ជាតិ
សង្គមជាតិ
សមត្ថកិច្ច កំពុងតាមឃាត់ខ្លួនបុគ្គលម្នាក់ ដែលក្លែងបន្លំជាមន្ត្រីនគរបាល បោកលុយពលរដ្ឋ
រូបភាពពីអគ្គស្នងការដ្ឋាននគរបាលជាតិ
×![]()
ដោយ: ឡាយ សុភាវតី
ភ្នំពេញ៖ សមត្ថកិច្ចកំពុងតាមឃាត់ខ្លួន បុគ្គលម្នាក់ ដែលបានក្លែងបន្លំជាមន្ត្រីនគរបាល ហើយមានជាប់ពាក់ព័ន្ធនឹងករណីឆបោកយកប្រាក់ពីពលរដ្ឋ ដើម្បីរត់ការចូលក្របខណ្ឌនគរបាល។ នេះបើតាមការចុះផ្សាយរបស់អគ្គស្នងការដ្ឋាននគរបាលជាតិ កាលពីថ្ងៃទី៥ មិថុនា។
អគ្គស្នងការនគរបាលជាតិ បានបញ្ជាក់ថា បុគ្គលដែលក្លែងបន្លំជានគរបាលនោះ មានឈ្មោះ ឆាយ ឆដា ដោយបានប្រើឯកសណ្ឋាននគរបាល និងយកប្រាក់ពីមនុស្ស៣នាក់ កាលពីឆ្នាំ២០១៧ ដើម្បីរត់ការចូលក្របខ័ណ្ឌប៉ូលីស ដោយក្នុងម្នាក់ ត្រូវចំណាយប្រាក់៧,៥០០ដុល្លារ។ ប៉ុន្តែមកដល់ពេលនេះ អ្នកទាំង៣នាក់នោះ មិនទាន់បានចូលក្របខណ្ឌនគរបាលនៅឡើយទេ ទើបមានការបង្ហោះរូបបុគ្គលនោះ លើបណ្ដាញសង្គមហ្វេសប៊ុក។
ក្រោយត្រួតពិនិត្យហើយ អគ្គស្នងការដ្ឋាននគរបាលជាតិ បានបដិសេធថា បុគ្គល ឆាយ ឆដា ខាងលើនេះ ជាមនុស្សក្លែងបន្លំជានគរបាល ពោលគឺរូបគេមិនស្ថិតក្នុងក្របខ័ណ្ឌនគរបាលជាតិទេ។ បច្ចុប្បន្នសមត្ថិកិច្ច កំពុងតាមស្រាវជ្រាវរកបុគ្គលនេះ ដើម្បីឃាត់ខ្លួន និងសាកសួរបន្តតាមនិតិវិធីនៃច្បាប់៕
Tag:
ករណីបោកប្រាស់
នគរបាលក្លែងក្លាយ
© រក្សាសិទ្ធិដោយ thmeythmey.com
