ជាតិ
វីដេអូ
សេដ្ឋកិច្ច
ក្រោយពុលថ្នាំពុលគីមី កសិករ ឈិត ឈៀង ងាកមកប្រើ «ថ្នាំពុលធម្មជាតិ» លើបន្លែ
លោក ឈិត ឈៀង កសិករដែលប្រើប្រាស់ថ្នាំពុលធម្មជាតិលើបន្លែ នៅខេត្តសៀមរាប
×![]()
ភ្នំពេញ៖ ក្នុងរយៈពេលជិត១០ឆ្នាំ មកនេះ លោក ឈិត ឈៀង បានប្រើប្រាស់ថ្នាំពុលកសិកម្មធម្មជាតិ និងជីកំប៉ុស លើការដាំដុះបន្លែ ក្នុងទំហំផ្ទៃដីជិតកន្លះហិកតា នៅខេត្តសៀមរាប។ បានជាកសិករវ័យ៥១ឆ្នាំនេះ សម្រេចចិត្តប្រើប្រាស់ថ្នាំពុលធម្មជាតិ សម្រាប់ការពារ និងកម្ចាត់សត្វល្អិតចង្រៃ ព្រោះលោកធ្លាប់ពុលថ្នាំពុលគីមី ដែលបាញ់សម្លាប់សត្វល្អិតចង្រៃនៅក្នុងចម្ការបន្លែ។ លោក ឈិត ឈៀង បាននិយាយថា សារធាតុនៃថ្នាំពុលគីមីទាំងនេះ បានជ្រាបចូលក្នុងខ្លួនតាមរន្ធញើស និងតាមផ្លូវដង្ហើម ក្នុងអំឡុងពេលថ្នាំពុលគីមី ធ្វើឲ្យងងឹតមុខភ្លាមៗ និងដួលសន្លប់ផងដែរ។
សូមអញ្ជើញទស្សនាវីដេអូរបៀបធ្វើថ្នាំពុលធម្មជាតិ របស់កសិករ ឈិត ឈៀង ដូចតទៅ៖
លោក ឈិត ឈៀង លើកឡើងថា មុននឹងលោកចេះធ្វើ និងប្រើប្រាស់ថ្នាំពុលធម្មជាតិ លោកបានដាំបន្លែគ្រប់ប្រភេទ គឺអាស្រ័យផលទៅលើថ្នាំពុលគីមីទាំងស្រុង អស់រយៈពេលជិត៣០ឆ្នាំ។ កសិករនៅខេត្តសៀមរាបរូបនេះ បានបន្តថា ក្នុងអំឡុងពេលដាំបន្លែប្រើប្រាស់ថ្នាំពុលគីមី លោកឧស្សាហ៍ពុលថ្នាំទាំងនេះណាស់ ព្រោះក្លិន និងសារធាតុនៃថ្នាំពុលគីមី បានធ្វើឲ្យលោកជាអ្នកបាញ់ថ្នាំផ្ទាល់ នៅក្នុងចម្ការមានអារម្មណ៍មិនល្អក្នុងខ្លួន ដូចជាឈឺក្បាល វិលមុខ និងរាករូស ជាដើម។
លោក ឈិត ឈៀង បាននិយាយដូច្នេះថា៖«ខ្ញុំធា្លប់ពុលខ្លាំងម្តង ភ្លាមៗនៅក្នុងចម្ការត្រប់ ដែលកំពុងថ្នាំបាញ់កម្ចាត់មេអំបៅដង្កូវរយ ដង្កូវចោះផ្លែ។ ពេលនោះខ្ញុំដឹងថា ខ្ញុំ ពុលថ្នាំគីមីពីការបាញ់កម្ចាត់ទាំងនេះ ដែលធ្វើឲ្យមានអារម្មណ៍ថាពិបាកក្នុងខ្លួន រកអ្វីមកពិពណ៌នាមិនបាន។ និយាយទៅមានអារម្មណ៍ថា ស្ទើរស្លាប់ ស្ទើររស់តែម្តង គឺពិបាកក្នុងខ្លួនខ្លាំងណាស់។ ក្នុងអំឡុងខ្ញុំពុលនេះ ខ្ញុំបានសម្រាកនៅមន្ទីរពេទ្យ និងចំណាយប្រាក់អស់ជាច្រើនលើថ្លៃព្យាបាលផងដែរ។ ហើយការពុលនេះធ្វើឲ្យខ្ញុំសម្រេចចិត្តឈប់ប្រើប្រាស់ថ្នាំពុលគីមីទាំងស្រុង និងចូលរៀនវគ្គបណ្តុះបណ្តាលនៃការផលិត និងប្រើប្រាស់ថ្នាំពុលធម្មជាតិវិញនៅក្នុងឆ្នាំ២០១០ មកដល់ពេលនេះ»។
សូមអញ្ជើញទស្សនាវីដេអូរបៀបធ្វើថ្នាំពុលធម្មជាតិ របស់កសិករ ឈិត ឈៀង ដូចតទៅ៖
ទោះបីជាដឹងថាការប្រើប្រាស់ថ្នាំពុលធម្មជាតិ មិនអាចធ្វើឲ្យបន្លែ ឬដំណាំផ្សេងទទួលបានទិន្នផលច្រើនដូចការប្រើប្រាស់ថ្នាំពុលគីមីក៏ដោយ ប៉ុន្តែ លោក ឈិត ឈៀង នៅតែបន្តដាំបន្លែដែលមានសុវត្ថិភាពដល់អ្នកបរិភោគ និងចែករំលែកបទពិសោធ ចំណេះដឹងពីការផលិតថ្នាំពុលធម្មជាតិ ទៅដល់កសិករឯទៀត។ ឆ្លងកាត់ការពុលថ្នាំពុលគីមីដោយខ្លួនឯងផ្ទាល់ បានធ្វើឲ្យកសិកររូបនេះ មើលឃើញថា ការប្រើប្រាស់ថ្នាំពុលគីមីលើបន្លែ និងដំណាំផ្សេងៗ អ្នកដែលរងគ្រោះថ្នាក់មុនគេបង្អស់ និងធ្ងន់ធ្ងរជាងគេ គឺកសិករដែលជាអ្នកដាំផ្ទាល់តែម្តង ហើយអ្នកទទួលទាន ជាអ្នករងគ្រោះបន្ទាប់ ហើយធ្ងន់ឬស្រាលគឺទៅតាមកម្រិតសារធាតុថ្នាំពុលគីមី ដែលមាននៅក្នុងបន្លែទាំងនោះ។
លោក ឈិត ឈៀង បានអះអាងថា៖«ថ្វីដ្បិតការប្រើប្រាស់ថ្នាំធម្មជាតិលើបន្លែមិនអាចទទួលបានទិន្នផលច្រើនដូចការប្រើថ្នាំពុលគីមីក៏ពិតមែន ប៉ុន្តែបន្លែដែលប្រើថ្នាំពុលធម្មជាតិនេះ មានតម្លៃខ្ពស់ជាងបន្លែប្រើថ្នាំពុលគីមី ពី៣០០ ទៅ៥០០រៀលក្នុងមួយគីឡូក្រាម ឬមានតម្លៃលើសពីនេះ។ បើយើងទូទាត់គ្នាទៅ គឺមិនខុសគ្នាប៉ុន្មានទេ ដោយបន្លែប្រើថ្នាំពុលគីមីទទួលបានទិន្នផលច្រើន ប៉ុន្តែលក់បានថោក ហើយបន្លែប្រើថ្នាំពុលធម្មជាតិទទួលបានទិន្នផលតិច ប៉ុន្តែលក់បានថ្លៃ»។
បើតាមកសិកររូបនេះដដែល វត្ថុធាតុដើមដែលអាចផលិតថ្នាំពុលធម្មជាតិបាន និងមានប្រសិទ្ធភាព មានដូចជា ស្លឹកល្ហុង បណ្តូលពេជ្រ ស្លឹកគ្រៃ ជីនាងវង ម្ទេស ស្តៅ និងទន្ទ្រាងខែត្រជាដើម។ របៀបធ្វើថ្នាំពុលធម្មជាតិសម្រាប់ការពារ និងកម្ចាត់សត្វចង្រៃលើបន្លែ មានស្លឹកគ្រៃ៦គីឡូក្រាម ទន្ទ្រាងខែត្រ៥គីឡូក្រាម និងម្ទេស២ក្រាមចិញ្ច្រាំឬបុក លាយជាមួយទឹក១០លីត្រ ហើយផ្អាប់ទុកក្នុងរយៈពេល៧ទៅ១០ថ្ងៃ ទើបអាចប្រើប្រាស់បាន។ ដោយឡែក ជីនាងវង អាចបង្ការ ឬការពារពីសត្វចង្រៃដែលមានពីងពាងក្រហម, ដង្កូវយោលទង, ស្រាំងទិចផ្លែ, ពពួកសត្វដែលកើតឡើងពីផ្សិត និងពពួកសត្វល្អិតទៀកគូផងដែរ៕
Tag:
កសិកម្ម
បន្លែសុវត្ថិភាព
ពុលថ្នាំ
២៥រាជធានី/ខេត្ត
សៀមរាប
© រក្សាសិទ្ធិដោយ thmeythmey.com
