អន្តរជាតិ
ស៊ីលី បិទស្ថានីយ៍អគ្គិសនីដុតធ្យូងថ្ម ៨កន្លែង ហើយងាកទៅរកថាមពលបៃតង ប្រភពរូបៈ AFP
× រដ្ឋាភិបាលស៊ីលី បានប្រកាស នៅថ្ងៃទី៤ មិថុនា ថា ខ្លួន នឹងបិទស្ថានីយ៍អគ្គិសនីដុតធ្យូងថ្មចំនួន ៨ កន្លែង ក្នុងរយៈពេល៥ឆ្នាំ ។ ការបិទនេះ ជាផ្នែកមួយនៃផែនការដែលមានគោលដៅផ្លាស់ប្តូរទាំងស្រុងពីមធ្យោបាយទាញថាមពលដែលប៉ះពាល់ខ្លាំងដល់បរិស្ថាន ទៅកាន់ថាមពលកកើតឡើងវិញ ត្រឹមឆ្នាំ២០៤០។
ជាបទបញ្ជារបស់ប្រធានាធិបតីអភិរក្សនិយមរបស់ស៊ីលី លោក Sebastian Pinera ការបិទស្ថានីយ៍អគ្គិសនីទាំង៨ទីតាំងនេះ ត្រូវគេប៉ាន់ប្រមាណថា ស្មើនឹង ២០ភាគរយនៃបរិមាណថាមពលសរុបរបស់ប្រទេសនេះ ឬស្មើនឹង ២៣ ០០០ មេហ្កាវ៉ាត់។ តាមការចុះផ្សាយរបស់ទីភ្នាក់ងារព័ត៌មាន AFP លោក Pinera លើកឡើងបែបនេះថា ការប្រកាសនេះ ឆ្លុះបញ្ចាំងពីការតាំងចិត្តរបស់រដ្ឋាភិបាលលោក ក្នុងការអនុវត្តការសន្យារបស់ខ្លួន។
យោងតាមការបញ្ជាក់របស់រដ្ឋាភិបាលស៊ីលី ការបិទស្ថានីយ៍អគ្គិសនីដុតធ្យូងថ្មចំនួន៨ទីតាំងនេះ នឹងកាត់បន្ថយឧស្ម័នកាបូនឌីអុកស៊ីតប្រចាំឆ្នាំ ដែលពេលបច្ចុប្បន្នមាន៣០លានតោន ទៅត្រឹម៤លានតោន នាឆ្នាំ២០២៤ ខាងមុខ។ ទោះជាបញ្ជាឲ្យបិទបណ្តោះអាសន្នរយៈ៥ឆ្នាំក្តី រដ្ឋាភិបាលស៊ីលី នៅតែអាចបើកប្រតិបត្តិការស្ថានីយ៍អគ្គិសនីដុតធ្យូងថ្មទាំង៨នេះ កាលណាមានតម្រូវការចាំបាច់ និងបន្ទាន់។
សូមបញ្ជាក់ថា ស៊ីលី ដែលជាប្រទេសនាំចូលថាមពលធំមួយ បានពឹងផ្អែកខ្លាំងលើការទាញយកថាមពលអគ្គិសនីពីស្ថានីយ៍ដុតធ្យូងថ្មក្នុងរយៈពេល១ទសវត្សរ៍ចុងក្រោយនេះ ។ ការណ៍នេះកើតឡើងដោយសារខ្លួនបានបញ្ចប់កិច្ចព្រមព្រៀងនាំចូលឧស្ម័នធម្មជាតិពីអាហ្សង់ទីន។ យ៉ាងណាមិញ ការនាំចូលបានបន្តជាថ្មីកាលពីឆ្នាំ២០១៨កន្លងទៅ ក្រោមកិច្ចព្រមព្រៀងជាមួយរដ្ឋធានី ប៊ុយណូស៊ែ ដែលធ្វើឲ្យស៊ីលីចាប់ផ្តើមងាកចេញធ្យូងថ្ម។
ប្រមាណ ៤០ភាគរយនៃថាមពលអគ្គិសនីរបស់ស៊ីលី ទាញមកពីស្ថានីយ៍អគ្គិសនីដុតធ្យូងថ្មចំនួន ២៨ទីតាំង។ គោលដៅរបស់រដ្ឋាភិបាលស៊ីលី គឺបិទរោងចក្រទាំងអស់នោះត្រឹមឆ្នាំ២០៤០ និងប្រែក្លាយទៅជាប្រទេសគ្មានកាបូនឌីអុកស៊ីពេញលេញ ត្រឹមឆ្នាំ២០៥០។ ទាំងនេះ គឺសុទ្ធសឹងតែជាកិច្ចប្រឹងប្រែងរបស់លោកប្រធានាធិបតី Sebastian Pinera ដោយអនុវត្តតាមរដ្ឋាភិបាលអាណត្តិមុន ដែលផ្តើមសំខាន់លើថាមពលបៃតងជាអាទិ៍ ខ្យល់ និងព្រះអាទិត្យជាដើម៕
Tag:
ស៊ីលី
ថាមពលបៃតង
ស្ថានីយ៍អគ្គិសនីដុតធ្យូងថ្ម
© រក្សាសិទ្ធិដោយ thmeythmey.com