លោក ម៉ាឌុយរ៉ូ ដករដ្ឋមន្ត្រីអគ្គិសនី ក្រោយបរាជ័យដោះស្រាយបញ្ហាដាច់ភ្លើង

អន្តរជាតិ

លោក ម៉ាឌុយរ៉ូ ដករដ្ឋមន្ត្រីអគ្គិសនី ក្រោយបរាជ័យដោះស្រាយបញ្ហាដាច់ភ្លើង

07, Jun 2019 , 9:57 am

រូបភាព

ប្រភពរូបៈ AFP

ដោយ:

ប្រធានាធិបតីវ៉េណេស៊ុយអេឡា លោក នីកូឡាស់ ម៉ាឌុយរ៉ូ បានតែងតាំងរដ្ឋមន្ត្រីក្រសួងអគ្គិសនីថ្មី កាលពីថ្ងៃទី ៦ ខែមិថុនា ដោយជំនួសលោក Igor Gavidia ។ អតីតរដ្ឋមន្ត្រីរូបនេះ ទើបតែត្រូវបានរដ្ឋបាលលោកម៉ាឌុយរ៉ូ ជ្រើសតាំងឲ្យកាន់តំណែងនេះកាលពី២ខែមុន ខណៈប្រទេសវ៉េណេស៊ុយអេឡា បានជួបប្រទះនឹងវិបត្តិដាច់ភ្លើងទ្រង់ទ្រាយធំដែលបានអូសបន្លាយជាច្រើនសប្តាហ៍។

តាមរយៈបណ្តាញសង្គម Twitter មេដឹកនាំសង្គមនិយម លោក នីកូឡាស់ ម៉ាឌុយរ៉ូ បញ្ជាក់ឲ្យដឹងថា លោក Freddy Brito នឹងបន្តការងារស្តារប្រព័ន្ធអគ្គិសនីជាតិឲ្យបានពេញលេញក្នុងនាមជារដ្ឋមន្ត្រីអគ្គិសនី និងប្រធានក្រុមហ៊ុនអគ្គិសនីរដ្ឋ Corpolec ។

មានប្រវត្តិជាវិស្វករអគ្គិសនី លោក Brito ចូលកាន់តំណែងនេះ ជំនួសឲ្យអតីតរដ្ឋមន្ត្រីអគ្គិសនី លោក Igor Gavidia ដែលត្រូវបានតែងតាំងកាលពីថ្ងៃទី១ ខែមេសា ។ កាលនោះ លោក Gavidia មានគោលដៅចម្បងមួយ គឺ ដោះស្រាយបញ្ហាដាច់ភ្លើងឲ្យវិលត្រឡប់ដូចដើមវិញ។ យ៉ាងណាមិញ គេពុំឃើញលទ្ធផលច្រើនឡើយ។

តាមការចុះផ្សាយរបស់ទីភ្នាក់ងារព័ត៌មាន ក្រោយការតែងតាំងតំណែងនេះ លោករដ្ឋមន្ត្រីអគ្គិសនីវ៉េណេស៊ុយអេឡាថ្មី Brito បានប្តេជ្ញាចិត្តបែបនេះថា៖ «យើងនឹងបន្តប្រើប្រាស់ចំណេះដឹងក្នុងគោលដៅដោះស្រាយបញ្ហាដាច់ភ្លើង ដែលកំពុងប៉ះពាល់ដល់ប្រជាជនយើង»។

សូមបញ្ជាក់ថា វ៉េណេស៊ុយអេឡា មានបញ្ហាដាច់ភ្លើងទ្រង់ទ្រោយធំជាប្រវត្តិសាស្ត្រជាលើកដំបូង កាលពីថ្ងៃទី៧ ខែមីនា ដែលបានអូសបន្លាយអស់រយៈ៥ថ្ងៃពេញ។ បញ្ហាដាច់ភ្លើង ដែលមិនទៀងទាត់ និងរប៉េះរប៉ោះនេះ បន្តបង្កផលប៉ះពាល់ដល់ប្រទេស រួមមាន បង្អាក់សកម្មភាពនៃការផ្គត់ផ្គង់ចំណីអាហារ និងទឹក ការដឹកជញ្ជូន និងមន្ទីរពេទ្យជាដើម។ ក្នុងហេតុការណ៍នេះ មានការរាយការណ៍ថា មនុស្សស្លាប់ជាច្រើននាក់ថែមទៀតផង។

ពាក់ព័ន្ធនឹងការបញ្ហាដាច់ភ្លើងនេះ កន្លងទៅ លោក ម៉ាឌុយរ៉ូ បានចោទប្រកាន់លើសហរដ្ឋអាមេរិក និងក្រុមបក្សប្រឆាំងវ៉េណេស៊ុយអេឡាថា នៅពីក្រោយហេតុការណ៍នេះ ទោះបីជាអ្នកជំនាញជាច្រើន អះអាងថា ការជួសជុល និងរក្សាមិនបានល្អ ជាមូលហេតុក៏ដោយក្តី៕