ខួបទី៣០ការបង្ក្រាបនៅធានអានមិន៖ អាមេរិក និងចិនឆ្លើយឆ្លងគ្នារឿងសិទ្ធិមនុស្ស

អន្តរជាតិ

ខួបទី៣០ការបង្ក្រាបនៅធានអានមិន៖ អាមេរិក និងចិនឆ្លើយឆ្លងគ្នារឿងសិទ្ធិមនុស្ស

04, Jun 2019 , 2:54 pm

រូបភាព

ដោយ: តន ចាន់រិទ្ធារ៉ា

ខួបទី៣០ឆ្នាំនៃការបង្ក្រាបហិង្សានៅទីលានធានអានមិននៅឆ្នាំ២០១៩ បានក្លាយជាប្រធានបទឆ្លើយឆ្លងរវាងអាមេរិក និងចិន។ រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ បានរិះគន់កំណត់ត្រាសិទ្ធិមនុស្សដ៏អាក្រក់របស់ទីក្រុងប៉េកាំងចាប់តាំងពីព្រឹត្តការណ៍៣០ឆ្នាំមុន ហើយថា អាមេរិកអស់សង្ឃឹមលើសិទ្ធិមនុស្សនៅចិនហើយ។ ការអធិប្បាយរបស់លោក ប៉ុមប៉េអូ ត្រូវបានចិនចាត់ទុកជាការវាយប្រហារលើប្រព័ន្ធដឹកនាំរបស់ខ្លួន និងជាសម្ដីក្រអឺតក្រទមផង។

ដូចរាល់ឆ្នាំដែរ ព្រឹត្តការណ៍ថ្ងៃទី៤ ខែមិថុនា បានក្លាយជាគោលដៅសម្រាប់រិះគន់ចិនរបស់អាមេរិក។ ថ្ងៃទី៤ ខែមិថុនា ឆ្នាំ១៩៨៩ យោធាចិន បានបើកការបោសសម្អាតបាតុករសិស្សនិស្សិតនៅទីលានធានអានមិនកណ្ដាលទីក្រុងប៉េកាំង។ ក្រុមបាតុករ បានទាមទារឲ្យមានការធ្វើកំណែទម្រង់ប្រព័ន្ធដឹកនាំរដ្ឋ និងការគោរពសិទ្ធិមនុស្សកាន់តែប្រសើរឡើង ប៉ុន្តែក្នុងក្រសែភ្នែកបក្សកុម្មុយនីស្តចិន ពួកគេជាជនប្រឆាំងបដិវត្ត។ ទីលានធានអានមិន ពោរពេញដោយឈាមបាតុករក្រោមស្នាដៃយោធា។

នាឱកាសរំឭកខួបព្រឹត្តការណ៍ដ៏សោកសៅនេះ រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ បានចេញសេចក្ដីថ្លែងការណ៍រិះគន់ចិនដោយមិនប្រណីមាត់។ ក្នុងសេចក្ដីថ្លែងការណ៍ថ្ងៃទី៣ ខែមិថុនា លោក ប៉ុមប៉េអូ បានទទូចឲ្យអាជ្ញាធរក្រុងប៉េកាំងប្រកាសទទួលស្គាល់ជាសាធារណៈពីចំនួនមនុស្សស្លាប់ ឬបាត់ខ្លួនដើម្បីបំពេញចិត្តជនរងគ្រោះ។ លោកបន្តថា អាមេរិកសង្ឃឹមពីភាពប្រសើរឡើងនៃស្ថានភាពសិទ្ធិមនុស្សក្រោយព្រឹត្តការណ៍បង្ហូរឈាមនេះ។

«ក្ដីសង្ឃឹមទាំងនោះបានរលាយអស់ហើយ។» នេះជាការអះអាងទាំងខកចិត្តរបស់រដ្ឋមន្ត្រីការបរទេសអាមេរិក មុននឹងបន្តថា រដ្ឋាភិបាលឯកបក្សរបស់ចិនមិនបានលើកលែងសូម្បីបន្តិចដល់មតិប្រឆាំង ហើយបានបំពានសិទ្ធិមនុស្សដើម្បីប្រយោជន៍របស់ខ្លួន។ លោក ប៉ុមប៉េអូ ក៏បានស្នើឲ្យទីក្រុងប៉េកាំងដោះលែងបុគ្គលដែលអនុវត្តសិទ្ធិសេរីភាពរបស់ខ្លួន បញ្ឈប់ការឃុំឃាំងដោយបង្ខំ និងកែប្រែនយោបាយដែលយកភេរវកម្មទៅលាយឡំជាមួយសាសនា និងសេរីភាព។

សេចក្ដីថ្លែងការណ៍របស់ប្រមុខការទូតអាមេរិក ធ្វើឲ្យតំណាងទីក្រុងប៉េកាំងនៅអាមេរិកក្ដៅស្លឹកត្រចៀកយ៉ាងខ្លាំង។ ស្ថានទូតចិនប្រចាំអាមេរិក បានរិះគន់លោក ប៉ុមប៉េអូ ដែលបង្ហាញអត្តចរិតច្រឡោងខាម ហើយនិយាយស្ដីទាំងលំអៀង។ បើតាមទីភ្នាក់ងារព័ត៌មាន AFP បេសកម្មចិនចោទមន្ត្រីអាមេរិកថា យកសិទ្ធិមនុស្សដើម្បីលូកលាន់កិច្ចការផ្ទៃក្នុងចិន វាយប្រហារប្រព័ន្ធដឹកនាំ និងបង្ខូចឈ្មោះគោលនយោបាយចិនទៀតផង។

«នេះជាការមាក់ងាយជនជាតិចិន និងជាការបំពានដោយកំរោលច្បាប់អន្តរជាតិ និងបញ្ញត្តិជាមូលដ្ឋានក្នុងការគ្រប់គ្រងទំនាក់ទំនងអន្តរជាតិ។ ចិនមិនពេញចិត្ត និងប្រឆាំងដាច់អហង្ការ។» នេះជាការបន្ថែមរបស់ស្ថានទូតចិនតបសេចក្ដីថ្លែងការណ៍របស់លោក ប៉ុមប៉េអូ ។ លើរឿងសិទ្ធិមនុស្សវិញ ស្ថានតំណាងទីក្រុងប៉េកាំងប្រកាសថា សិទ្ធិមនុស្សនៅចិនស្ថិតដំណាក់ល្អបំផុតហើយ៕