ការដំឡើងស្ដង់ដា«ផ្កាយ»ដោយខ្លួនឯង ក្នុងប្រព័ន្ធអ៊ិនធឺណិតជិះឥទ្ធិពលមិនល្អដល់វិស័យសណ្ឋាគារ

ជាតិ

បទយកការណ៍ / បទសម្ភាសន៍

សង្គមជាតិ

ការដំឡើងស្ដង់ដា«ផ្កាយ»ដោយខ្លួនឯង ក្នុងប្រព័ន្ធអ៊ិនធឺណិតជិះឥទ្ធិពលមិនល្អដល់វិស័យសណ្ឋាគារ

02, Jun 2019 , 4:59 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ វិស័យសណ្ឋាគារនៅក្នុងខេត្តសៀមរាបមានការរីកចម្រើនគួរឱ្យកត់សម្គាល់នាពេលបច្ចុប្បន្ននេះ ស្របពេលដែលកម្ពុជាមានកំណើនភ្ញៀវទេសចរពីមួយឆ្នាំទៅមួយឆ្នាំ។ យ៉ាងណាក៏ដោយ បើតាមការលើកឡើងរបស់ប្រតិបត្តិករទេសចរណ៍ បរិមាណបន្ទប់នៅក្នុងខេត្តមួយនេះហាក់លើសពីតម្រូវការដែលមានសព្វថ្ងៃ គឺបរិមាណទេសចរមានប្រហែល៣០ភាគរយប៉ុណ្ណោះបើធៀបនឹងចំនួនបន្ទប់សណ្ឋាគារទាំងអស់។ ដោយកត្ដានេះហើយ ទើបធ្វើឱ្យមានការប្រកួតប្រជែងកើតចេញជាច្រើនទម្រង់។ សណ្ឋាគារខ្លះ បានទម្លាក់តម្លៃជាងពាក់កណ្ដាល ឯខ្លះទៀតដើម្បីតម្រូវការភ្ញៀវឬក្រុមហ៊ុនទេសចរណ៍ខ្លះ បានដំឡើងផ្កាយសណ្ឋាគាររបស់ខ្លួនពីផ្កាយ២ ផ្កាយ៣ ទៅផ្កាយ៤ឬផ្កាយ៥ តែតម្លៃលក់នៅផ្កាយទាបដដែល។ ក្រុមប្រតិបត្តិករទេសចរណ៍បានមើលឃើញរូបភាពមិនល្អនៅលើចំណុចទាំងនេះដែលចង់មិនចង់វានឹងជះឥទ្ធិពលអាក្រក់ដល់វិស័យសណ្ឋាគារទាំងមូល។

ព័ត៌មានលម្អិត សូមស្ដាប់បទយកការណ៍ដែលរៀបរៀងដោយអ្នកស្រី អ៊ីសា រ៉ហានី ពីខេត្តសៀមរាបដូចតទៅ

ខេត្តសៀមរាបជាគោលដៅទេសចរណ៍លេខមួយរបស់កម្ពុជា។ ដោយសារកត្ដានេះហើយទើបធ្វើឱ្យកំណើនសេដ្ឋកិច្ចក្នុងតំបន់នេះ មានការរីកចម្រើនគួរឱ្យកត់សម្គាល់ ចំណែកវិស័យសណ្ឋាគារ ក៏រីកជាហូរហែដែរ។ យ៉ាងណាក៏ដោយ នារយៈពេលចុងក្រោយនេះ ដោយសារវិបត្តិសេដ្ឋកិច្ច លើសកលលោក និងបញ្ហាក្នុងតំបន់របស់ប្រទេសមួយចំនួន បានជិះឥទ្ធិពលមិនល្អ ដល់វិស័យទេសចរណ៍នៅកម្ពុជា។

យោងតាមគ្រឹះស្ថានអង្គរ ដែលគ្រប់គ្រងការលក់សំបុត្រចូលទស្សនារមណីយដ្ឋានអង្គរ នារយៈពេល៤ខែដើមឆ្នាំ២០១៩នេះ ទេសចរអន្ដរជាតិមកទស្សនាខេត្តសៀមរាប ធ្លាក់ចុះជាង៧ភាគរយ បើធៀបនឹងរយៈពេលដូចគ្នាកាលពីឆ្នាំ២០១៨។ ទេសចរមានជាង៩៧ម៉ឹននាក់ ដែលសរុបជាទឹកប្រាក់ស្មើនឹងជាង៤៤លានដុល្លារអាមេរិក ថយចុះជាង៨ភាគរយ។

តាមរបាយការណ៍របស់មន្ទីរទេសចរណ៍ខេត្តសៀមរាប ខេត្តនេះមានបន្ទប់ស្នាក់នៅ ប្រមាណ២ម៉ឺនបន្ទប់ ដែលចំនួននេះហាក់លើសតម្រូវការច្រើន បើធៀបនឹងចំនួនទេសចរត្រឹម៥ពាន់ក្នុងមួយថ្ងៃ នៅក្នុងខេត្តសៀមរាប។ តម្រូវការ និងផលិតផលមិនស្មើគ្នាបែបនេះហើយ ទើបធ្វើឱ្យការប្រកួតប្រជែងផ្នែកទីផ្សារមិនស្មើភាពគ្នា ពិសេសនារដូវខ្សត់ភ្ញៀវតែម្ដង។ ការប្រកួតប្រជែងនេះ ក៏ឈានដល់ការទម្លាក់ថ្លៃបន្ទប់ខ្ពស់ ប៉ះពាល់ដល់សណ្ឋាគារ ផ្សេងៗដែលនៅរក្សាតម្លៃដដែល។ ឯខ្លះទៀតដំឡើងផ្កាយសណ្ឋាគារដោយខ្លួនឯង តាមតម្រូវការភ្ញៀវ។

ចំពោះបញ្ហាខាងលើនេះ ប្រធានប្រតិបត្តិករទេសចរណ៍ខេត្តសៀមរាប លោក កៅ ហ្វីលីព លើកឡើងថា ការដំឡើងផ្កាយដោយខ្លួនឯង ពីសណ្ឋាគារមួយចំនួន គឺជាការមិនត្រូវឡើយ ដ្បិតថាការងារនេះ ជាសមត្ថកិច្ចរបស់ក្រសួងទេសចរណ៍ប៉ុណ្ណោះ។ លោកបន្តថា ក្រសួងទេសចរណ៍មានគណៈកម្មាធិការវាយតម្លៃផ្កាយសណ្ឋាគារ និងមាននីតិវិធីត្រឹមត្រូវ ហើយការកំណត់ផ្កាយខ្លួនឯងនៅលើការលក់នេះ គឺប៉ះពាល់ខ្លាំងដោយវិស័យសណ្ឋាគារក្នុងខេត្តសៀមរាប។

លោក ហ្សង វណ្ណៈ នាយកចាត់ការទូទៅស្ដីទីនៃសណ្ឋាគារសុខា បានមើលឃើញខ្ពស់ពីសក្កានុពលក្នុងវិស័យសណ្ឋាគារនៅខេត្តសៀមរាប ថានៅតែល្អទាំងពេលបច្ចុប្បន្ន និងទៅអនាគត។ តែអ្វីជាការព្រួយបារម្ភសម្រាប់លោក នោះគឺការប្រកួតប្រជែងតម្លៃដ៏ស្រូចស្រាវទៅវិញទេ ដែលអាចធ្វើឲ្យវិស័យមួយនេះអាចជួបហានិភ័យ ប្រសិនបើគ្មានការគ្រប់គ្រងត្រឹមត្រូវ។ តាមការមើលឃើញជាក់ស្ដែងរបស់លោក វណ្ណៈ គឺសណ្ឋាគារភាគច្រើនបានដំឡើងកម្រិតផ្កាយរបស់ខ្លួន ដោយមិនខ្វល់ពីគុណភាព សេវាកម្ម រួមនិងតម្លៃឡើយ សំខាន់អាចប្រជែងយកភ្ញៀវមកស្នាក់នៅក្នុងសណ្ឋាគាររបស់ខ្លួន។ ចំណុចនេះធ្វើឱ្យលោក វណ្ណៈ បារម្ភថានឹងប៉ះពាល់ដល់អារម្មណ៍ភ្ញៀវបរទេស ពេលឃើញតម្លៃផ្សេងគ្នាខ្លាំង រវាងសណ្ឋាគារដែលមានកម្រិតផ្កាយតាមស្ដង់ដា និងសណ្ឋាគារដែលដំឡើងផ្កាយដោយខ្លួនឯងតាមបណ្តាញអ៊ិនធើណិត។

ចំពោះបញ្ហាដំឡើងផ្កាយដោយឯកឯងនេះ ប្រធានមន្ទីរទេសចរណ៍ខេត្តសៀមរាប លោក ង៉ូវ សេងកាក់ ថានឹងឱ្យជំនាញធ្វើការរឿងនេះ និងព្រមានឱ្យសណ្ឋាគារទាំងនោះដកចេញពីវេបសាយវិញ។ លោកប្រធានមន្ទីរបញ្ជាក់ថា ក្នុងខេត្តសៀមរាប សណ្ឋាគារដែលមានកម្រិតផ្កាយ៥មានចំនួន២០ រីឯផ្កាយ៤មានត្រឹម២៤ប៉ុណ្ណោះ។

ប្រធានគ្រប់គ្រងសណ្ឋាគារ សារ៉ៃ លោក ជា សុខន ហាក់មិនទាន់ទទួលបានព័ត៌មានច្រើនទេពីការដំឡើងផ្កាយសណ្ឋាគារនេះ តែលោកថា ប្រសិនបើមានពិតមែនគឺប៉ះពាល់ដល់សណ្ឋាគារដែលមានផ្កាយខ្ពស់តាមស្ដង់ដាពិតប្រាកដណាស់។ លោកពន្យល់ថា សណ្ឋាគារមួយៗគ្មានសិទ្ធិដំឡើងផ្កាយដោយឯកឯងទេ គឺត្រូវមានការត្រួតពិនិត្យនិងផ្តល់ជូនដោយក្រសួងទេសចរណ៍។ ឯផលប៉ះពាល់មួយទៀតគឺសតិអារម្មណ៍ភ្ញៀវតែម្ដង ដែលរំពឹងទទួលបានសេវាកម្មនិងគុណភាពផ្កាយខ្ពស់ តែត្រូវខកចិត្ត ហើយពួកគេនឹងចោទប្រកាន់ចំណាត់ថ្នាក់សណ្ឋាគារក្នុងតំបន់នោះថាគ្មានគុណភាពជាដើម។

ជាអ្នកគ្រប់គ្រងសណ្ឋាគារដ៏ធំមួយ កន្លងមក លោក សុខន សង្កេតឃើញថាមានសណ្ឋាគារមួយចំនួនបានទម្លាក់តម្លៃលក់របស់ខ្លួននៅតាមប្រព័ន្ធអ៊ិនធឺណិតរាល់ពេលខែខ្សត់ភ្ញៀវឬខែ Low Season ម្ដងៗ។ លោកបន្ថែមថា សណ្ឋាគារខ្លះដែលធ្លាប់លក់ក្នុងតម្លៃពី៦០ទៅ៨០ដុល្លារ មកលក់ត្រឹម២៥ឬ៣៦ដុល្លារ។ លោក សុខន ថាការធ្វើរបៀបនេះមិនអាចស្រោងស្រង់ចំនួនទេសចរឱ្យមកច្រើនវិញបានទេ ផ្ទុយទៅវិញសណ្ឋាគារនឹងរងការខាតបង់ច្រើន ហើយការខាតបង់នេះរួមទាំងសណ្ឋាគារដែលទម្លាក់តម្លៃនិងមិនទម្លាក់តម្លៃ។

ករណីនេះដែរ លោក សុខន យល់ឃើញទៀតថា សណ្ឋាគារដែលទម្លាក់តម្លៃនេះ ហាក់កំពុងសម្លាប់ខ្លួនឯងទៅវិញទេ។ លោកក៏ស្នើឱ្យបញ្ឈប់ការលក់បែបនោះ ហើយសមាគមទីភ្នាក់ងារទេសចរណ៍នានាក៏គួរយល់ពីបញ្ហានេះដែរ ដោយមិនត្រូវយកតម្លៃលក់របស់សណ្ឋាគារដែលលក់តាមស្ដង់ដាទៅដាក់សម្ពាធប្រៀបធៀបតម្លៃលក់ទៅនឹងសណ្ឋាគារដែលទម្លាក់តម្លៃធ្វើឱ្យខូចគុណភាពវិស័យសណ្ឋាគារខ្លួនឡើយ៕