លោក Colin Thackery បានក្លាយជាបេក្ខជនដែលមានវ័យចំណាស់ជាងគេដែលបានឈ្នះពាន Britain’s Got Talent ជាមួយនឹងប្រាក់រង្វាន់២៥ម៉ឺនផោន [ជាង៣១ម៉ឺនដុល្លារអាមេរិក]។ លោក Colin ជាអតីតយុទ្ធជនម្នាក់ដែលបច្ចុប្បន្នមានវ័យ៨៩ឆ្នាំ និងរស់នៅក្រុងឆែលស៊ី ប្រទេសអង់គ្លេស។
លោក Colin បានចូលបម្រើក្នុងជួរកងទ័ពចាប់តាំងពីអាយុ១៥ឆ្នាំ ហើយបានជួបភរិយាខ្លួនឈ្មោះ Joan នៅជំរុំយោធាក្នុងតំបន់ County Durham។ យោងតាមការផ្សាយរបស់ The Sun ពួកគាត់បានរៀបការនៅឆ្នាំ១៩៥០ ប៉ុន្តែពីរសប្តាហ៍ក្រោយមក លោក Colin ត្រូវទៅបំពេញបេសកកម្មនៅកូរ៉េ។
បន្ទាប់មក លោកបានបន្តទៅហុងកុង ដោយអ្នកស្រី Joan បានទៅរួមរស់ជាមួយគ្នា។ ក្រោយមកទៀតទៀត ពួកគាត់បានត្រឡប់ទៅអង់គ្លេសវិញ ហើយអ្នកស្រី Joan បានទទួលមរណភាពដោយសារមហារីកនៅខែធ្នូ ឆ្នាំ២០១៦។
ពួកគាត់មានកូន២នាក់ និងចៅ៤នាក់ដែលរស់នៅក្រុង Norwich តែក្រោយមរណភាពរបស់ភរិយា លោក Colin រស់នៅក្នុងមណ្ឌលនិវត្តជន Chelsea Pensioners។
លោក Colin ដែលមានសមត្ថភាពផ្នែកចម្រៀង បានចូលប្រឡងសមត្ថភាពក្នុងកម្មវិធី Britain’s Got Talent រដូវកាលទី១៣។ នៅវគ្គដំបូង លោក Colin បានច្រៀងបទ «Wind Beneath My Wings» ដើម្បីឧទ្ទិសដល់ភរិយាខ្លួន ដែលបានស្លាប់កាលពីឆ្នាំ២០១៦ ក្រោយចំណងអាពាហ៍ពិពាហ៍ជាង៦០ឆ្នាំ។
គណៈកម្មការ និងអ្នកចូលរួមទស្សនា ស្ងើចសរសើរសមត្ថភាពរបស់លោក Colin យ៉ាងខ្លាំង ហើយលោក Simon Cowell នាង Amanda Holden នាង Alesha Dixon និងលោក David Walliams បានផ្តល់ចម្លើយ «Yes» ទាំងអស់គ្នា ដែលនាំឲ្យលោក Colin ឡើងទៅកាន់វគ្គពាក់កណ្តាលផ្តាច់ព្រ័ត្រ។
ឈានដល់វគ្គផ្តាច់ព្រ័ត្រ លោក Colin បានច្រៀងបទ «Love Changes Everything» របស់ Michael Ball។ ក្នុងចំណោមការប្រជែងសមត្ថភាពទាំង១២ចុងក្រោយ លោក Colin ទទួលបានសំឡេងគាំទ្រច្រើនជាងគេ ជាពិសេសនាំមុខ អ្នកវិភាគចិត្តសាស្ត្រ (Mentalist) ដែលមានរហស្សនាម X (Marc Spelmann) និង អ្នកសំដែងរហស្សកម្ម Ben Hart ។
ប្រាក់រង្វាន់ដែលលោក Colin ទទួលបានក្រោយការប្រកួតវគ្គផ្តាច់ព្រ័ត្រនោះ លោកនឹងបែកចែកខ្លះទៅដល់ Royal Chelsea Hospital ជាទីកន្លែងដល់លោករស់នៅ។ ជាមួយគ្នានេះ លោកនឹងឡើងច្រៀងជាកិត្តិយសនៅមុខរាជវង្សានុវង្សនាព្រឹត្តិការណ៍ Royal Variety Performance ផងដែរ៕