ជាតិ
វីដេអូ
×![]()
ភ្នំពេញ៖ ជាកម្មករស្ដារលូក្នុងរាជធានីភ្នំពេញ តាំងពីឆ្នាំ១៩៩១មក លោក ប៉ិច ណន បានស្នើសុំឲ្យប្រជាពលរដ្ឋឈប់បោះសំរាមចូលលូបន្តទៀត ដោយចេះទុកដាក់សំរាមឲ្យបានត្រឹមត្រូវ។ បុរសដែលស្ដារលូជិត៣០ឆ្នាំរូបនេះ អះអាងថា សំរាមនៅតែមានក្នុងលូ ដោយសារការចោលសំរាមរបស់ប្រជាពលរដ្ឋ។ ជារៀងរាល់ថ្ងៃ លោក ណន តែងតែចុះស្ដារលូនៅតាមគោលដៅនានាក្នុងរាជធានីភ្នំពេញ ចាប់ពីម៉ោង ៨ព្រឹក ដល់ម៉ោង៤ល្ងាច។
នៅពេលធ្វើដំណើរឆ្លងកាត់ទីតាំងដែលមានសំរាម និងលូទឹកស្អុយ មនុស្សភាគច្រើនតែងតែខ្ទប់ច្រមុះ ដោយសារតែមិនអាចទ្រាំនឹងក្លិនស្អុយ។ សម្រាប់ លោក ប៉ិច ណន ដែលជាកម្មករស្ដារលូជិត ៣០ឆ្នាំនេះ តែងតែនៅជាមួយក្លិនស្អុយ និងកាក់សំណល់កខ្វក់ជារៀងរាល់ថ្ងៃ។ ក្នុងបទសម្ភាសជាមួយសារព័ត៌មានថ្មីៗ លោក ប៉ិច ណន បញ្ជាក់យ៉ាងដូច្នេះ៖ « នេះជាឆន្ទៈរបស់ខ្ញុំ។ ធ្វើការយូរឆ្នាំទៅស៊ាំនឹងការងារនេះ ហើយចាត់ទុកជាការងារធម្មតា»។
សូមអញ្ជើញទស្សនាបទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មាន ThmeyThmey ជាមួយលោក ប៉ិច ណន កម្មករស្ដារលូក្នុងរាជធានីភ្នំពេញដូចតទៅ៖
រដូវដែលលោក ប៉ិច ណន រវល់ជាងគេ គឺរដូវវស្សា ដោយសារតែភ្លៀងធ្លាក់ធ្វើឲ្យជន់លិចក្នុងរាជធានី ដូច្នេះលោកត្រូវតែចុះទៅស្ដារលូ ទោះយប់ឬថ្ងៃក៏ដោយ។ បើតាមបុរសវ័យ៦១ឆ្នាំរូបនេះ ទឹកលូ ដែលលោកតែងតែចុះស្ដារ មានពេលខ្លះត្រឹមចង្កេះ និង ខ្លះទៀត ត្រឹមដើមទ្រូងក៏មាន។ ទោះបីលោក ប៉ិច ណន មានបទពិសោធច្រើនលើការងារស្ដារលូនេះក៏ដោយ ក៏លោកនៅតែជួបនឹងបញ្ហាផងដែរ។ បញ្ហានោះ គឺបញ្ហាមុតអំបែងកែវ ឡាម និងដែក ដែលគេបោះចូលក្នុងលូ។ លោក ប៉ិច ណន ប្រាប់ថា៖ «ពេលខ្លះ ក៏មានអារម្មណ៍ខឹងនឹងអ្នកចោលសំរាមចូលក្នុងលូ ប៉ុន្តែមិនដឹងធ្វើម៉េច មានតែខំប្រឹងធ្វើទៅ»៕
បើសិនលោកអ្នកចង់ជួយលោក ប៉ិច ណន សូមទាក់ទងតាមលេខទូរសព្ទនេះ ០៩៦ ៨៣ ៤៩ ១០៤
បើសិនលោកអ្នកចង់ជួយលោក ប៉ិច ណន សូមទាក់ទងតាមលេខទូរសព្ទនេះ ០៩៦ ៨៣ ៤៩ ១០៤
Tag:
កម្មករ
ស្ដារលូ
សំរាម
© រក្សាសិទ្ធិដោយ thmeythmey.com
