ជាតិ
សង្គមជាតិ
អចលនទ្រព្យ
រដ្ឋបាលខេត្តសៀមរាបរកឃើញគម្រោងបុរីផ្ទះល្វែង៥ទីតាំងពុំមានច្បាប់អនុញ្ញាត
×
សៀមរាប៖ ក្រុមការងារចម្រុះរបស់រដ្ឋបាលខេត្តសៀមរាប បានរកឃើញគម្រោងសំណង់បុរីផ្ទះល្វែងចំនួន៥ទីតាំង ដែលស្ថិតនៅស្រុកបន្ទាយស្រីនិងស្រុកប្រាសាទបាគង ដែលពុំទាន់មានច្បាប់អនុញ្ញាតត្រឹមត្រូវ។ ទីតាំងទាំងនោះ ត្រូវបានគេមើលឃើញថាបានដំណើរការគម្រោងយូរមកហើយ ទើបតែថ្មីៗនេះមានការចុះពិនិត្យច្បាប់សាងសង់។
ក្រុមការងារចម្រុះដែលដឹកនាំដោយលោក ហែន ពុទ្ធី នាយករងរដ្ឋបាលសាលាខេត្តសៀមរាប បានត្រួតពិនិត្យនៅតាមការដ្ឋានសាងសង់គម្រោងបុរីនិងផ្ទះល្វែងនានាក្នុងស្រុកបន្ទាយស្រីនិងស្រុកប្រាសាទបាគង ដោយរកឃើញថាគម្រោងមួយចំនួនក្នុងតំបន់ទាំងពីរពុំទាន់មានច្បាប់ត្រឹមត្រូវនៅឡើយ។
ប្រតិបត្តិការដែលធ្វើនៅថ្ងៃទី២៧ដល់ថ្ងៃទី២៨ ខែឧសភា បានរកឃើញទីតាំងចំនួន៥ ក្នុងស្រុកបន្ទាយស្រី និងស្រុកប្រាសាទបាគង មិនទាន់មានច្បាប់ត្រឹមត្រូវ ដែលក្នុងនោះរួមមាន គម្រោងមហាមន្ទីរ គម្រោងបុរីអង្គរលែន ស្ថិតនៅស្រុកបន្ទាយស្រី, គម្រោងភូមិដ្ឋានសំណាង ក្នុងស្រុកប្រាសាទបាគង និង២ទីតាំងទៀតមិនមានឈ្មោះ និងមិនបានជួបម្ចាស់ដែលស្ថិតក្នុងភូមិសាស្ដ្រស្រុកបន្ទាយស្រី។
យោងតាមខ្លឹមសារព័ត៌មានដែលចុះផ្សាយក្នុងទំព័រហ្វេសប៊ុកផ្លូវការរបស់រដ្ឋបាលខេត្តសៀមរាប ការចុះពិនិត្យនោះដែរ ក្រុមការងារចម្រុះបានណែនាំឱ្យម្ចាស់គម្រោងទាំងអស់បញ្ឈប់សកម្មភាពទាំងឡាយ ដូចជាសកម្មភាពផ្សព្វផ្សាយពាណិជ្ជកម្មគ្រប់រូបភាព បញ្ឈប់ការសាងសង់សំណង់នានាក្នុងទីតាំងគម្រោង និងតម្រូវឱ្យម្ចាស់គម្រោងទាំងនោះ ត្រូវសុំច្បាប់ត្រឹមត្រូវមុននឹងដំណើរការធ្វើអាជីវកម្មរបស់ខ្លួន។ ក្រុមការងារក៏បានណែនាំដល់អាជ្ញាធរមូលដ្ឋាន ត្រូវពង្រឹងការគ្រប់គ្រងដើម្បីណែនាំដល់ម្ចាស់គម្រោងទាំងអស់គោរពតាមនីតិវិធីនានាឱ្យស្របតាមគោលការណ៍ដែលចង់បាន ជៀសវាងប៉ះពាល់ដល់ប្រយោជន៍ប្រជាពលរដ្ឋរងគ្រោះ៕
Tag:
បុរីផ្ទះល្វែង
សៀមរាប
© រក្សាសិទ្ធិដោយ thmeythmey.com