ជាតិ
នយោបាយជាតិ
អ្នកនាំពាក្យ៖ មន្ត្រី CPP ចាយលុយខ្លួនឯងរៀបចំហូបនំបញ្ចុក មិនមែនបក្សទេ
លោក ឈឹម ផលវរុណ អ្នកនាំពាក្យ CPP (រូបពី CPP)
×![]()
ដោយ: ថ្មីៗ
លោក ឈឹម ផលវរុណ អ្នកនាំពាក្យម្នាក់របស់គណបក្សកាន់អំណាច ប្រាប់សារព័ត៌មានថ្មីៗថា មន្ត្រីនីមួយៗ ជាអ្នកចំណាយថវិកាផ្ទាល់ខ្លួន ក្នុងការរៀបចំហូបនំបញ្ចុកជាមួយប្រជាពលរដ្ឋតាមមូលដ្ឋាន នៅថ្ងៃទី៩មិថុនា។ លោក បញ្ជាក់ថា «មិនមែនជាការចំណាយរបស់បក្សទេ»។ 
អ្នកនាំពាក្យគណបក្សកាន់អំណាច បន្តថា ព្រឹត្តិការណ៍ហូបនំបញ្ចុកនេះ នឹងត្រូវរៀបចំជាទូទៅ និងគ្រប់ទីកន្លែង មិនមែនគណបក្ស រដ្ឋាភិបាល រៀបចំឡើយ ដូច្នេះ មន្ត្រី និងប្រជាពលរដ្ឋតាមមូលដ្ឋាន ជាអ្នករៀបចំខ្លួនឯង។ លោក និយាយដូច្នេះ «គណបក្ស អត់មានកំម៉ង់នំបញ្ចុកទុកទេ អ្នកណាចង់ហូប រៀបចំហូបទៅ»។
សម្តេចនាយករដ្ឋមន្ត្រី ហ៊ុន សែន សន្និដ្ឋានថា នំបញ្ចុករាប់ពាន់តោន នឹងត្រូវបញ្ចេញ នៅថ្ងៃទី៩ ខែមិថុនា ព្រោះថ្ងៃនោះ គឺប្រជាពលរដ្ឋទូទាំងប្រទេស ចូលរួមហូបនំបញ្ចុក ដើម្បីបង្ហាញពីសាមគ្គីជាតិ។
យ៉ាងណា សម្តេនាយករដ្ឋមន្ត្រី បានតឿនប្រជាពលរដ្ឋ ឲ្យប្រុងប្រយ័ត្ន ដោយខ្លាចពុលនំបញ្ចុក ព្រោះកន្លងមក ធ្លាប់មានករណីនេះកើតឡើង។ សម្តេចនាយក ជំរុញឲ្យប្រជាពលរដ្ឋតាមមូលដ្ឋាន ធ្វើនំបញ្ចុកដោយខ្លួនឯង ជាជាងទិញពីគេ ដើម្បីធានាអនាម័យ។
លើសពីនេះ ប្រមុខរដ្ឋាភិបាល ប្រាប់មន្ត្រីរាជការ និង មន្ត្រីគណបក្សកាន់អំណាចរបស់ខ្លួន កុំឲ្យប្រកាន់ឬរើសអើងអ្នកគាំទ្រគណបក្សអ្នកទៃ។ ប្រមុខរដ្ឋាភិបាល និយាយបែបនេះថា «បើគេ ចង់មកហូបជាមួយយើង យើងឲ្យគេមកហូបជាមួយទៅ ហើយបើគេ ហៅយើង យើងទៅហូបជាមួយគេដែរទៅ»៕
Tag:
ឈឹម ផលវរុណ
នំបញ្ចុក
© រក្សាសិទ្ធិដោយ thmeythmey.com
