កីឡាអន្តរជាតិ
អន្តរជាតិ
Nations League៖ ហូឡង់ឡើងប៉ះព័រទុយហ្គាល់វគ្គផ្តាច់ព្រ័ត្រ ក្រោយឈ្នះអង់គ្លេស ៣-១
×![]()
ដោយ: ទេព ពិទូរ្យ
ក្រុមកីឡាបាល់ទាត់ជម្រើសជាតិហូឡង់បានកៅអីទៅកាន់វគ្គផ្តាច់ព្រ័ត្រដើម្បីដណ្តើមពានរង្វាន់ UEFA Nations League ជាមួយព័រទុយហ្គាល់ បន្ទាប់ពីពួកគេវាយបកយកឈ្នះអង់គ្លេសដោយលទ្ធផល ៣-១ នាជំនួបវគ្គពាក់កណ្តាលផ្តាច់ព្រ័ត្រនៅថ្ងៃទី៦ ខែមិថុនា។
អត្ថបទទាក់ទង
ខ្សែប្រយុទ្ធ Marcus Rashford រ៉ាប់រងការទាត់បាល់ពិន័យប៉េណាល់ទីនៅនាទី៣២ តង់ទី១ ដើម្បីជួយអង់គ្លេសនាំមុខហូឡង់១គ្រាប់មុន។ ឈានដល់តង់ទី២នាទី៧៣ទៅហើយទើបខ្សែការពារឆ្នើម Matthijs de Ligt ហក់តែតមួយក្បាលយ៉ាងល្អដើម្បីបំប៉ោងសំណេញទីអង់គ្លេសដែលជាគ្រាប់តាមស្មើរបស់ហូឡង់។ ក្រុមទាំងពីបញ្ចប់ការប្រកួតក្នុងម៉ោងផ្លូវការ៩០នាទីដោយលទ្ធផល១-១។
ដ្បិតត្រូវយកលទ្ធផលឈ្នះចាញ់ ក្រុមទាំងពីរត្រូវលេងក្នុងម៉ោងបន្ថែម១៥នាទីពីរដង។ ក្នុងម៉ោងបន្ថែម១៥នាទីដំបូង អង់គ្លេសដែលជាក្រុមមានឱកាសច្រើនក្នុងជំនួបនេះបានភ្លាត់ស្នៀតធ្វើឲ្យបាល់ចូលទីខ្លួនឯងពីសំណាក់ខ្សែការពារ Kyle Walker នៅនាទី៩៧ មុនពេលខ្សែប្រយុទ្ធ Quincy Promes បន្ថែមគ្រាប់បាល់ទី៣ តាមរយៈការបញ្ជូនបាល់យ៉ាងល្អពីមិត្តរួមក្រុម Memphis Depay នៅនាទី១១៤ ក្នុងម៉ោងបន្ថែម១៥នាទីលើកទី២។ ដូច្នេះគិតទាំងម៉ោងផ្លូវការនិងម៉ោងបន្ថែមចំនួន៣០នាទី ហូឡង់បានយកឈ្នះអង់គ្លេស ៣-១ ទទួលបានកៅអីទៅកាន់វគ្គផ្តាច់ព្រ័ត្រជាមួយព័រទុយហ្គាល់ដែលជាម្ចាស់ផ្ទះព្រឹត្តិការណ៍នេះ។
ការប្រកួតវគ្គផ្តាច់ព្រ័ត្រដណ្តើមពាន Nations League នឹងធ្វើឡើងនៅថ្ងៃទី១០ ខែមិនថុនា វេលាម៉ោង ១:៤៥នាទីអាធ្រាត្រ [ម៉ោងនៅកម្ពុជា] ពោលគឺក្រោយមួយថ្ងៃប៉ុណ្ណោះ បន្ទាប់ពីស្វ៊ីសនិងអង់គ្លេសត្រូវប្រកួតដណ្តើមយកលេខ៣ នៅវេលាម៉ោង៨យប់៕
Tag:
បាល់ទាត់
Nations League
© រក្សាសិទ្ធិដោយ thmeythmey.com
