អន្តរជាតិ
លោក ស៊ី ជិនភីង ធ្វើទស្សនកិច្ចផ្លូវរដ្ឋនៅរុស្ស៊ីដែលកំពុងមានបញ្ហាជាមួយអាមេរិកដូចគ្នា
×![]()
ដោយ: តន ចាន់រិទ្ធារ៉ា
ប្រធានាធិបតីចិន ស៊ី ជិនភីង នៅថ្ងៃទី៥ ខែមិថុនា បានចាប់ផ្ដើមដំណើរទស្សនកិច្ចផ្លូវរដ្ឋនៅរុស្ស៊ីតាមសំណើអញ្ជើញរបស់ប្រធានាធិបតី វ្ល៉ាឌីមៀ ពូទីន ។ ដំណើរទស្សនកិច្ចនេះ ធ្វើឡើងស្របពេលដែលចិន កំពុងប្រឈមមុខជាមួយអាមេរិកលើរឿងពាណិជ្ជកម្មដ៏សាំញាំ ហើយរុស្ស៊ីវិញក៏បន្តជាប់ឈ្មោះក្នុងសំណុំរឿងបោះឆ្នោតអាមេរិក។ គេរំពឹងថា ទំនាក់ទំនងមហាអំណាចទាំងពីរដែលមានប្រឈមដូចគ្នា នឹងកាន់តែរឹងមាំ។
នៅពេលអាមេរិកកាន់តែអុងអាត់ខ្លាំង ចិន និងរុស្ស៊ីក៏ប្រកៀកស្មាគ្នាកាន់តែខ្លាំង។ ប្រធានាធិបតីចិន ស៊ី ជិនភីង ធ្វើទស្សនកិច្ចផ្លូវរដ្ឋរយៈពេលបីថ្ងៃនៅទឹកដីរុស្ស៊ីដែលចាប់ផ្ដើមពីថ្ងៃទី៥ ខែមិថុនាតទៅ។ ឆ្នាំ២០១៩ ជាខួបទី៧០នៃទំនាក់ទំនងការទូតចិន និងរុស្ស៊ី។ ៧០ឆ្នាំមកនេះ ចំណងការទូតរវាងមហាអំណាចជួនក្ដៅជួនត្រជាក់ ប៉ុន្តែចុងក្រោយចិន និងរុស្ស៊ីត្រូវរ៉ូវគ្នាខ្លាំងព្រោះកំពុងប្រឈមមុខគូប្រជែងតែមួយ គឺអាមេរិក។
សព្វថ្ងៃ ទីក្រុងប៉េកាំង និងទីក្រុងវ៉ាស៊ីនតោនកំពុងបន្ទោសគ្នាទៅវិញទៅមកលើការជាប់គាំងការចរចាបញ្ចប់ជម្លោះ។ ក្រុងវ៉ាស៊ីនតោនថា ប៉េកាំងមិនអនុវត្តតាមការប្ដេជ្ញាចិត្តរបស់ខ្លួន ឯក្រុងប៉េកាំងថា វ៉ាស៊ីនតោនទៅវិញដែរដែលដើរថយក្រោយ។ ចំណែកឯក្រុងមូស្គូវិញ នៅតែពាក់ស្លាកជនសង្ស័យក្នុងការបោះឆ្នោតប្រធានាធិបតីឆ្នាំ២០១៦ ហើយបានជួយឲ្យលោក ដូណាល់ ត្រាំ ឈ្នះឆ្នោត។ ខណៈរដ្ឋបាលលោក ត្រាំ បដិសេធ ស្ថាប័ននីតិបញ្ញត្តិអាមេរិកបន្តរករឿងរុស្ស៊ីមិនចប់។
ក្នុងកិច្ចសម្ភាសជាមួយប្រព័ន្ធផ្សព្វផ្សាយរុស្ស៊ីមុនធ្វើដំណើរទៅកាន់ទីក្រុងមូស្គូ លោក ស៊ី និយាយថា ចិន និងរុស្ស៊ីគួរសហការឲ្យជិតស្និទ្ធក្នុងនាមជាអ្នកជិតខាង និងជួយផ្ដល់ការគាំទ្រឲ្យគ្នាទៅវិញកាន់តែខ្លាំងជាងមុន។ ប្រធានាធិបតីចិនបន្តទៀតថា ប្រទេសទាំងពីរចាំបាច់ត្រូវដើរតួនាទីច្រើនទៀតលើឆាកអន្តរជាតិដើម្បីជំរុញសន្តិភាព ស្ថិរភាព និងការអភិវឌ្ឍសម្រាប់មនុស្សលើពិភពលោក។
អំឡុងពេលកិច្ចសម្ភាសដែលផ្សាយទីភ្នាក់ងារព័ត៌មានរុស្ស៊ី TASS នៅថ្ងៃទី៤ ខែមិថុនា មេដឹកនាំចិនក៏រូបនេះក៏លើកឡើងពីស្ថានភាពល្អប្រសើរនៃសេដ្ឋកិច្ចចិន ប៉ុន្តែលោកមិននិយាយពីសង្គ្រាមពាណិជ្ជកម្មជាមួយអាមេរិកដែលនៅបន្តឆេះឡើយ។ លោក ស៊ី ប្រាប់ប្រព័ន្ធផ្សព្វផ្សាយរុស្ស៊ីថា ចិនមានគ្រប់លក្ខខណ្ឌចាំបាច់ទាំងអស់ ព្រមទាំងសមត្ថភាព និងជំនឿចិត្តដើម្បីជម្នះរាល់ហានិភ័យ និងបញ្ហាប្រឈមទាំងឡាយទាំងពួង។
លើទំនាក់ទំនងទ្វេភាគី ប្រមុខរដ្ឋចិនអះអាងថា ៧០ឆ្នាំមកនេះ ភាពជាដៃគូយុទ្ធសាស្ត្រគ្រប់ជ្រុងជ្រោយចិន និងរុស្ស៊ី រឹងមាំជាងមុន ហើយទំនាក់ទំនងបច្ចុប្បន្នស្ថិតក្នុងដំណាក់កាលល្អបំផុតក្នុងប្រវត្តិសាស្ត្រ។ លើសពីនោះ ប្រទេសទាំងពីរ ក៏រីករាយនឹងការទុកគ្នាទៅវិញទៅមក និងតែងបានជួយគ្នាលើបញ្ហាតំបន់ និងអន្តរជាតិ។ លោក ស៊ី ក៏រំឭកទៀតថា ទន្ទឹមគ្នានឹងភាពល្អូកល្អឺន ចិន និងរុស្ស៊ីក៏ទទួលបានឱកាសល្អដើម្បីការរីកចម្រើនបន្តទៀត។
Tag:
ចិន
រុស្ស៊ី
ស៊ី ជិនភីង
© រក្សាសិទ្ធិដោយ thmeythmey.com
