ជាតិ
សង្គមជាតិ
អភិបាលខេត្តសៀមរាបសុំទោសរឿងប្រើពាក្យជជុះនិងថាមិនបានចាត់ទុកអ្នកកាសែតជាសត្រូវឡើយ អភិបាលខេត្តសៀមរាប លោក ទៀ សីហា ថ្លែងក្នុងសិក្ខាសាលាស្ដីពី តួនាទីអ្នកសារព័ត៌មាន។ រូបភាព៖ ខេង ឧត្តម
× សៀមរាប៖ ជារឿងមួយដែលអភិបាលខេត្តសៀមរាបចង់បកស្រាយយូរមកហើយ ទៅនឹងអ្វីដែលលោកបានហៅអ្នកសារព័ត៌មានជជុះ និងត្រូវបានអ្នកសារព័ត៌មានមួយចំនួនយកទៅវាយប្រហារថាលោកមើលងាយពួកគេ។ ជាឳកាសមួយដ៏ល្អ ក្នុងសិក្ខាសាលាស្ដីពី តួនាទីអ្នកសារព័ត៌មានដែលរៀបចំឡើងដោយក្រសួងព័ត៌មាននៅរសៀលថ្ងៃទី១ មិថុនា លោក ទៀ សីហា បានបំភ្លឺចំពោះពាក្យសំដីរបស់លោក ដោយថា ពាក្យដែលលោកហៅជជុះនោះមិនសំដៅលើអ្នកសារព័ត៌មានទូទៅទេ តែសំដៅលើអ្នកសារព័ត៌មានដែលខ្វះវិជ្ជាជីវៈ រិះគន់មិនត្រូវរឿងតែប៉ុណ្ណោះ។ លោកអភិបាលខេត្តប្រាប់ថា លោកមិនបានចាត់ទុកអ្នកកាសែតជាសត្រូវឡើយ ផ្ទុយទៅវិញលោកបានចាត់ទុកអ្នកសារព័ត៌មានជាពលរដ្ឋមួយដែលលោកមានតួនាទីការពារទៅវិញ។
ការប្រើពាក្យជជុះ ធ្វើឱ្យអភិបាលខេត្តសៀមរាបរងនូវការប្រមាថទាំងកិត្ដិយសផ្ទាល់ខ្លួន គ្រួសារ និងស្ថាប័ននាពេលកន្លងមក។ ព្រោះមានអ្នកសារព័ត៌មានខ្លះដែលមិនពេញចិត្តចំពោះពាក្យនេះនិងបានលើកដាក់ខ្លួន វាយបកទៅអភិបាលខេត្តថាមើលងាយសមត្ថភាពនិងកិតិ្ដយសរបស់ខ្លួន។
អភិបាលខេត្តសៀមរាបបានប្រើពាក្យសោកស្ដាយនិងសុំទោសនៅចំពោះអ្នកសារព័ត៌មានជិត២០០នាក់ដែលមកពីតាមអង្គភាពជុំវិញខេត្ត និងបានបកស្រាយទៅនឹងអ្វីដែលលោកហៅ ជជុះនេះ។ លោក ទៀ សីហា ពន្យល់ថា លោកគ្មានបំណងប្រើពាក្យនេះទៅលើអ្នកសារព័ត៌មានទូទៅទេ គឺចំពោះតែអ្នកសារព័ត៌មានដែលគ្មានវិជ្ជាជីវៈត្រឹមត្រូវនិងផ្សព្វផ្សាយព័ត៌មានមិនពិតតែប៉ុណ្ណោះ។ យ៉ាងណាលោកអភិបាលខេត្តប្រាប់ថា គាំទ្រឱ្យមានព័ត៌មានរិះគន់នេះ ព្រោះថាក្នុងនាមលោកជាអភិបាលខេត្តមិនអាចអភិវឌ្ឍន៍ខេត្តសៀមរាបមួយឡើយគឺត្រូវមានការចូលរួមគ្រប់ស្ថាប័នពាក់ព័ន្ធ តែថាមន្ត្រីរបស់លោកបានប្រឹងប្រែងលើការងារទាំងនោះហើយ តែក៏មានមួយចំនួននៅមានភាពអសកម្មដែរ។ លោក ទៀ សីហា ចង់ឱ្យអ្នកសារព័ត៌មានសរសេរទាំងចំណុចអវិជ្ជមាននិងវិជ្ជមាន ហើយព័ត៌មានក្នុងន័យស្ថាបនាលោកព្រមទទួល តែបើរិះគន់ដើម្បីវាយប្រហារ លោកនៅតែសុំប្រើពាក្យអ្នកសារព័ត៌មានជជុះដដែល។
គួរបញ្ជាក់ថា ក្រសួងព័ត៌មានបានរៀបចំសិក្ខាសាលាមួយស្ដីពីតួនាទីអ្នកសារព័ត៌មាន ក្រោមវត្តមានរដ្ឋមន្ត្រី លោក ខៀវ កាញារីទ្ធ ដែលមានអ្នកសារព័ត៌មានព្រមទាំងមន្ត្រីអាជ្ញាធរពាក់ព័ន្ធប្រមាណ២០០នាក់ចូលរួមនៅសណ្ឋាគារ ខេមរាអង្គរ ក្នុងបំណងដើម្បីបញ្ជៀបការយល់ដឹងផ្នែកសារព័ត៌មាន ការចែករំលែកបទពិសោធន៍ និងបញ្ហាប្រឈមរបស់អ្នកសារព័ត៌មាន៕
© រក្សាសិទ្ធិដោយ thmeythmey.com