ជាតិ
ត្រីកាហែក្រហម។ រូបភាព៖ Dinh D. Tran / ffish.asia
×![]()
គម្រោងអច្ឆរិយភាពនៃទន្លេមេគង្គ (Wonders of the Mekong) សូមណែនាំត្រីមានស្រកាមួយប្រភេទ ដែលជាប្រភេទត្រីទឹកសាប វារស់នៅពាក់កណ្តាលជម្រៅទឹក ក្នុងទន្លេធំៗ និងមធ្យម តំបន់វាលទំនាបលិចទឹក និងទន្លេមេគង្គ។
ត្រីកាហែក្រហម មានឈ្មោះវិទ្យាសាស្ត្រ (Barbonymus altus) និងឈ្មោះជាភាសាអង់គ្លេស Red-tail tinfoil barb មានប្រវែងដងខ្លួនអតិបរមា ២៥ ស.ម។ វាធ្វើចរាចរផ្លាស់ទីចុះមកតំបន់វាលទំនាបលិចទឹកក្នុងខែតុលា និងឡើងទៅទន្លេមេគង្គវិញ ចាប់ពីខែមករា-កុម្ភៈ។ ត្រីប្រភេទនេះ ពង-កូនក្នុងរដូវរស្សា ចាប់ពីខែកក្កដា ដល់ខែសីហា នៅតាមតំបន់វាលទំនាបលិចទឹក និងព្រៃលិចទឹក ទីដែលគ្មានចរន្តទឹកហូរ។ វាបណ្តែតពងក្នុងទឹក ដោយពងទាំងនោះ នឹងញាស់ក្នុងរយៈពេល ១២ម៉ោងក្រោយមក។ វាស៊ីវារិជាតិ និងផ្លង់តុងរុក្ខជាតិអាហារ។
ត្រីកាហែក្រហម ត្រូវបានគេកត់ត្រាចូលក្នុងបញ្ជីរក្រហម IUCN Red List (Least Concern) ក្នុងឆ្នាំ ២០១១ ជាប្រភេទត្រីមានការព្រួយបារម្ភតិចតួច ដែលនឹងឈានទៅផុតពូជ។ ការនេសាទហួសកម្រិតពីអតីតកាល និងទៅអនាគត ការបាត់បង់ និងការប្រែប្រួលទីជម្រក ការបាត់បង់ព្រៃលិចទឹក ការសាងសង់ទំបន់វារិអគ្គិសនី ទំនងជាបញ្ហាអវិជ្ជមាន ដែលបន្តប៉ះពាល់ដល់ជីវិតមច្ឆាប្រភេទនេះ និងប្រភេទផ្សេងទៀតនាពេលបច្ចុប្បន្ន៕
© រក្សាសិទ្ធិដោយ thmeythmey.com
