងាយស្រួលក្នុងការជិះចេញដោយមិនឲ្យ អ្នកណាម្នាក់ដឹងនោះឡើយ។ បើមានជនណាម្នាក់មានបំណងចង់លួចយន្តហោះមួយគ្រឿងពីអាកាសយន្តដ្ឋាន ជនម្នាក់នោះប្រហែលជារត់មិនរួចដែរ៕
© រក្សាសិទ្ធិដោយ thmeythmey.com