អន្តរជាតិ
ម្ចាស់រូប «Tank Man» ស្នើឲ្យចិនលាតត្រដាងការពិតលើការបង្ក្រាបនៅទីលានធានអានមិន រូបភាព ស្គាល់ថា «Tank man» ថតដោយលោក Jeff Widener (ប្រភពរូប៖ AP)
× សម្រាប់រឿងហេតុនៅទីលានធានអានមិន ក្រុងប៉េកាំង ខ្លាចរអារនឹងលើកមកនិយាយ និងពុំចង់ឲ្យគ្រប់គ្នាបានដឹងលឺឡើយ។ និយាយឲ្យចំ ចិន មានបំណងលុបបំបាត់អតីតកាលអាក្រក់មួយនេះចោលតែម្តង។ ជាអ្នកនៅក្នុងហេតុការណ៍នេះផ្ទាល់ អ្នកថតរូបកាសែត ជនជាតិអាមេរិកឈ្មោះថា លោក Jeff Widener លើកឡើងថា វាដល់ពេលហើយសម្រាប់រដ្ឋាភិបាលចិន ចេញមុខរូតវាំងននព្រឹត្តិការណ៍ប្រវត្តិសាស្ត្រដ៏ខ្មៅងងឹតរបស់ខ្លួន ដែលបានកើតឡើងកាលពី៣០ឆ្នាំមុន។
ជាម្ចាស់រូបភាពដ៏មានឥទ្ធិពលប្រចាំសតវត្សរ៍ទី២០ ដែលបង្ហាញពីបុរសម្នាក់កំពុងឈរទល់មុខនឹងរថក្រោះនៅក្នុងបាតុកម្មនៅទីលានធានអានមិនក្នុងឆ្នាំ១៩៨៩ លោក Jeff Widener ជាកវីនិពន្ធទទួលបន្ទុកផ្នែករូបភាពឲ្យទីភ្នាក់ងារ AP ប្រចាំការនៅទីក្រុង បាងកក ប្រទេសថៃ។
កាលនោះ លោក Widener ត្រូវបានថ្នាក់លើដាក់ការងារឲ្យទៅយកព័ត៌មានជុំវិញចលនាទាមទារលទ្ធិប្រជាធិបតេយ្យ ដែលដឹកនាំដោយសិស្សនិស្សិតចិននៅទីលានធានអានមិនក្នុងទីក្រុងប៉េកាំង។ ហើយរូបភាពនេះដែរ បានថតដោយលោក Widener មួយថ្ងៃក្រោយពីយោធាចិន បានវាយបង្ក្រាបលើបាតុកម្ម ចាប់ពីថ្ងៃទី ៣ ដល់ទី៤ ខែមិថុនា ឆ្នាំ១៩៨៩ ។
ក្នុងកិច្ចសម្ភាសជាមួយទីភ្នាក់ងារព័ត៌មាន AP នៅថ្ងៃទី១ ខែមិថុនា លោក Widener និយាយថា លោកមិនយល់ទេថា ហេតុអ្វីបានបណ្តាមេដឹកនាំចិនមិនព្រមសារភាពពីកំហុសដែលពួកគេបានប្រព្រឹត្ត និងលាតត្រដាងការពិតពីក្រោយការវាយបង្ក្រាបបែបហិង្សានេះ។ ត្រង់ចំណុចនេះ លោក អះអាង សហរដ្ឋអាមេរិក និងបណ្តាប្រទេសក្នុងតំបន់អឹរ៉ុប ក៏ធ្លាប់បង្កើតកំហុសក្នុងប្រវត្តិសាស្ត្រដែរ ហើយពួកគេ បានដោះស្រាយបញ្ហាទាំងនោះឡើងវិញ។
ជាសារមួយផ្ញើទៅកាន់រដ្ឋាភិបាលចិនបច្ចុប្បន្ន លោក Widener និយាយបែបនេះ៖«ខ្ញុំគិតថា នេះជាពេលវេលាសម្រាប់ចិន ដើរទៅមុខ និងនិយាយការពិតពីអ្វីដែលបានកើតឡើង ព្រមទាំងប្រាប់ទៅកាន់សមាជិកគ្រួសារអ្នកស្លាប់ក្នុងហេតុការណ៍នេះ ដូច្នេះពួកគេ អាចឈប់នឹកគិតពីរឿងនេះទៀត»។ ហើយលោក យល់ឃើញនេះ នេះជារឿងត្រឹមត្រូវ និងគប្បីគួរអនុវត្ត។
សូមបញ្ជាក់ថា បាតុកម្មនៅទីលាន ធានអានមិន ជាការងើបបះបោរដែលដឹកនាំដោយនិស្សិតចិន ក្នុងគោលដៅប្រឆាំងនឹងការគាប់សង្កត់ខ្លាំងហួសហេតុពេកពីសំណាក់បក្សកុម្មុយនីស្តចិន។ ការបះបោរនេះ បានធ្វើឡើងចាប់ពីថ្ងៃទី១៥ ខែមេសា ដល់ ថ្ងៃទី៤ ខែមិថុនា ឆ្នាំ១៩៨៩ ពោលគឺមានរយៈពេលជិត២ខែ។ យោងតាមឯកសារជាច្រើន ក្នុងហេតុការណ៍នេះ សិស្សនិស្សិត និងកម្មករចិន ចន្លោះពីរាប់រយទៅរាប់ពាន់នាក់ បានស្លាប់៕
Tag:
ចិន
អ្នកសារព័ត៌មាន
ទីលានធានអានមិន
© រក្សាសិទ្ធិដោយ thmeythmey.com