អន្តរជាតិ
រដ្ឋមន្ត្រីការពារជាតិចិន៖ ទោះខ្លាំងប៉ុនណាក៏ដោយ ចិននឹងមិនដើរគំរាមគេឯងឡើយ
រដ្ឋមន្ត្រីការពារជាតិចិន វៃ ហ្វឹងហឺ ថ្លែងនាកិច្ចសន្ទនា Shangri-La នៅសិង្ហបុរី។ រូបភាព Xinhua
×![]()
ដោយ: តន ចាន់រិទ្ធារ៉ា
ពីសិង្ហបុរី រដ្ឋមន្ត្រីការពារជាតិចិន វៃ ហ្វឹងហឺ បាននិយាយការពារការងើបឡើងឥតឈប់ឈររបស់កងទ័ពរំដោះប្រជាជនចិន។ ចំពោះមុខរដ្ឋមន្ត្រីការពារជាតិ និងប្រមុខកងទ័ពជាច្រើនរូប លោក វៃ ហ្វឹងងហឺ និយាយច្បាស់ៗថា យោធាចិន អនុវត្តនយោបាយការពារខ្លួនសុទ្ធសាធ ហើយមិនគំរាមប្រទេសផ្សេងឡើយ ទោះមានសមត្ថភាពខ្លាំងប៉ុណ្ណាក្ដី។ ប៉ុន្តែរដ្ឋមន្ត្រីរូបនេះក៏ព្រមានវិញថា បើមានប្រទេសណាវាយប្រហារមុន យោធាចិនប្រាកដតដៃមិនខាន។
ការកើនឡើងឥទ្ធិពលយ៉ាងឆាប់រហ័សរបស់កងទ័ពរំដោះប្រជាជន ធ្វើឲ្យប្រទេសជាច្រើនមានការភ័យព្រួយ ពិសេសប្រទេសដែលមានជម្លោះជាមួយចិន។ យ៉ាងណាមិញ បើតាមកាសែតចិន China Dailyប្រមុខការពារជាតិចិន វៃ ហ្វឹងហឺ បញ្ជាក់ថា ចិននឹងមិនធ្វើសង្គ្រាមជាមួយណាឡើយ លុះត្រាតែខ្លួនរងការវាយប្រហារជាមុន។
នាវេទិកាកិច្ចសន្ទនាសន្តិសុខ Shangri-la នៅថ្ងៃទី២ ខែមិថុនា ឧត្តមសេនីយ៍ វៃ ហ្វឹងហឺ និយាយថា កងទ័ពរំដោះប្រជាជនចិន ដើរលើផ្លូវអភិវឌ្ឍដោយសន្តិភាព បន្តការប្ដេជ្ញាចិត្តដើម្បីការពារប្រយោជន៍ជាតិ ហើយជួយរក្សាសន្តិភាព និងសន្តិសុខតំបន់ ក៏ដូចជាពិភពលោក។ បើតាមលោករដ្ឋមន្ត្រី ការប្ដេជ្ញាចិត្តរបស់យោធាចិនក្នុងការរក្សាសន្តិភាព មានចែងក្នុងធម្មនុញ្ញបក្សកុម្មុយនីស្តចិន និងសាធារណរដ្ឋប្រជាមានិតចិនទៀតផង។
«បើដល់ថ្នាក់នេះហើយ នៅមានប្រទេសដែលមិនជឿជាក់ចិនទៀតនោះ គ្មានអ្វីដែលចិនធ្វើបានទៀតឡើយ។» នេះជាការបញ្ជាក់របស់លោក វៃ ហ្វឹងហឺ ក្នុងសម្លៀកបំពាក់ឧត្តមសេនីយ៍របស់យោធាចិនដែលបន្តថា នៅថ្ងៃខាងមុខ មិនថាចិនខ្លាំងប៉ុនណាក៏ដោយ ក៏យោធាចិននឹងមិនដើរគំរាមប្រទេសផ្សេង អនុវត្តគោលនយោបាយអនុត្តរភាព ឬបង្កើនតំបន់ឥទ្ធិពលរបស់ខ្លួនអ្វីឡើយ ព្រោះវាមិនស្របតាមជំហរ និងផលប្រយោជន៍របស់ខ្លួន។
លោក វៃ ហ្វឹងហឺ ជារដ្ឋមន្ត្រីការពារជាតិទីមួយចូលរួមក្នុងវេទិកានេះតាំងពីឆ្នាំ២០១១ មក។ វត្តមានរបស់លោក កើតចំពេលដែលស្ថានការណ៍ក្នុងតំបន់ និងពិភពលោកគ្របដណ្ដប់ដោយជម្លោះពាណិជ្ជកម្មរវាងអាមេរិក និងចិន ព្រមទាំងការព្រួយបារម្ភពីភាពតានតឹងនៅសមុទ្រចិនខាងត្បូងផង។ ត្រង់ចំណុចនេះ ប្រមុខការពារជាតិលើកឡើងថា គ្មានបំណងបង្កបញ្ហាអ្វីឡើយ តែក៏មិនខ្លាចដែរ បើអ្នកណាហ៊ានវាយប្រហារចិន យោធាចិននឹងវាយបកវិញ។
ទោះមិននិយាយចំឈ្មោះប្រទេសណា ក្នុងចិត្តរបស់លោក វៃ ប្រាកដជាមានពាក្យអាមេរិកមិនខាន។ ទំនាក់ទំនងរវាងមហាអំណាចទាំងពីរ កាន់តែជូរចត់ខ្លាំងដោយសារបញ្ហាជាច្រើនចាប់ពីសង្គ្រាមពាណិជ្ជកម្ម ការគាំទ្រកោះតៃវ៉ាន់ពីសំណាក់ទីក្រុងវ៉ាស៊ីនតោន រហូតការបញ្ចេញសាច់ដុំយោធានៅសមុទ្រចិនខាងត្បូងរបស់កងទ័ពចិនផង។
ក្នុងគោលដៅទប់ទល់ឥទ្ធិពលចិន អាមេរិកតែបញ្ជូននាវារបស់ខ្លួនបើកកាត់សមុទ្រចិនខាងត្បូង ហើយពេលខ្លះចូលកៀកដែនកោះដែលត្រួតត្រាដោយចិនទៅទៀត។ អាមេរិកតែងលើកឡើងពីសេរីភាពនាវាចរណ៍ក្រោមច្បាប់អន្តរជាតិ ដើម្បីការពារវត្តមានយោធារបស់ខ្លួន ប៉ុន្តែការបកស្រាយបែបនេះមិនចូលត្រចៀកចិនឡើយ។ ក្នុងវេទិកាដដែល រដ្ឋមន្ត្រីការពារជាតិចិនចោទអាមេរិកថា បានបង្កើនកម្ដៅភាណតានតឹងដោយយកសេរីភាពនាវាចរណ៍ជាលេស៕
Tag:
ចិន
អាមេរិក
វៃ ហ្វឹងហឺ
© រក្សាសិទ្ធិដោយ thmeythmey.com
