យុវតីចិនម្នាក់ មានបញ្ហាផ្នែករំលាយអាហារ សង្ស័យមកពីគ្រាប់តែគុជ

អន្តរជាតិ

យុវតីចិនម្នាក់ មានបញ្ហាផ្នែករំលាយអាហារ សង្ស័យមកពីគ្រាប់តែគុជ

08, Jun 2019 , 9:59 am

រូបភាព

ដោយ:

វា អាចជាសារដាស់តឿនមួយសម្រាប់អ្នកញៀនពិសាភេសជ្ជៈប្រភេទ «តែគុជ» ។ យុវតីជនជាតិចិន អាយុ ១៤ឆ្នាំម្នាក់ ក្នុងប្រទេសចិន ត្រូវបានគេបញ្ជូនទៅមន្ទីរពេទ្យ ក្រោយពីរូបនាង មានបញ្ហាក្នុងការរំលាយចំណីអាហារអស់រយៈពេល៥ថ្ងៃ។ មូលហេតុ ត្រូវបានគ្រូពេទ្យសង្ស័យថា មកពីរូបនាងបរិភោគតែគុជ ។

យុវតីម្នាក់នោះ រស់នៅក្នុងខេត្ត Zhejiang នៃប្រទេសចិន។ នាង បានត្អូញត្អែរពីបញ្ហារំលាយអាហារ ដោយ អះអាងថា នាងពុំអាចបរិភោគអាហារ និងមានការឈឺចាប់នៅត្រង់ពោះ។ យោងតាមប្រភពព័ត៌មានក្នុងស្រុកចិន ចុងក្រោយ ឳពុកម្តាយរបស់យុវតី ដែលគេពុំបានបញ្ជាក់ឈ្មោះនេះ បានសម្រេចបញ្ជូននាងទៅកាន់មន្ទីរពេទ្យដើម្បីពិនិត្យ និងព្យាបាល កាលពីថ្ងៃទី ២៨ ខែឧសភាកន្លងទៅ។

ដោយហេតុថា ពុំអាចស្វែងរកមូលហេតុ ដែលបង្កបញ្ហារំលាយអាហាររបស់នាង ក្រុមគ្រូពេទ្យ បានប្រើប្រាស់ប្រព័ន្ធកុំព្យូទ័រ CT ដើម្បីស្កេនលើរាងកាយនាង ជាពិសេស ត្រង់ពោះតែម្តង។ ក្រោយពីស្កេនរួចរាល់ គ្រូពេទ្យ បានរកឃើញថា ស្រមាលខ្មៅ ដែលមានរាងស្រួចមិនប្រក្រតីជាច្រើន នៅក្នុងពោះរបស់នាង។

តាមប្រភពដដែល គ្រូពេទ្យ បានទាញសេចក្តីសន្និដ្ឋានថា ស្រមាលខ្មៅ គឺជាគ្រាប់តែគុជយ៉ាងរឹង ដែលពុំអាចរំលាយបាន។ ហើយចំនួននៃគ្រាប់គុជនេះ មានប្រហែលជា១០០គ្រាប់ឯណោះ។ ជុំវិញការរកឃើញបែបនេះ យុវតីចិនរូបនេះ បានសារភាពថា រូបនាង បានផឹកតែគុជ ត្រឹមតែមួយកែវប៉ុណ្ណោះ មុននឹងកើតហេតុការណ៍នេះ។

យ៉ាងណាមិញ វេជ្ជបណ្ឌិតចិនម្នាក់ ឈ្មោះថា Zhang Louzhen ដែលជាអ្នកព្យាបាលរូបនាង សង្ស័យថា នាងប្រហែលជាព្យាយាមលាក់បាំងពីការពិត ព្រោះខ្លាចទទួលរងពិន័យពីឳពុកម្តាយរបស់នាង។ លោកវេជ្ជបណ្ឌិតរូបនេះ បន្ថែមថា សម្រាប់ស្ថានភាពរបស់នាងនាពេលបច្ចុប្បន្ននេះ យុវតីរូបនេះ ធ្លាប់បានផឹកភេសជ្ជៈប្រភេទតែគុជនេះ អស់រយៈពេលជាយូរមកហើយ៕