ជាតិ
ក្រសួងការបរទេសខ្មែរនឹងជួបទូតសិង្ហបុរី រឿងសេចក្តីថ្លែងការណ៍របស់លោក លី សៀនឡុង
ស្ថានទូតសិង្ហបុរីប្រចាំកម្ពុជា
×![]()
សេចក្តីថ្លែងការណ៍ពីរដងរបស់លោកនាយករដ្ឋមន្ត្រីសិង្ហបុរី លី សៀនឡុងដោយប្រើពាក្យថា កងទ័ពវៀតណាមឈ្លានពានកម្ពុជា និងថារបបសាធារណរដ្ឋប្រជាមានិតកម្ពុជាបានមកជំនួសរបបខ្មែរក្រហម មិនបានធ្វើឲ្យរដ្ឋាភិបាលភ្នំពេញនៅស្ងៀមឡើយ។
ក្រសួងការបរទេសកម្ពុជាបានទាក់ទងស្ថានទូតសិង្ហបុរីប្រចាំប្រទេសកម្ពុជាហើយ។ លោក កេត សោផាន់ អ្នកនាំពាក្យក្រសួងការបរទេសកម្ពុជាបានឆ្លើយប្រាប់សារព័ត៌មានថ្មីៗយ៉ាងខ្លីយ៉ាងដូច្នេះថា៖«យើងបានទំនាក់ទំនងគ្នា និងកំណត់ថ្ងៃជួបគ្នាហើយ»។
ស្ថានទូតសិង្ហបុរីនៅរាជធានីភ្នំពេញ មិនបានឆ្លើយតបចំពោះការស្នើសុំអត្ថាធិប្បាយពីសារព័ត៌មានថ្មីៗឡើយ។
ការទាក់ទងពីក្រសួងការបរទេសកម្ពុជាទៅកាន់ស្ថានទូតសិង្ហបុរី ត្រូវបានធ្វើឡើងក្រោយពីលោកនាយករដ្ឋមន្ត្រីសិង្ហបុរីបានអធិប្បាយនៅលើទំព័រហ្វ៊េសប៊ុកផ្ទាល់ខ្លួនកាលពីថ្ងៃទី៣១ឧសភា និយាយអំពីការឈ្លានពានរបស់កងទ័ពវៀតណាមមកលើកម្ពុជា។ តាមពិតលោក លី សៀនឡុង បានយកឱកាសនៃការរំលែកមរណទុក្ខចំពោះអតីតនាយករដ្ឋមន្ត្រីថៃ លោក ព្រេម ទីន ស៊ូឡានុនដា និងបានលើកឡើងពីឥទ្ធិពលរបស់លោក ព្រេម នៅក្នុងអាណត្តិលោកជានាយករដ្ឋមន្ត្រីថៃនៅក្នុងទស្សវត្សរ៍១៩៨០នោះ ដែលធ្វើឲ្យលោក លី សៀនឡុង និយាយអំពីប្រវត្តិសាស្ត្រកម្ពុជានេះ។ លោក លី សៀនឡុង បានសរសេរយ៉ាងដូច្នេះ«ក្នុងអំឡុងពេលដែលលោក ព្រេម ទីនស៊ូឡានុនដា ធ្វើជានាយករដ្ឋមន្ត្រីថៃនោះ វាក៏ជាពេលដែលសមាជិកអាស៊ានទាំង៥នៅពេលនោះ បានប្រឆាំងនឹងការឈ្លានពានរបស់វៀតណាមមកលើកម្ពុជា និងរដ្ឋាភិបាលកម្ពុជា (ពេលនោះ) ដែលមកជំនួសរបបខ្មែរក្រហម»។ លោក លី សៀនឡុង សរសេរបន្តទៀតថា៖«ប្រទេសថៃបានប្រឈមនឹងកងទ័ពវៀតណាមនៅតាមបណ្តោយព្រំដែនរបស់ខ្លួនជាមួយកម្ពុជា។ លោកឧត្តមសេនីយ៍ ព្រេម បានសម្រេចចិត្តយ៉ាងមុតមាំដោយមិនទទួលយកអ្វីដែលកំពុងកើតឡើងនោះ ហើយបានធ្វើការជាមួយដៃគូក្នុងអាស៊ានដើម្បីប្រឆាំងវៀតណាមនៅតាមវេទិកាអន្តរជាតិនានា»។
សេចក្តីថ្លែងការណ៍នេះ បានធ្វើឱ្យតំណាងរាស្ត្រកម្ពុជា លោក ហ៊ុន ម៉ានី បានបញ្ចេញប្រតិកម្មក្នុងនាមផ្ទាល់ខ្លួនប្រឆាំងលោក លី សៀនឡុង។
អត្ថបទទាក់ទង
មិនត្រឹមតែនៅលើទំព័រហ្វេសប៊ុកឡើយ លោក លី សៀនឡុង ក៏បានធ្វើសេចក្តីថ្លែងការណ៍សាធារណៈនៅក្នុងវេទិកាសន្តិសុខតំបន់ Shangri-La នៅសិង្ហបុរីថា វៀតណាមបានឈ្លានពានកម្ពុជាដែរ។
អ្នកនាំពាក្យក្រសួងការបទេសវៀតណាមក៏បានប្រតិកម្មចំពោះការអត្ថាធិប្បាយរបស់លោក លី សៀនឡុង ដូចគ្នាដែរ៕
Tag:
សិង្ហបុរី
វៀតណាម
ប៉ុលពត
© រក្សាសិទ្ធិដោយ thmeythmey.com
