អន្តរជាតិ
ថៃ៖ ការបែងចែកកៅអីរដ្ឋមន្ត្រី ក្លាយជាបញ្ហាសម្រាប់សម្ព័ន្ធភាពគាំទ្រលោក ប្រាយុទ្ធ
×![]()
ដោយ: តន ចាន់រិទ្ធារ៉ា
ក្រោយទទួលបានការផ្ដល់ទំនុកចិត្តពីសភារួចហើយ លោក ប្រាយុទ្ធ ចន្ទអូចា ត្រូវបង្កើតរដ្ឋាភិបាលថ្មីដើម្បីប្រទេស។ ប៉ុន្តែនេះជារឿងលំបាកសម្រាប់លោក ប្រាយុទ្ធ ក៏ដូចជាបក្សកម្លាំងប្រជារាស្ត្រដែលប្រមូលបក្សនយោបាយជិតម្ភៃទៀតឲ្យគាំទ្រលោកបន្តកាន់តំណែងនាយករដ្ឋមន្ត្រីនោះ។ ភាពមិនចុះសម្រុង បានលេចឡើងជាបណ្ដើរៗហើយក្នុងសម្ព័ន្ធភាពកាន់អំណាច ពិសេសការបែងចែកកូតារដ្ឋមន្ត្រីតាមក្រសួងតែម្ដង។
ការផ្ដល់តំណែងក្នុងជួររដ្ឋាភិបាល ជាពាក្យសន្យារបស់បក្សកម្លាំងប្រជារាស្ត្រក្នុងការទាក់ទាញបក្សនយោបាយនានាឲ្យគាំទ្របេក្ខភាពលោក ប្រាយុទ្ធ ចន្ទអូចា ធ្វើជានាយករដ្ឋមន្ត្រី។ ពេលនេះ លោក ប្រាយុទ្ធ ជាប់ឆ្នោតជានាយករដ្ឋមន្ត្រី ដោយមានបក្សធំៗបោះឆ្នោតឲ្យដូចជាបក្សកម្លាំងប្រជារាស្ត្រ បក្សប្រជាធិបតេយ្យ និងបក្សភូមិចៃថៃ។ បក្សកម្លាំងប្រជារាស្ត្រដែលជាមេសម្ព័ន្ធនយោបាយបានសន្យាផ្ដល់តំណែងរដ្ឋមន្ត្រីសំខាន់ៗដល់បក្សប្រជាធិបតេយ្យ និងបក្សភូមិចៃថៃ។
តាមកិច្ចព្រមព្រៀង បក្សប្រជាធិបតេយ្យ នឹងកាន់តំណែងរដ្ឋមន្ត្រីកសិកម្ម ពាណិជ្ជកម្ម និងកសិកម្ម ឯបក្សភូមិចៃថៃវិញ ត្រូវបានរាយការណ៍ថា នឹងទទួលបានក្រសួងសុខាភិបាល ដឹកជញ្ជូន និងទេសចរណ៍។ បក្សទាំងពីរ សុទ្ធតែបានទាមទារតំណែងក្រសួងទាំងនេះ មុននឹងសម្រេចចិត្តចូលរួមជាមួយសម្ព័ន្ធភាពដឹកនាំបក្សកម្លាំងប្រជារាស្ត្រ។ ឯមូលហេតុ គឺដោយសារ បក្សទាំងពីរត្រូវបានការអនុវត្តគោលនយោបាយដែលសន្យាជាមួយប្រជាជនពេលឃោសនារកសំឡេងឆ្នោត។
យ៉ាងណាមិញ ការផ្ដល់តំណែងរដ្ឋមន្ត្រីដល់បក្សផ្សេង ធ្វើសមាជិកបក្សកម្លាំងប្រជារាស្ត្រមិនពេញចិត្តឡើយ ព្រោះបាត់បង់កៅអីសម្រាប់សមាជិកបក្សខ្លួនឯងវិញ ដែលនោះធ្វើឲ្យបក្សមិនអាចអនុវត្តគោលនយោបាយរបស់ខ្លួនបានដែរ។ កន្លងមក មានពាក្យលេចឮថា ថ្នាក់ដឹកនាំបក្សកម្លាំងប្រជារាស្ត្រខ្លះ ចង់ឲ្យបក្សខ្លួនដែលមានសំឡេងក្នុងសភាច្រើនជាងគេក្នុងសម្ព័ន្ធភាព កាន់តំណែងរដ្ឋមន្ត្រីសំខាន់ៗដូចជាដឹកជញ្ជូនជាដើមដែលទទួលបន្ទុកលើគម្រោងហេដ្ឋារចនាសម្ព័ន្ធ។
លោក Somsak Thepsuthin សមាជិកសភាបក្សកម្លាំងប្រជារាស្ត្រមកពីក្រុម Sam Mitr និយាយថា បក្សនេះគួរកាន់កាប់ក្រសួងកសិកម្មដើម្បីងាយស្រួលអនុត្តនយោបាយរបស់ខ្លួន។ យ៉ាងណាមិញ ការដណ្ដើមក្រសួងគ្នាបែបនេះ ទំនងជាបង្កបញ្ហាសម្រាប់អនាគតរដ្ឋាភិបាលចម្រុះរបស់លោក ប្រាយុទ្ធ ដ្បិតបក្សប្រជាធិបតេយ្យ និងបក្សភូមិចៃថៃ អាចដើរចេញពីសម្ព័ន្ធភាពវិញបើការទាមទាររបស់ខ្លួន ត្រូវទាត់ចោលនោះ។ បើរឿងនេះកើតមាន កៅអីនាយករដ្ឋមន្ត្រីរបស់លោក ប្រាយុទ្ធ រង្គើមិនខាន។
បើគិតតាមលទ្ធផលឆ្នោតនៃកិច្ចប្រជុំសភាថ្ងៃទី៥ ខែមិថុនា លោក ប្រាយុទ្ធ មានការគាំទ្រពីសមាជិករដ្ឋសភាចំនួន២៥៤ ហើយបក្សកម្លាំងប្រជារាស្ត្រ បក្សប្រជាធិបតេយ្យ និងបក្សភូមិចៃថៃ ជាកម្លាំងស្នូល។ សំឡេងសមាជិកសភារបស់បក្សប្រជាធិបតេយ្យ និងបក្សភូមិចៃថៃ មានចំនួន១០៣ ដែលអាចប្រើក្នុងការតថ្លៃជាមួយបក្សកម្លាំងប្រជារាស្ត្រដែលសំឡេងចំនួន១១៦ ប៉ុណ្ណោះ។ ដូចនេះ លោក ប្រាយុទ្ធ ត្រូវការកម្លាំងបន្ថែម បើមិនចង់ដឹកនាំរដ្ឋាភិបាលសំឡេងភាគតិចទេនោះ៕
Tag:
ថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
