កីឡាអន្តរជាតិ
អន្តរជាតិ
Liverpool និង Chelsea ត្រូវប្រជែងគ្នាដណ្តើមពាន Super Cup នៅតួកគី
× ជើងឯក Champions League ហង្សក្រហម Liverpool នឹងជើងឯក Europa League តោខៀវ Chelsea នឹងត្រូវប៉ះគ្នាក្នុងការប្រកួតដណ្តើមពានរង្វាន់ UEFA Super Cup នៅថ្ងៃទី១៤ ខែសីហា នៅទីក្រុងអ៊ីស្តង់ប៊ុល ប្រទេសតួកគី។
Liverpool បានផ្តួលក្រុម Tottenham Hotspurs ដោយលទ្ធផល ២-០ ក្នុងជំនួបផ្តាច់ព្រ័ត្រដើម្បីលើកពានក្របខណ្ឌកំពូលអឺរ៉ុបជាលើកទី៦ ក្រោយពីរថ្ងៃបន្ទាប់ពី Chelsea បានក្លាយជាម្ចាស់ពានលំដាប់ទី២អឺរ៉ុបជាលើកទីពីរ តាមរយៈការយកឈ្នះ Arsenal ៤-១។ សម្រាប់ពាន Super Cup ឆ្នាំ២០១៩ ដែលរៀបចំដោយសហព័ន្ធកីឡាបាល់ទាត់អឺរ៉ុប នេះជាការជួបគ្នារវាងក្រុមអង់គ្លេសពីរជាលើកដំបូងបង្អស់ក្នុងប្រវត្តិសាស្ត្របាល់ទាត់។
Liverpool គឺជាក្រុមពីក្របខណ្ឌ Premier League ចុងក្រោយគេដែលឈ្នះពានរង្វាន់ Super Cup នេះកាលពីឆ្នាំ ២០០៥។ កាលពីឆ្នាំ២០១៨ ក្រុម AT-Madrid ជាអ្នកគ្រងពាននេះក្រោយយកជ័យជម្នះក្រុមពីអេស្ប៉ាញដូចគ្នា Real Madrid (ម្ចាស់ពាន Champions League) ក្នុងលទ្ធផល ៤-២។
ក្រុមដែលដឹកនាំដោយអ្នកចាត់ការទូទៅលោក Jurgen Klopp នឹងមានការប្រកួតធំៗច្រើនរហូតដល់៧លើក។ ហង្សក្រហមត្រូវតំណាងឲ្យក្លិបពីអឺរ៉ុបដើម្បីលេងពានរង្វាន់ FIFA Club World Cup នៅខែធ្នូ ឆ្នាំ២០១៩។
Liverpool ក៏ត្រូវតតាំងជាមួយ Manchester City ក្នុងការប្រកួតមុនបើករដូវកាលថ្មី Community Shield នាកីឡដ្ឋាន Wembley ដែលអាចនឹងធ្វើនៅថ្ងៃទី៣ ឬទី៤ ខែសីហាផងដែរ៕
Tag:
បាល់ទាត់
UEFA Super Cup
© រក្សាសិទ្ធិដោយ thmeythmey.com