អន្តរជាតិ
នាយករដ្ឋមន្ត្រីឡាវ៖ ឡាវ មិនព្រួយបារម្ភរឿងបំណុលចិនឡើយ ព្រោះរដ្ឋមានសមត្ថភាពសងក្នុងរយៈពេលវែង
× រដ្ឋាភិបាលក្រុងវៀងចន្ទន៍ បានទាត់ចោលការព្រមានរបស់អង្គការអន្តរជាតិមួយចំនួន ដែលថា ឡាវ អាចធ្លាក់ទៅក្នុងអន្ទាក់នៃបំណុល ខណៈកម្រិតកម្ចីអភិវឌ្ឍឡាវពីចិន កាន់តែកើនឡើង។ សម្រាប់ក្រុងវៀងចន្ទន៍ កម្ចីដែលបានធ្វើកន្លងមក ឈរលើគោលការណ៍នៃសមត្ថភាពរបស់ប្រទេស និងលក្ខខណ្ឌអនុគ្រោះពីដៃគូ ដែលមិនអាចធ្វើឲ្យឡាវ ត្រូវក្លាយជាជនរងគ្រោះឡើយ។
តាមរយៈកិច្ចសម្ភាសន៍ជាមួយនឹងសារព័ត៌មានជប៉ុន Nikkei កាលពីពេលថ្មីៗនេះ លោកនាយករដ្ឋមន្ត្រីឡាវ ថុងលួន ស៊ីសូលីត បានឲ្យដឹងថា កម្ចីរបស់ឡាវពីចិន និងបណ្តាប្រទេសដៃគូដទៃផ្សេងទៀត គឺសម្រាប់តែគម្រោងដែលលក្ខណៈសំខាន់ ចាំបាច់ និងមានផលប្រយោជន៍សម្រាប់សេដ្ឋកិច្ចរបស់ប្រទេសប៉ុណ្ណោះនោះទេ។
ខណៈមិនទទួលយកការព្រមានពីការវ័ណ្ឌកដោយសារតែបំណុលបរទេស ជាពិសេសជាមួយចិនលើគម្រោងហេដ្ឋារចនាសម្ព័ន្ធ លោកនាយករដ្ឋមន្ត្រី ស៊ីសូលីត បានគូសបញ្ជាក់ថា ប្រសិនបើ ឡាវ ដែលជាប្រទេសមានការអភិវឌ្ឍតិចតួចមួយរបស់ពិភពលោក មិនខ្ចីបរទេសទេ ប្រទេសក៏នឹងមិនមានការអភិវឌ្ឍអ្វីដែរ។
ប្រមុខដឹកនាំរូបនេះ បានបន្ថែមថា ឡាវ មានខ្នាតរង្វាស់ និងយុទ្ធសាស្ត្រដើម្បីគ្រប់គ្រង និងធានាពីតុល្យភាពនៅក្នុងបំណុលសាធារណៈខ្លួនឯង ហើយឡាវ តែងតែប្រកាន់ខ្ជាប់ជានិច្ចនូវការអនុវត្តគម្រោងដែលជាកម្ចីរយៈពេលវែង ដែលមានអត្រាការប្រាក់តិច។
លោកនាយករដ្ឋមន្ត្រី លើកឡើងថា ក្រុមអ្នកតាមដានដែលតែងបង្ហាញការព្រួយបារម្ភហួសហេតុរឿងបំណុល ប្រហែលជាគ្មានព័ត៌មានគ្រប់គ្រាន់លើការវាយតម្លៃពីសមត្ថភាពរដ្ឋាភិបាលទើបបានជាចេញជាសេចក្តីថ្លែងការណ៍បែបនេះ។
គួរជម្រាបថា ឡាវ គឺជារដ្ឋដែលគ្មានព្រំដែនជាប់នឹងសមុទ្រសមុទ្រសូម្បីតែបន្តិច។ កត្តាអកុសលនេះ ជំរុញឲ្យឡាវ ត្រូវប្រឹងប្រែងតភ្ជាប់ខ្លួនជាមួយនឹងបណ្តាប្រទេសជិតខាង និងប្រទេសដៃគូ តាមរយៈហេដ្ឋារចនាសម្ព័ន្ធដែនគោកវិញ។ ចំណុចនេះហើយ ដែលធ្វើឲ្យអង្គការ ឬក្រុមអ្នកតាមដានមួយចំនួនព្រួយបារម្ភ ព្រោះគម្រោងអភិវឌ្ឍឡាវ ត្រូវធ្វើឡើងជាមួយនឹងកម្ចីច្រើនពីប្រទេសដៃគូ ជាពិសេសចិនតែម្តង។
ជាក់ស្តែងក្នុងគម្រោងផ្លូវរថភ្លើងចម្ងាយឆ្ងាយ និងល្បឿនលឿនរបស់ប្រទេស ដែលឡាវ កំពុងតែធ្វើឡើងជាមួយនឹងចិន ឡាវ មានចំណែករបស់ខ្លួនឯងត្រឹមតែ៣០ភាគរយ ខណៈចំណែកសេសសល់ជាផ្នែក និងកម្ចីរបស់ចិន៕
© រក្សាសិទ្ធិដោយ thmeythmey.com