អត្ថបទពាណិជ្ជកម្ម
ប្រជាជនកម្ពុជា កំពុងទទួលយកមធ្យោបាយទូទាត់ប្រាក់បែបថ្មី គឺការទូទាត់តាមឌីជីថល
× ភ្នំពេញ ថ្ងៃទី ៦ ខែមិថុនា ឆ្នាំ ២០១៩ - ថ្ងៃនេះ ក្រុមហ៊ុនវីសា ដែលជាក្រុមហ៊ុនបច្ចេកវិទ្យាទូទាត់សាច់ប្រាក់តាមប្រព័ន្ធអេឡិចត្រូនិកអន្តរជាតិដ៏ធំបំផុតមួយនៅក្នុងពិភពលោក បានចេញផ្សាយតួលេខពីកំណើនរបស់ប្រជាជនកម្ពុជា កំពុងតែទទួលយកការទូទាត់ប្រាក់តាមរយៈឌីជីថល ពីមួយឆ្នាំ ទៅមួយឆ្នាំចំនួន 43% លើតម្លៃសរុបនៃការទិញទំនិញ និងសេវាកម្មផ្សេងៗ ដោយការប្រើប្រាស់វីសាកាត។ តួលេខនេះ កើនទ្បើងរហូតដល់ 58% បើគណនាលើចំនួនប្រតិបត្តិការ។
ទិន្នន័យនេះ បានមកពីការប្រៀបធៀប លើការចំណាយរវាងឆ្នាំ 2017 ដល់ឆ្នាំ 2018 យោងលើការសិក្សាស្រាវជ្រាវ អំពីឥរិយាបទក្នុងការបង់ប្រាក់ របស់អតិថិជនប្រើប្រាស់វីសាកាត ក្នុងឆ្នាំ 2018 ។ ការសិក្សានេះ បានរកឃើញថា ប្រជាពលរដ្ឋកម្ពុជាប្រហែល 1/3 រំពឹងថា ការទូទាត់ប្រាក់តាមរយៈប្រព័ន្ធឌីជីថល នឹងមានប្រជាប្រិយភាព ដោយសារតែវាមានភាពងាយស្រួល និងសុវត្ថិភាព បើប្រៀបធៀបជាមួយនឹងការប្រើសាច់ប្រាក់សុទ្ធ។ ទន្ទឹមនឹងនោះដែរ ប្រជាជនកម្ពុជា 54% ជឿជាក់ថា សេដ្ឋកិច្ចនឹងរីកចម្រើនវិវត្តទៅ ដោយមិនចាំបាច់ប្រើសាច់ប្រាក់សុទ្ធនៅក្នុងរយៈពេល ៧ ឆ្នាំ ខាងមុខនេះ។
ការសិក្សានេះ ក៏បានរកឃើញផងដែរថា អតិថិជនអ្នកប្រើប្រាស់បានមើលឃើញ និងបានព្យាករថា ការទូទាត់ប្រាក់តាមរយៈអេឡិចត្រូនិក ទំនងជាត្រូវបានប្រើប្រាស់នាពេលអនាគត ក្នុងនោះពួកគេរំពឹងថា ការទូទាត់បែបនេះ នឹងត្រូវបានប្រើប្រាស់នៅតាមបណ្តាផ្សារទំនើប 79% ហើយ 61% នៅក្នុងផ្សារទំនើបធំៗ និង 49% នៅក្នុងហាងទំនិញជាច្រើនទៀត។
អ្នកស្រី ជុំ ម៉ូនីកា នាយិកាគ្រប់គ្រងវីសា ប្រចាំប្រទេសកម្ពុជា បានមានប្រសាសន៍ថា ប្រជាជនកម្ពុជា មានសុទិដ្ឋិនិយមចំពោះវិស័យសេដ្ឋកិច្ច ដោយយោងទៅលើការព្យាករ របស់ធនាគារអភិវឌ្ឍន៍អាស៊ី ថាមានកំណើន GDP 7% នៅឆ្នាំនេះ និង មានការថយចុះក្រោម 7% បន្តិចនៅឆ្នាំក្រោយ។ អ្នកស្រី ជុំ ម៉ូនីកា បន្ថែមថា៖«ដោយសារតែជំហរនៃកំណើនដ៏រឹងមាំនេះ បានធ្វើឲ្យយើងរំពឹងទុកថា ប្រព័ន្ធនៃការទូទាត់ប្រាក់របស់ប្រទេសយើង នឹងរីកចម្រើនយ៉ាងឆាប់រហ័ស។ ចំណែកឯក្រុមហ៊ុនវីសា ក៏មានការរំភើបរីករាយ ក្នុងការធ្វើការជាមួយគ្រឹះស្ថានហិរញ្ញវត្ថុ បណ្តាពាណិជ្ជករ និងអតិថិជនអ្នកប្រើប្រាស់ផ្ទាល់ ដើម្បីធ្វើឱ្យការរំពឹងទុកទាំងនេះ ក្លាយទៅជាការពិត»។
ប្រជាជនកម្ពុជា ក៏កំពុងបង្ហាញពីសន្ទុះនៃការទទួលយកបច្ចេកវិទ្យាទូទាត់ប្រាក់បែបថ្មីនេះផងដែរ ដោយផ្អែកតាមការស្រាវជ្រាវ ដែលបានបង្ហាញថា 24% នៃអ្នកដែលត្រូវបានស្ទង់មតិ ចាប់អារម្មណ៍ទៅលើការទូទាត់តាមរយៈ ទូរស័ព្ទដៃ។ ក្នុងនោះ 1/3 មានចំណាប់អារម្មណ៍ចំពោះការបង់ប្រាក់ ដែលមិនចាំបាច់ប្រើក្រដាសប្រាក់សុទ្ធ។ បើយើងងាកមកនិយាយពីការបង់ប្រាក់តាមរយៈទូរស័ព្ទដៃវិញ ការសិក្សាមួយនេះ ក៏បានរកឃើញដែរថា អតិថិជនចង់ទូទាត់ប្រាក់តាមរយៈទូរស័ព្ទដៃ ទៅលើផលិតផល និងសេវាកម្មឈានមុខមួយចំនួន ទាក់ទងនឹងផ្នែកសុខភាព កីឡា ការទិញលក់រាយ ការកម្សាន្ត និងដំណើរទេសចរណ៍ជាដើម។
មួយភាគបី នៃប្រជាជនកម្ពុជា ក៏បានបង្ហាញអំពីការចាប់អារម្មណ៍ ក្នុងការទូទាត់ប្រាក់ តាមរយៈការស្កេន QR កូដ ដែលជាសេវាកម្មបច្ចេកវិទ្យាថ្មីបំផុត បានបើកដំណើរការ ក្នុងភាពជាដៃគូ ជាមួយធនាគារជាច្រើន ដោយក្រុមហ៊ុន វីសា នៅកម្ពុជា កាលពីចុងឆ្នាំមុន។ មកដល់ពេលនេះ ការទូទាត់ប្រាក់តាមរយៈ QR កូដ ត្រូវបានគេទទួលស្គាល់នៅក្នុងហាងទំនិញជាង 1,326 កន្លែង ដែលចំនួននេះកើនឡើងទ្វេដង បើប្រៀបធៀបជាមួយនឹងចំនួននៃហាងទំនិញ នៅពេលដែលបច្ចេកវិទ្យានេះ ទើបត្រូវបានដាក់ឱ្យដំណើរការ។
(អត្ថបទពាណិជ្ជកម្ម)
Tag:
Red dot Cambodia Co.
Ltd
© រក្សាសិទ្ធិដោយ thmeythmey.com