ជាតិ
RUPP និងវិទ្យាស្ថានវ៉ាន់ដា រៀបចំកម្មវិធីបរិភោគនំបញ្ចុក តាមការអំពាវនាវរបស់ប្រមុខរដ្ឋាភិបាល រូបភាពពីហ្វេសប៊ុកវិទ្យាស្ថានវ៉ាន់ដាគណេន្យ
× សាកលវិទ្យាល័យភូមិន្ទភ្នំពេញ (RUPP) និង វិទ្យាស្ថានវ៉ាន់ដា រៀបចំកម្មវិធីហូបនំបញ្ចុកនៅថ្ងៃទី៩មិថុនានេះ ក្រោយពីសម្ដេច ហ៊ុន សែន ប្រកាសឲ្យយកថ្ងៃនេះ បរិភោគនំបញ្ចុក ដើម្បីសាមគ្គីភាព និងឯកភាពជាតិ។
លោក ជេត ជាលី សាកលវិទ្យាធិកានៃសាកលវិទ្យាល័យភូមិន្ទភ្នំពេញ បានអះអាងថា ការរៀបចំកម្មវិធីបរិភោគជុំគ្នានេះ គឺមិនមែនជានិន្នាការនយោបាយអ្វីនោះទេ ។ប៉ុន្តែវាជាការកាត់បន្ថយការចំណាយប្រចាំឆ្នាំ សម្រាប់ការជួបជុំរវាងនិស្សិត និងសាស្ត្រាចារ្យរបស់សាលា ស្របតាមការអំពាវនាវរបស់សម្ដេចនាយករដ្ឋមន្ត្រី ហ៊ុន សែន ប៉ុណ្ណោះ។ បើតាមលោក ជេត ជាលី លោកគ្រូ-អ្នកគ្រូ និស្សិត និងអ្នកចូលរួមទាំងអស់ អាចនាំគ្នាពិសារនំបញ្ចុកដោយរីករាយ ដោយមិនគិតពីបក្សនយោបាយណាមួយឡើយ ។
សាកលវិទ្យាធិកានៃសាកលវិទ្យាល័យភូមិន្ទភ្នំពេញ បានប្រាប់សារព័ត៌មានថ្មីៗ(Thmey Thmey)តាមទូរស័ព្ទថា៖ «ការរៀបចំនេះ មិនពាក់ព័ន្ធនឹងនយោបាយទេ ហើយដូចសម្ដេចបានលើកឡើងថា ការបរិភោគនំបញ្ចុកនេះ គឺជាការសាមគី្គភាព។ រាល់ឆ្នាំសាលាតែងមានកម្មវិធីជួបគ្នា គ្រាន់តែឆ្នាំមុនដុតគោ ឆ្នាំនេះនំបញ្ចុក ដោយឆ្នាំមុនអស់លុយច្រើនពេក។ ហើយសម្ដេចបានលើឡើងក្នុងពិធីចែកសញ្ញាបត្រដល់និស្សិតសាកលវិទ្យាល័យភ្នំពេញពីការហូបនំបញ្ចុក ហើយខ្ញុំនិងគ្នារបស់ខ្ញុំជាច្រើនក្នុងក្រុមបានសម្រេចធ្វើអ៊ីចឹងទៅ។ ក្រុមការងារនៅសាកលវិទ្យាល័យទាំងអស់មានអ្នកនិន្នាការបក្សនយោបាយច្រើន ហើយគ្រប់គ្នាអាចចូលរួមបានទាំងអស់។»
លោក ជេត ជាលី ថាមិនទាន់ដឹងថា មានអ្នកចូលប៉ុន្មាននាក់ ក្នុងកម្មវិធីបរិភោគនំបញ្ចុកនេះទេ ។ ជុំវិញការរៀបចំកម្មវិធីនេះ ថវិកាខាងសាលានិងអ្នកចូលរួមជាអ្នករៀបចំធ្វើឡើង។
ចំណែកវិទ្យាស្ថាន វ៉ាន់ដា ក៏បានរៀបចំកម្មវិធីជួបជុំបរិភោគនំបញ្ចុកនេះដែរ។ នៅលើទំព័រហ្វេសប៊ុក Vanda Institute of Accounting បានសរសេរដូច្នេះថា «ទិវានំបញ្ចុកសាមគ្គី និងបង្រួបបង្រួមជាតិ។ តោះតោះ មកញាំនំបញ្ចុកទាំងអស់គ្នា នៅថ្ងៃអាទិត្យ ទី៩ ខែមីថុនា ឆ្នាំ ២០១៩ នៅលំហែរសិក្សា នាម៉ោង ៨ព្រឹក»។
អ្នកទទួលបន្ទុកលើផ្នែករៀបចំនៃវិទ្យស្ថានវ៉ាន់ដា បានប្រាប់សារព័ត៌មានថ្មីៗតាមទូរស័ព្ទថា អ្នកចូលរួមគឺបុគ្គលិកប្រមាណ៣០០នាក់ នៃចំនួននំបញ្ចុកប្រហែល៥០គីឡូ៕
Tag:
RUPP
វ៉ាន់ដា
នំបញ្ចុក
© រក្សាសិទ្ធិដោយ thmeythmey.com