Neymar បដិសេធបទចោទរំលោភនារីម្នាក់ ដោយអះអាងថាជាការបង្កើតរឿងធ្វើបាបខ្លួន

កីឡាអន្តរជាតិ

អន្តរជាតិ

Neymar បដិសេធបទចោទរំលោភនារីម្នាក់ ដោយអះអាងថាជាការបង្កើតរឿងធ្វើបាបខ្លួន

03, Jun 2019 , 5:45 pm

រូបភាព

ដោយ: ទេព ពិទូរ្យ

Neymar Jr. តារាឆ្នើមរបស់ Paris Saint-Germain បានបដិសេធការចោទប្រកាន់ថាបានរំលោភសេពសន្ថវៈស្ត្រីម្នាក់នៅប៉ារីស ប្រទេសបារាំង។ មិនត្រឹមតែច្រានចោលបទចោទនេះទេ ខ្សែប្រយុទ្ធសញ្ជាតិប្រេស៊ីលរូបនេះថែមទាំងអះអាងថារឿងហេតុនេះជាការរៀបគំរោងធ្វើបាបរូបគេ។

យោងតាមរបាយការណ៍របស់ប៉ូលីសដែលបានដាក់ពាក្យប្តឹងនៅឯក្រុង São Paulo ស្ត្រីម្នាក់នេះបានចោទប្រកាន់អតីតសមាជិក Barcelona ថាបានចាប់នាងរំលោភនៅឯសណ្ឋាគារមួយក្នុងប៉ារីស ជាទីដែល Neymar ប្រកបអាជីពជាមួយក្លិប PSG នោះ។

បើតាមការអះអាងរបស់ប៉ូលីសដដែល នារីម្នាក់ដែលមិនស្គាល់ឈ្មោះនេះបានស្គាល់គ្នាជាមួយ Neymar តាមរយៈបណ្តាញសង្គម Instagram ហើយរូបគេបានស្នើឲ្យនាងមកជួបគ្នានៅប៉ារីស។ Neymar ជាអ្នកចេញថ្លៃសំបុត្រយន្តហោះធ្វើដំណើរពីប្រេស៊ីលទៅបារាំង និងកក់សណ្ឋាគារប្រណីតមួយនៅទីនោះផង។

ក្នុងពាក្យបណ្តឹងរបស់នារីនោះសរសេទៀតថា Neymar បានទៅដល់សណ្ឋាគារនៅថ្ងៃទី១៥ ខែឧសភាជាមួយនឹងស្ថានភាពស្រវឹងទៅហើយ។ អ្នកទាំងពីរបានសន្ទនានិងអោបក្រសោប រហូតដល់ Neymar បានឈ្លានពានដោយប្រើហិង្សានិងរំលោភ ខណៈដៃគូមិនយល់ព្រម។

យ៉ាងណាក៏ដោយខ្សែប្រយុទ្ធមានតម្លៃខ្លួនថ្លៃជាងគេលើលោក បានព្យាយាមបង្ហាញថារូបគេគ្មានកំហុសអ្វីឡើយដោយគ្រាន់តែបានផ្ដោះផ្ដងសារទៅវិញទៅមកតាម Whatsapp ប៉ុណ្ណោះ។ ផ្ទុយទៅវិញ Neymar បានអះអាងថានេះជាការបង្កើតរឿងដើម្បីធ្វើបាប និងបង្ខូចកេរ្តិ៍ឈ្មោះខ្លួនទៅវិញ។

សព្វថ្ងៃខ្សែប្រយុទ្ធវ័យ២៧ឆ្នាំរូបនេះ កំពុងហ្វឹកហាត់នៅប្រេស៊ីលជាមួយក្រុមជម្រើសជាតិសម្រាប់ត្រៀមប្រកួតពានរង្វាន់ Copa América ឆ្នាំ២០១៩៕