ជាតិ
ផលវិបាកខ្លាំងក្នុងអាស៊ាន ក្រោយសាររបស់លោក លី សៀនឡុង លោក ឈាង វណ្ណារិទ្ធ ប្រធានវិទ្យាស្ថានចក្ខុវិស័យអាស៊ី
× ហេតុអ្វីនាយករដ្ឋមន្ត្រីសិង្ហបុរី លោក លី សៀនឡុង លើកឡើងពីប្រវត្តិសាស្ត្ររបស់កម្ពុជា និងវៀតណាមក្នុងទស្សវត្សរ៍១៩៨០ ឡើងវិញ នៅពេលនេះ? ក្រុមអ្នកតាមដាន និងអ្នកវិភាគនយោបាយតំបន់ក៏មិនជឿដែរថា មេដឹកនាំនៃប្រទេសអភិវឌ្ឍន៍ដូចសិង្ហបុរីមិនបានគិតដល់បច្ច័យអាក្រក់នៃទំនាក់ទំនងការទូតទ្វេភាគីជាមួយវៀតណាម និងកម្ពុជា និងទំនាក់ទំនងក្នុងអាស៊ានផងនោះ ដែលនឹងកើតចេញពីសេចក្តីថ្លែងការណ៍ដោយចេតនារបស់លោកនោះដែរ។
សេចក្តីថ្លែងការណ៍ដែលគ្មាននរណានឹកស្មានដល់របស់នាយករដ្ឋមន្ត្រីសិង្ហបុរី អាចធ្វើឱ្យសិង្ហបុរីខាតបង់ច្រើន។ នេះជាការយល់ឃើញរបស់លោក ឈាង វណ្ណារិទ្ធ ប្រធានវិទ្យាស្ថានចក្ខុវិស័យអាស៊ី (Asian Vision Institute) ដែលចាប់អារម្មណ៍ខ្លាំងទៅលើផលប៉ះពាល់នៃទំនាក់ទំនងការទូតរវាងប្រទេសសមាជិកអាស៊ាន។
លោក ឈាង វណ្ណារិទ្ធ ដែលមើលឃើញថា លោកនាយករដ្ឋមន្ត្រីសិង្ហបុរីបានលើកយកប្រវត្តិសាស្ត្រដែលទាក់ទងនឹងគំនិតជាតិនិយមរបស់កម្ពុជា និងវៀតណាមផង នឹងធ្វើឲ្យភាពតានតឹងកាន់តែធ្ងន់ធ្ងរ។ ប្រធានវិទ្យាស្ថាន AVI បានវាយតម្លៃយ៉ាងដូច្នេះថា៖«អ្វីដែលខ្ញុំព្រួយបារម្ភ គឺលោកនាយករដ្ឋមន្ត្រីសិង្ហបុរីបានបញ្ឆេះចំគំនិតជាតិនិយមនៅខ្មែរ និងវៀតណាម។ វៀតណាមគិតថា គេបានចំណាយជីវិតប្រជាជន និងធនធានរបស់គេ ហើយថាគេឈ្លានពានកម្ពុជា គេទទួលមិនបានទេ។ ពលរដ្ឋកម្ពុជាយើងមានពីរក្រុម គឺ៧មករា ជាថ្ងៃរៀតណាមរំដោះកម្ពុជា និង៧មករាជាថ្ងៃវៀតណាមឈ្លានពានកម្ពុជា។ សាររបស់លោក លី សៀនឡុង ស្មើនឹងការគាំទ្រមតិដែលថា វៀតណាមឈ្លានកម្ពុជា»។
សម្រាប់ លោក ឈាង វណ្ណារិទ្ធ វាមិនមែនជារឿងភ្ញាក់ផ្អើលទេដែលរដ្ឋាភិបាលកម្ពុជាត្រូវប្រតិកម្មទៅសិង្ហបុរី ក្នុងសំណុំរឿងដែលលោកហៅថាស្មុគស្មាញនោះ។ លោក វណ្ណារិទ្ធ ពន្យល់ថា សាររបស់លោក លី សៀនឡុង ធ្វើឲ្យគេដាក់ជាសំណួរចំពោះភាពស្របច្បាប់នៃរដ្ឋ (កម្ពុជា) បច្ចុប្បន្ន ដែលត្រូវបានបង្កើតឡើងក្រោយការដួលរលំនៃរបបខ្មែរក្រហមនោះ។
«ខ្ញុំគិតថា បញ្ហានេះនឹងកាន់តែធំទៅៗ ព្រោះវាមិនមានសញ្ញាណាមួយដែលសិង្ហបុរីធ្វើការកែតម្រូវ។ សិង្ហបុរីមិនដកថយទេ។ ខ្មែរ និងវៀតណាម កាន់តែមិនដកថយ»។ នេះជាការសន្និដ្ឋានរបស់ប្រធានវិទ្យាស្ថានចក្ខុវិស័យអាស៊ី ដែលបារម្ភដល់ភាពរង្គោះរង្គើនៅក្នុងអាស៊ានទៀតផង នៅពេលដែលលោកយល់ឃើញថា រដ្ឋាភិបាលថៃដែលធ្លាប់គាំទ្រចលនារបស់ប៉ុលពត ប្រាកដជាគាំទ្រសាររបស់លោកនាយករដ្ឋមន្ត្រីសិង្ហបុរី។ លោក ឈាង វណ្ណារិទ្ធ អះអាងថា៖«ដូច្នេះអាស៊ានចាស់ និងអាស៊ានថ្មី កាប់ចាក់គ្នាទៀតហើយ។ ហើយភាពទុកចិត្តគ្នាក្នុងវិស័យការទូត រវាងកម្ពុជា វៀតណាម និងសិង្ហបុរី ត្រូវបានបាត់បង់ហើយ»។
បើផលវិបាកនៃការសេចក្តីថ្លែងការណ៍លោក លី សៀនឡុង ធ្ងន់ធ្ងរយ៉ាងនេះ ហើយដែលលោកនាយករដ្ឋមន្ត្រីសិង្ហបុរីខ្លួនឯង ក៏ទំនងជាបានដឹងមុនដែរហើយនោះ តើហេតុអ្វីបានជាលោក លី សៀនឡុង នៅតែថ្លែងសារបែបនេះ? ម្តងនៅលើទំព័រហ្វេសប៊ុករបស់លោក និងម្តងទៀតនៅក្នុងវេទិកាសន្តិសុខតំបន់ Shangri-La នៅក្នុងសិង្ហបុរី?
គ្មានចម្លើយពិតប្រាកដឡើយ។ លោក ឈាង វណ្ណារិទ្ធ គ្រាន់តែមានគំនិតទូលាយសិនក្នុងពេលនេះថា ទំនងជាលោក លី ស៊ានឡុង ចង់យកចិត្តថៃ និងចិនខ្លះ៕
Tag:
លី សៀនឡុង
អាស៊ាន
ឈាង វណ្ណារិទ្ធ
© រក្សាសិទ្ធិដោយ thmeythmey.com