ជាតិ
នយោបាយជាតិ
លោក សម រង្ស៊ី៖ ពលរដ្ឋខ្មែរ យល់ព្រមឲ្យអឺរ៉ុប ព្យួរ EBA និងត្រៀមលំបាករយៈពេលខ្លី
លោក សម រង្ស៊ី ស្ថិតក្នុងសភាសហភាពអឺរ៉ុបនាពេលកន្លងមក
×![]()
ដោយ: ថ្មីៗ
ស្របពេលគណៈប្រតិភូនៃសហភាពអឺរ៉ុប ចុះមកកម្ពុជា ដោយផ្តោតលើការពិភាក្សាពីប្រព័ន្ធអនុគ្រោះពន្ធ EBA លោក សម រង្ស៊ី មេដឹកនាំក្រុមប្រឆាំង ដែលកំពុងរស់នៅឯក្រៅប្រទេស ក៏បញ្ចេញសារគាំទ្រឲ្យសហភាពអឺរ៉ុប រក្សាជំហរបស់ខ្លួនបានរឹងមាំ ស្តីពីគម្រោងព្យួរ EBA នៅកម្ពុជា។ លោក ចាត់ទុកវិធានការរបស់សហភាពអឺរ៉ុប ថាជាប្រតិកម្មដ៏ត្រឹមត្រូវទៅនឹងការរំកិលទៅរកអំណាចផ្តាច់ការនៅកម្ពុជា។ 
មេដឹកនាំក្រុមប្រឆាំងរូបនេះ បានសរសេរលើទំព័រហ្វេសប៊ុក នៅថ្ងៃទី៦ ខែមិថុនា យ៉ាងដូច្នេះថា «ចំពោះលទ្ធភាពនៃការព្យួរប្រព័ន្ធអនុគ្រោះពន្ធ EBA ប្រជារាស្ត្រខ្មែរ យល់ព្រមនិងត្រៀមខ្លួន ប្រឈមការលំបាកខ្លះថែមទៀតក្នុងរយៈពេលមួយដ៏ខ្លី ពីព្រោះយើង គិតពីអនាគតវែងឆ្ងាយ ហើយយល់ឃើញថា មានតែលទ្ធិប្រជាធិបតេយ្យទេ ដែលអាចធានាអនាគតមួយដ៏រុងរឿងសម្រាប់ខ្លួនយើងនិងកូនចៅយើង។»
លោក សុខ ឥសាន អ្នកនាំពាក្យគណបក្សកាន់អំណាច បានសរសេរក្នុងបណ្តាញទំនាក់ទំនងតេឡេក្រាមថា «នៅពេលបាត់ EBA ពីកម្ពុជា មិនមែនត្រឹមតែកម្ពុជាទេ គឺបណ្តាប្រទេសនៅលើលោក ក៏មានបញ្ហាដែរ ដោយសារសង្គ្រាមពាណិជ្ជកម្មរវាចិននិងអាមេរិក។» លើសពីនេះ លោក ចោទសួរថា «បើរដ្ឋាភិបាលកម្ពុជា រឹតត្បិតសិទ្ធិសេរីភាព ហេតុម្តេចបានជាមានសិទ្ធិនិយាយប្រាប់ក្រុមសហភាពអឺរ៉ុបបាន?»
ក្នុងជំនួបជាមួយគណៈប្រតិភូសហភាពអឺរ៉ុប នាថ្ងៃទី៦ ខែមិថុនា លោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា បានបញ្ជាក់ថា កម្ពុជា នឹងព្យាយាមការពារ EBA មិនឲ្យបាត់បង់ឡើយ។ ប៉ុន្តែ លោករដ្ឋមន្ត្រី សង្កត់ធ្ងន់ថា កម្ពុជា មិនអនុញ្ញាតឲ្យបរទេសយកប្រព័ន្ធអនុគ្រោះពន្ធមួយនេះ មកដាក់សម្ពាធ និងលូកដៃចូលកិច្ចការផ្ទៃក្នុងរបស់កម្ពុជានោះទេ៕
Tag:
សម រង្ស៊ី
EU
EBA
© រក្សាសិទ្ធិដោយ thmeythmey.com
