អន្តរជាតិ
តើថាមពលកម្តៅផែនដីជាអ្វី? ហើយគេអាចបំលែងវាទៅជាអគ្គិសនីបានដោយរបៀបណា? រូបភាព៖SIRIUS ENERGY
× ពេលដែលពិភពលោកកំពុងតែមានតម្រូវការថាមពលដើម្បីទ្រទ្រង់ការរស់នៅរបស់ប្រជាជន រោងចក្រផលិតថាមពលនានាកំពុងតែព្យាយាមទាញយកថាមពល និងអគ្គីសនីទាំងនោះចេញមកពីប្រភពនានាកាន់តែខ្លាំង។
ប្រភពទាំងនោះមានដូចជា ឥន្ធនៈផូស៊ីល មានដូចជាប្រេង ធ្យូង និងឧស្ម័ន ថាមពលពន្លឺព្រះអាទិត្យ ថាមពលខ្យល់ ថាមពលវារីអគ្គីសនី ថាមពលនុយក្លេអែរជាដើម។ ក្នុងនោះ នៅមានប្រភពថាមពលមួយប្រភេទទៀត ដែលមនុស្សភាគច្រើនមិនទាន់បានស្គាល់ ឬយល់ច្បាស់អំពីដំណើរការវានៅឡើយទេ។ នោះគឺ «ថាមពលកម្តៅផែនដី»។ តើវាជាអ្វី? ហើយវាដំណើរការដូចម្តេច?
ទូរទស្សន៍ National Geographic បាននិយាយថា ថាមពលកម្តៅផែនដី ជាថាមពលកម្តៅដែលផែនដីផលិតនៅស្រទាប់ខាងក្រោមជ្រៅ។ ពេលខ្លះវាអាចមានវត្តមាននៅតាមទីជម្រៅរាក់ តែពេលខ្លះវាមានវត្តមាននៅក្នុងជម្រៅច្រើនពាន់ម៉ែត្រចុះទៅខាងក្រោម។ ថាមពលនេះត្រូវបានមនុស្សទាញយកមកប្រើប្រាស់អស់ជាច្រើនពាន់ឆ្នាំមកហើយ តែមិនមែនក្នុងគោលបំណងផលិតអគ្គីសនីនោះទេ។
កាលពីសម័យបុរាណគេប្រើប្រាស់វាសម្រាប់ងូតសម្អាតខ្លួន សម្រាកលំហែកាយ ឬចម្អិនអាហារជាដើម។ អាងទឹកក្តៅធម្មជាតិតាមព្រៃភ្នំ ដែលមាននៅតាមប្រទេសត្រជាក់ៗ ដូចជានៅតាមប្រទេសមួយចំនួនក្នុងទ្វីបអឺរ៉ុប ឬប្រទេសជប៉ុន ភាគច្រើនមានភាពល្បីល្បាញសម្រាប់ទេសចរ សុទ្ធសឹងតែជាលទ្ធផលនៃថាមពលកម្តៅផែនដី។ តំបន់ទេសចរណ៍ តេរទឹកពុះ ស្ថិតនៅខេត្តកំពង់ស្ពឺក៏ជាឧទាហរណ៍ល្អមួយដែរ។
ប៉ុន្តែអ្នកជំនាញអាចទាញយកថាមពលកម្តៅនោះ ដោយបំលែងវាទៅជាថាមពលអគ្គីសនីបាន។ ក្នុងការទាញយក រោងចក្រឧស្សាហកម្មថាមពលនោះត្រូវជីកទៅក្រោមក្នុងជម្រៅជិត២០០០ ម៉ែត្រ។ ក្រោយមក គេនឹងបុកបំពង់នៅតាមទីតាំងណាមួយដែលសម្បូរទឹកនៅខាងក្រោម។ ជាធម្មតា វត្តមានទឹកដែលមាននៅខាងក្រោមនោះត្រូវបានបង្កើនសីតុណ្ណភាពដោយថាមពលកម្តៅផែនដីរហូតទៅដល់ចំណុចរំពុះ ក្លាយទៅជាចំហាយទឹក។ តែដោយសារតែវាមិនមានផ្លូវដើម្បីធ្វើដំណើរចេញមកខាងលើ ចំហាយទឹកទាំងនោះនៅតែបន្តនៅខាងក្រោមដីដដែល។ ប៉ុន្តែ នៅពេលដែលបំពង់អណ្តូងបានជីកទៅដល់ ចំហាយទឹកក្តៅទាំងនោះនឹងបុកឡើងមកលើក្នុងល្បឿនលឿន លាយឡំជាមួយនឹងសម្ពាធខ្ពស់ ប៉ះទង្គិចជាមួយនឹងតួប៊ីននៅខាងក្នុងរោងចក្រ។ នៅពេលដែលតួប៊ីនចាប់ផ្តើមមានចលនា ថាមពលម៉ាញេទិចត្រូវបានផលិតឡើង ដើម្បីផលិតថាមពលអគ្គីសនី។ រោងចក្រថាមពលកម្តៅផែនដីដំបូងគេត្រូវបានគេសាងសង់ឡើងនៅតំបន់ Larderello ប្រទេសអ៊ីតាលី ក្នុងឆ្នាំ១៩០៤។
ប្រទេសជាង២០នៅក្នុងពិភពលោកកំពុងប្រើប្រាស់ប្រភពថាមពលនេះ។ ចំណែកអាមេរិកគឺជាប្រទេសដែលផលិតអគ្គីសនីបានច្រើនជាងគេពីប្រភពថាមពលមួយនេះ។ គុណសម្បត្តិរបស់វាគឺនៅត្រង់ថា ថាមពលនេះអាចផលិតអគ្គីសនីបានគ្រប់ពេលវេលា។ ដោយឡែក ថាមពលខ្យល់អាចកាត់បន្ថយនៅពេលដែលមិនសូវមានខ្យល់បក ឯថាមពលពន្លឺព្រះអាទិត្យមិនអាចផលិតអគ្គីសនីបានល្អនោះទេ នៅពេលដែលមេឃស្រទំមិនសូវក្តៅ។ វាក៏ប្រើប្រាស់ថវិកាតិចក្នុងការសាងសង់ និងស្រួលមើលថែទាំផងដែរ។ តែវាមានគុណវិបត្តិមួយ គឺ នៅពេលដែលចំហាយទឹកចេញមកខាងក្រៅ វាលាយឡំនឹងឧស្ម័នដទៃទៀតដូចជា អ៊ីដ្រូសែនស៊ុលផាត ដែលអាចបង្កផលប៉ះពាល់ដល់មនុស្សដែរ៕
Tag:
កម្តៅផែនដី
ថាមពល
© រក្សាសិទ្ធិដោយ thmeythmey.com