ជាតិ
សង្គមជាតិ
អ្នកលក់នំបញ្ចុក៖ ប៉ុន្មានថ្ងៃនេះ មានភ្ញៀវទិញនំបញ្ចុកច្រើនខុសពីធម្មតា
× ភ្នំពេញ៖ ពលរដ្ឋដែលប្រកបមុខរបរលក់នំបញ្ចុក មានក្តីរីករាយដែលមានភ្ញៀវចូលទិញច្រើន ក្នុងរយៈពេលប៉ុន្មានថ្ងៃចុងក្រោយនេះ។ មិនថាលក់នំបញ្ចុកតាមផ្សារ តាមកន្លែងកម្សាន្ត និងអ្នកលក់បញ្ចុកដាក់រទះ ឬដើរលក់តាមផ្លូវនានានោះទេ ពួកគេ បានលើកឡើងថា នំបញ្ចុកលក់ដាច់ច្រើនជាងរាល់ដង ហើយពេលខ្លះលក់មិនទាន់អ្នកទិញផង។
អ្នកស្រី អ៊ី បូរ ជាអ្នកលក់នំកញ្ចុក នៅទល់មុខវត្តបទុមវតី ក្នុងខណ្ឌដូនពេញ រាជធានីភ្នំពេញ បាននិយាយថា ក្នុងរយៈពេលជិតមួយសប្តាហ៍ចុងក្រោយនេះ មានភ្ញៀវចូលទិញច្រើន មិនថាទិញហូបនៅកន្លែង និងខ្ចប់ទេ ដោយក្នុងមួយថ្ងៃ អ្នកស្រី អាចលក់នំបញ្ចុកបានរហូត៤០គីឡូក្រាម បើធៀបនឹងកន្លងមកលក់នំបញ្ចុកបានត្រឹម៣០គីឡូក្រាមក្នុងមួយថ្ងៃ។ ទឹកសម្លដែលអ្នកស្រីធ្វើលក់ជាមួយនំបញ្ចុកមានសម្លប្រហើរ សម្លការី និងសម្លណាំយ៉ា ជាមួយតម្លៃ៦០០០ទៅ៧០០០រៀលក្នុងមួយចាន។ តម្លៃនំបញ្ចុកគឺអាស្រ័យទៅលើប្រភេទទឹកសម្លនីមួយៗ។
ស្រី្តវ័យជាង៦០ឆ្នាំរូបនេះ ក្រៅពីធ្វើទឹកសម្លផ្សេងៗ ដើម្បីលក់ជាមួយនំបញ្ចុកជាប្រចាំថ្ងៃ អ្នកស្រី អ៊ី បូរ ដែលប្រកបមុខរបរជាអ្នកលក់នំបញ្ចុកជិត៣០ឆ្នាំមកហើយនោះ ក៏ទទួលធ្វើសម្លការីសម្រាប់នំបញ្ចុកគីឡូក្រាម ដែលចៅសង្កាត់ចតុមុខ រកឱ្យជួយធ្វើសម្រាប់ឱ្យប្រជាពលរដ្ឋបរិភោគ នៅថ្ងៃទី៩ មិថុនានេះ។ ស្រី្តវ័យជាង៦០ឆ្នាំរូបនេះ និយាយដូច្នេះថា៖«សម្រាប់ថ្ងៃទី៩មិថុនា ខ្ញុំ ក៏ចូលរួមដែរ។ ខ្ញុំឱ្យកូន ក្មួយ បង ប្អូន ពលរដ្ឋយើងបិរភោគ គឺមិនគិតប្រាក់ចំនួន១០០ចានផងដែរ»។
ការចូលរួមនេះ គឺដើម្បីជួយលើកកម្ពស់នំកញ្ចុកខ្មែរ និងដើម្បីចូលរួមក្នុងទិវាហូបនំបញ្ចុករួមគ្នាទូទាំងប្រទេសផងដែរ។ នេះជាការលើកឡើងរបស់អ្នកស្រី អ៊ី បូរ។ បើតាមអ្នកស្រី ក្រោយការប្រកាសរបស់សម្តេចនាយករដ្ឋមន្ត្រី ហ៊ុន សែន ឲ្យប្រជាពលរដ្ឋទូទៅ ចូលរួមហូបនំបញ្ចុកនៅថ្ងៃទី៩មិថុនា មានភ្ញៀវចូលមកហូមច្រើនតែម្តង។ «ជាធម្មតានំបញ្ចុករបស់ខ្ញុំចាប់ផ្តើមលក់នៅម៉ោង១០ព្រឹករហូត ដល់៩ឬ១០យប់ ប៉ុន្តែថ្ងៃនេះខ្ញុំលក់អស់ និងបិទហាង នៅម៉ោង៦ល្ងាច»។
ជាមួយគ្នានេះ ទីតាំងលក់នំបញ្ចុកដែលនៅក្បែរហាងនំបញ្ចុក អ្នកស្រី អ៊ី បូរ ក៏លក់ដាច់ច្រើនជាងធម្មតាផងដែរ។ អ្នកស្រី នួន ប៉ុក ជាម្ចាស់ហាងលក់នំបញ្ចុកនេះ បាននិយាយថា៖« ២-៣ថ្ងៃនេះ នំបញ្ចុកលក់ដាច់ច្រើន មានភ្ញៀវប្រុស-ស្រីប្លែក យុវជន សិស្សសាលានាំគ្នាមកជាក្រុមៗចូលហូប ប៉ុន្តែមិនសូវមានការកំម៉ង់ខ្ចប់ទៅខាងក្រៅទេ។ ខ្ញុំអាចលក់នំបញ្ចុកអស់៣០គីឡូក្រាមក្នុងមួយថ្ងៃក្នុងរយៈពេលប៉ុន្មានថ្ងៃនេះ ដែលពីមុខខ្ញុំលក់នំបញ្ចុកបានត្រឹម១៥ទៅ២០គីឡូក្រាមក្នុងមួយថ្ងៃ។ ខ្ញុំលក់នំបញ្ចុកដាច់ប៉ុន្មានថ្ងៃនេះ ដូចលក់ដាច់នៅថ្ងៃដែលមានបុណ្យទានជាតិធំៗអ៊ីចឹង»។
អ្នកលក់ម្នាក់ទៀត នៅផ្សាររាត្រីទួលទំពូង គឺអ្នកស្រី ជុំ ពៅ ក៏អះអាងថា អ្នកស្រី លក់ដាច់ខុសពីធម្មដែរ។ អ្នកស្រី មានប្រសាសន៍ថា «ប៉ុនា្មនថ្ងៃនេះ ខ្ញុំលក់នំបញ្ជុកដាច់ខ្លាំង មានភ្ញៀវចូលទិញហូបច្រើនទាំងនៅហូបនៅកន្លែង និងខ្ចប់យកទៅហូបនៅកន្លែងផ្សេងៗ»។
អ្នកស្រី លក់នំបញ្ចុកអស់ជាង២០គីឡូក្នុងមួយយប់ ដែលសមល្មមជាមួយទឹកប្រហើរខ្មែរ និងសម្លការី ដែលធ្វើលក់ជាប្រចាំ។ អ្នកស្រីបាននិយាយដូច្នេះ៖«មែនទែនទៅក្រោយសម្តេច មានប្រសាសន៍ គឺមានភ្ញៀវច្រើនមកទិញតែម្តង។ លក់មិនសល់ឬចោលដូចមុនៗទេ។ និយាយអ៊ីចឹងមិនមានន័យថាពេលមុនៗលក់មិនដាច់ ឬមិនអស់នោះទេ គឺលក់ដាច់ដែរ គ្រាន់តែប្រើពេលវេលាយូរប៉ុណ្ណោះ។ ពីមុខនំបញ្ចុក យើងលក់អស់នៅម៉ោង១០-១០យប់ តែឥឡូវយើងលក់ត្រឹមម៉ោង៨-៩យប់ គឺអស់ហើយ។ បើមានទឹកសម្ល បន្តលក់គឺលក់ដាច់ទៀត ព្រោះមានគេសួររកទិញច្រើនណាស់»។
សម្តេច ហ៊ុន សែន និង លោក សម រង្ស៊ី ជាអ្នកបំផុសបំផុល ឲ្យប្រជាពលរដ្ឋចូលរួមពិសានំបញ្ចុកនៅថ្ងៃទី៩មិថុនា។ ប្រមុខរដ្ឋាភិបាល ចាត់ទុកព្រឹត្តិការណ៍នេះ ថាជាការលើកតម្កើងនិងជំរុញការទិញផលិតផលក្នុងស្រុក ហើយក៏អាចបង្ហាញពីសាមគ្គីនិងឯកភាពជាតិផងដែរ៕
© រក្សាសិទ្ធិដោយ thmeythmey.com