កីឡាអន្តរជាតិ
អន្តរជាតិ
សោកស្តាយ! Reyes អតីតកីឡាករ Arsenal ស្លាប់ដោយគ្រោះចរាចរណ៍ក្នុងអាយុ៣៥ឆ្នាំ
× ខ្សែបម្រើស្លាប Jose Antonio Reyes អតីតកីឡាករដែលជួយឲ្យ Arsenal លើកពាន Premier League ជាមួយនឹងកំណត់ត្រាមិនស្គាល់បរាជ័យនោះ បានទទួលមរណភាពក្នុងអាយុ៣៥ឆ្នាំដោយគ្រោះថ្នាក់ចរាចរណ៍មួយនៅក្នុងប្រទេសអេស្ប៉ាញ។ Sevilla ដែលជាអតីតក្លិបរបស់ Reyes ផងដែរនោះ បានប្រកាសពីដំណឹងដ៏សោកសៅនេះមុនគេ។
Reyes ធ្លាប់លេងឲ្យក្រុមជម្រើសជាតិអេស្ប៉ាញចន្លោះពីឆ្នាំ២០០៣ដល់ឆ្នាំ២០០៦។ ខ្សែបម្រើស្លាបរូបនេះ បានជោគជ័យយ៉ាងធំធេងចាប់ពីប្រឡូកក្នុងបាល់ទាត់អាជីពពីឆ្នាំ១៩៩៩មក ដោយធ្លាប់លើកពាន Europa League ៣លើកជាមួយ Sevilla និង២លើកជាមួយ Atletico Madrid។
នៅរដូវកាលឆ្នាំ២០០៣-២០០៤ Reyes ជាសមាជិកម្នាក់ដែលបានជួយឲ្យ Arsenal លើកពាន Premier League ដោយរក្សាកំណត់ត្រាមិនស្គាល់ចាញ់ (The Invincibles)។ ក្រៅពីពានដ៏ច្រើនទៀត Reyes ក៏ធ្លាប់លើកពាន La Liga ជាមួយ Real Madrid កាលពីរដូវកាល ២០០៦-២០០៧ និងពាន Taca da Liga ជាមួយ Benfica រដូវកាល២០០៨-២០០៩ ផងដែរ។
កាលពីរដូវកាលមុន Reyes លេងឲ្យក្លិប Xinjiang Tianshan Leopard របស់ចិន មុននឹងផ្ទេរទៅលេងនៅក្លិប Extremadura នៃក្របខណ្ឌ Segunda División របស់អេស្ប៉ាញ នាឆ្នាំ២០១៩ នេះ។
Reyes មានភរិយាឈ្មោះ Noelia Lopez ដែលបានរៀបការកាលពីឆ្នាំ២០១៧ ដោយមានកូន៣នាក់។
បណ្តាក្លិបដែល Reyes ធ្លាប់លេងឲ្យសុទ្ធតែសរសេរសាររំលែកទុក្ខទាក់ទងនឹងការស្លាប់អតីតកីឡាកររបស់ខ្លួន។ កីឡាករល្បីៗលើពិភពលោក ជាពិសេសអតីតមិត្តរួមក្រុមរបស់ Reyes ដូចជា Thierry Henry, Cesc Fabregas, Freddie Ljungberg, Sergio Aguero ជាដើម សុទ្ធតែសំដែងការសោកស្តាយ។
លោក Arsene Wenger ដែលបាននាំ Reyes ទៅកាន់ Arsenal និងលោក Unai Emery គ្រូ Arsenal បច្ចុប្បន្ន ដែលធ្លាប់បង្វឹកកីឡាកររូបនេះ នៅ Sevilla រួមទាំងប្រធានសហព័ន្ធកីឡាបាល់ទាត់អឺរ៉ុប បានចាត់ទុកមរណភាពរបស់ Reyes ជាការបាត់បង់ដ៏ធំធេងបំផុត៕
© រក្សាសិទ្ធិដោយ thmeythmey.com