អន្តរជាតិ
ហ្វីលីពីន ទាត់ចោលសំណើស៊ើបអង្កេតលើបញ្ហាសិទ្ធិមនុស្សរបស់ក្រុមសិទ្ធិមនុស្ស sUN
×![]()
រដ្ឋាភិបាលក្រុងម៉ានីល បានបដិសេធលើសំណើបើកការស៊ើបអង្កេតរបស់អ្នកជំនាញអង្គការសហប្រជាជាតិលើស្ថានភាពសិទ្ធិមនុស្សហ្វីលីពីន ដែលកំពុងតែដឹកនាំដោយលោកប្រធានាធិបតី រ៉ូឌ្រីហ្គោ ឌូទើតេ។ សម្រាប់ក្រុងម៉ានីល សកម្មភាពបែបនេះ គឺជាការជ្រៀតជ្រែកកិច្ចការផ្ទៃក្នុងរបស់រដ្ឋអាស៊ានតែម្តង ។
អ្នកជំនាញសិទ្ធិមនុស្សអង្គការសហប្រជាជាតិ នៅថ្ងៃ៧ មិថុនា បានស្នើក្រុមប្រឹក្សាសិទ្ធិមនុស្សដើម្បីពិនិត្យមើលស្ថានភាពសិទ្ធិមនុស្សរបស់ហ្វីលីពីន ជាពិសេសនោះលើករណីនៃការសម្លាប់ដោយខុសច្បាប់ និងក្រៅប្រព័ន្ធតុលាការ តាមរយៈយុទ្ធនាការបោសសម្អាតគ្រឿងញៀន ឬសង្គ្រាមគ្រឿងញៀន ដែលជនរងគ្រោះក៏មានរាប់បញ្ចូលទាំងអ្នកការពារសិទ្ធិមនុស្សផងនោះ ។ នេះបើយោងតាមភ្នាក់ងារព័ត៌មាន AFP។
សំណើរបស់អ្នកជំនាញសិទ្ធិមនុស្ស ធ្វើឡើងបន្ទាប់ពីមានរបាយការណ៍បានអះអាងថា តាមរយៈយុទ្ធនាការបោសសម្អាតនេះ ប៉ូលិស បានសម្លាប់ជនសង្ស័យជួញដូរ និងប្រើប្រាស់គ្រឿងញៀនរហូតដល់ ៥៣០០នាក់ ត្រឹមតែរយៈពេលបីឆ្នាំប៉ុណ្ណោះ ខណៈចំណាត់ការនេះ ក៏នៅតែបន្តអនុវត្ត រហូតដល់ចប់អាណត្តិរបស់លោកប្រធានាធិបតីតែម្តង។
យ៉ាងណាក៏ដោយ តាមអ្នកនាំពាក្យរបស់ហ្វីលីពីន លោក Salvador Panelo បានចាត់ទុកសំណើរបស់ក្រុមអ្នកជំនាញសិទ្ធិមន្សរបស់អង្គការសហប្រជាជាតិ ដែលមានសមាសភាពរហូតដល់១១នាក់នោះ គឺជាការប្រឈម និងជ្រៀតជ្រែកកិច្ចការផ្ទៃក្នុង និងអធិបតេយ្យរបស់ហ្វីលីពីនយ៉ាងធ្ងន់ធ្ងរ។ អ្នកនាំពាក្យរូបនេះ ថែមទាំងចោទក្រុមអ្នកជំនាញថា លម្អៀង ហើយប្រឆាំងនឹងអាជ្ញាធរស្របច្បាប់។
អ្នកនាំពាក្យ ថែមទាំងបានទាញលទ្ធផលនៃការបោះឆ្នោតពាក់កណ្តាលអាណត្តិរបស់ហ្វីលីពីនកាលពីពេលថ្មីជាមួយនឹងករណីគ្រឿងញៀននេះយ៉ាងដូច្នេះថា៖«បេក្ខជន ដែលឈរឈ្មោះតំណាងក្នុងបោះឆ្នោត និងមានជំហរប្រឆាំងយុទ្ធនាការបោសសម្អាតគ្រឿងញៀនរបស់លោកប្រធានាធិបតី មិនត្រូវបានប្រជាពលរដ្ឋបោះឆ្នោតឲ្យឡើយ»។ ពោលគឺ ប្រជាជនភាគច្រើន បានគាំទ្រគោលនយោបាយនេះ។
គួរជម្រាបបន្តិចថា នេះ មិនមែនជាលើកដំបូងឡើយ ដែលហ្វីលីពីន បដិសេធការប៉ុនប៉ងបើកស៊ើបអង្កេតលើស្ថានភាពសិទ្ធិមនុស្ស។ ដោយសារតែបញ្ហានេះ មេដឹកនាំហ្វីលីពីនលោក ឌូទើតេ ថែមទាំងដើរចេញពីតុលាការព្រហ្មទណ្ឌអន្តរជាតិ ដែលហ្វីលីពីន បានក្លាយជាសមាជិកតាំងពីឆ្នាំ២០១១មក ក្រោយតុលាការ ប្រកាសបើកស៊ើបអង្កេតវាយតម្លៃស្ថានភាពសិទ្ធិមនុស្សហ្វីលីពីន ដើម្បីឈានដល់ការកាត់ទោសអ្នកទទួលខុសត្រូវពីក្រោយ៕
Tag:
ហ្វីលីពីន
អាស៊ាន
© រក្សាសិទ្ធិដោយ thmeythmey.com
