អន្តរជាតិ
ទិដ្ឋភាពពីលើអាកាស នៃទីក្រុងជាប់សមុទ្រ ដាណាង នៃប្រទេសវៀតណាម ។ ប្រភពរូប៖ Shutterstock
×![]()
នាពេលបច្ចុប្បន្ននេះ ក្រុមហ៊ុន និងជនជាតិចិន កាន់តែច្រើនឡើងៗ កំពុងប្រើប្រាស់ឈ្មោះប្រជាជនវៀតណាម ដើម្បីចូលកាន់កាប់ដីធ្លីដោយខុសច្បាប់។ ខុសច្បាប់ត្រង់ថា វៀតណាម ដាក់បម្រាមជនបរទេសពីការទិញ ដី ឬលំនៅឋានប្រជាជន លើកលែងតែ អាផាតមិន (apartment) តែប៉ុណ្ណោះ។
ក្នុងរបាយការណ៍ដែលបានបញ្ជូនទៅកាន់រដ្ឋសភាជាតិ នៅថ្ងៃអង្គារទី ៤ ខែមិថុនា ក្រសួងសន្តិសុខសាធារណៈវៀតណាម គូសបញ្ជាក់ថា ក្រុមហ៊ុន និងជនជាតិចិនកំពុងទិញ ឬជួលដីក្នុងតំបន់តម្លៃថ្លៃកប់ពពក ដែលមានទីតាំងនៅតាមបណ្តោយឆ្នេររបស់វៀតណាម ដោយប្រើឈ្មោះប្រជាជនវៀតណាម។
តាមការចុះផ្សាយសារព័ត៌មាន Vietnam Express ដោយដកស្រង់របាយការណ៍របស់ក្រសួងខាងលើ ចំនួនជនជាតិចិនដែលទៅកាន់ប្រទេសវៀតណាម ក្នុងគោលបំណង បើកអាជីវកម្ម ធ្វើដំណើរកម្សាន្ត និងផ្តល់ ឬទទួលការអប់រំជាដើម កំពុងកើនឡើងយ៉ាងគំហុក ដែលឈានដល់មានតម្រូវការខ្ពស់សម្រាប់លំនៅឋាន។ ជនជាតិចិនទាំងនោះ បានរៀបការ និងមានកូនជាមួយប្រជាជនវៀតណាមដោយពុំផ្តល់ដំណឹងជូនសមត្ថកិច្ចតំបន់ឡើយ។
គិតត្រឹម ៥ខែដើមឆ្នាំ២០១៩ ភ្ញៀវទេសចរជនជាតិចិនប្រមាណ ២,១លាននាក់ បានធ្វើដំណើរទៅកាន់ប្រទេសវៀតណាម ។ ជាប្រភពដ៏ធំបំផុតនៃអ្នកទេសចរ តួលេខនេះ ស្មើនឹងជិត៣០ភាគរយនៃភ្ញៀវទេសចរបរទេសសរុបដែលទៅដល់ប្រទេសវៀតណាម ។ នេះបើតាមទិន្ន័យរបស់ការិយាល័យស្ថិតិទូទៅវៀតណាម។
ក្រៅពីកំណើននៃភ្ញៀវទេសចរចិន វៀតណាម ក៏ទទួលបាននូវមូលធនដែលទើបចុះឈ្មោះថ្មីៗជាច្រើនពីប្រទេសចិន ក្នុងរយៈពេល៥ខែដើមឆ្នាំ២០១៩នេះ ជាមួយនឹងទឹកប្រាក់ ១,៥៦ពាន់លានដុល្លារសម្រាប់គម្រោងចំនួន ២៣៣។ ទាក់ទិននឹងរឿងនេះ កន្លងទៅ ក្រសួងសន្តិសុខសាធារណៈវៀតណាម ធ្លាប់បានព្រមានឲ្យបណ្តាក្រសួង និងរដ្ឋាភិបាលមូលដ្ឋានពាក់ព័ន្ធ ពង្រឹងគុណភាពផ្នែកគ្រប់គ្រងរបស់ពួកគេ លើគម្រោងវិនិយោគផ្ទាល់ពីបរទេស (FDI) និងបង្ការក្រុមអ្នកវិនិយោគិនបរទេសពីការចូលកាន់កាប់ និងដោះដូរគម្រោងដោយខុសច្បាប់។
សូមបញ្ជាក់ថា របាយការណ៍នេះ បានធ្វើឡើងក្រោយពីសមាជិកសភាវៀតណាមជាច្រើន បានបង្ហាញ កង្វល់ជុំវិញប្រជាជនវៀតណាម ដែលចូលកាន់កាប់ដីធ្លី ឬលំនៅឋាន ដោយប្រើឈ្មោះពួកគេសម្រាប់ជនបរទេស ក្នុងទីក្រុងជាប់សមុទ្រមួយចំនួនដូចជាទីក្រុងដាណាងជាដើម ។ យោងតាមច្បាប់របស់វៀតណាម ជនបរទេស មានសិទ្ធិទិញអាផាតមិនក្នុងប្រទេសវៀតណាម ប៉ុន្តែត្រូវហាមឃាត់ពីការទិញដី ឬលំនៅឋានឯកជន៕
Tag:
ចិន
វៀតណាម
ឈ្មោះកម្មសិទ្ធិដីធ្លី
© រក្សាសិទ្ធិដោយ thmeythmey.com
