ជាតិ
«បន្ថយល្បឿន ដើម្បីអាយុជីវិតកុមារ» សិស្សានុសិស្សហ្វឹកហាត់ឆ្លងផ្លូវ(រូបពីក្រសួងសាធារណការនិងដឹកជញ្ជូន)
× ភ្នំពេញ៖ សិស្សានុសិស្សនៃសាលាបឋមសិក្សាចំនួន៤ បានទទួលការអប់រំអំពីសុវត្ថិភាពចរាចរណ៍ផ្លូវគោក ក្រោមប្រធានបទ«បន្ថយល្បឿន ដើម្បីអាយុជីវិតកុមារ»។
នៅថ្ងៃទី៣ខែមិថុនា ស្ថាប័នពាក់ព័ន្ធបានរៀបចំកម្មវិធីអប់រំមួយនៅសាលាបឋមសិក្សាចំនួន៤ ដែលស្ថិតនៅតាមបណ្ដោយផ្លូវជាតិលេខ៥ ដើម្បីបញ្ជ្រាបការយល់ដឹងជាមូលដ្ឋានអំពីភ្លើងសញ្ញាចរាចរណ៍ គំនូសសញ្ញា និងស្លាកសញ្ញាចរាចរណ៍សំខាន់ៗសម្រាប់អ្នកថ្មើរជើង វិធានការសុវត្ថិភាពសម្រាប់អ្នកថ្មើរជើង និងប្រការគួរចៀសវាង។
ការចុះអប់រំដល់សិស្សានុសិស្សនេះ ត្រូវបានឧបត្ថមដោយមូលនិធិសមាហរណកម្មអាស៊ាន-ជប៉ុន (JAIF) ដែលជាគម្រោងអប់រំផ្សព្វផ្សាយសុវត្ថិភាពចរាចរណ៍ផ្លូវគោក ក្រោមប្រធានបទ«បន្ថយល្បឿន ដើម្បីអាយុជីវិតកុមារ»។
នាយកដ្ឋានសុវត្ថិភាពចរាចរណ៍ផ្លូវគោក របស់ក្រសួងសាធារណការ និងដឹកជញ្ជូន សហការជាមួយអគ្គលេខាធិការដ្ឋាននៃគណៈកម្មាធិការជាតិសុវត្ថិភាពចរាចរណ៍ផ្លូវគោក និងសហភាពសហព័ន្ធយុវជនកម្ពុជាក្នុងវិស័យសាធារណការ និងដឹកជញ្ជូន បានចុះអប់រំផ្សព្វផ្សាយកម្មវិធីខាងលើនេះ។ ហើយសាលាបឋមដែលទទួលបានការអប់រំនេះ រួមមានសាលាបឋមសិក្សាចម្រើនរដ្ឋ សាលាព្រែកព្នៅ សាលាខារ៉ាហ្គិជិម៉ាសាហិរ៉ូ និងសាលាបឋមសិក្សាទួលអំពិល។
បន្ទាប់ពីបញ្ចប់វគ្គរៀនទ្រឹស្ដីរួច សិស្សានុសិស្ស និងលោកគ្រូអ្នកគ្រូត្រូវបានតម្រូវឲ្យចូលរួមហ្វឹកហាត់ និងអនុវត្តវិធានសុវត្ថិភាពក្នុងការឆ្លងផ្លូវនៅទីលានដែលរៀបចំក្នុងបរិវេនរបស់សាលានីមួយៗ សម្រាប់យកជាគំរូសម្រាប់ឲ្យសិស្សយកទៅអនុវត្តក្នុងពេលឆ្លងផ្លូវជាក់ស្ដែង៕
© រក្សាសិទ្ធិដោយ thmeythmey.com