ជាតិ
ក្រសួងការងារ ហាមមិនឲ្យយកក្មេងចូលបរិវេណឬចូលធ្វើការក្នុងសិប្បកម្មឥដ្ឋ រូបភាពពីទំព័រហ្វេសប៊ុកសិប្បកម្មផលិតឥដ្ឋ
× ក្រសួងការងារ ហាមដាច់ខាតមិនឲ្យម្ចាស់សិប្បកម្ម នាំក្មេងចូលក្នុងបរិវេណឬឲ្យក្មេងចូលធ្វើការក្រោមទម្រង់នៃការកេងប្រវ័ញ្ចពលកម្មលើកុមារ ក្នុងសិប្បកម្មផលិតឥដ្ឋ។ នេះបើតាមសេចក្ដីណែនាំរបស់ក្រសួងការងារ ដែលចេញនៅថ្ងៃទី៥ ខែមិថុនា ឆ្នាំ២០១៩។
រដ្ឋមន្ត្រីក្រសួងការងារ លោក អ៊ិត សំហេង បានចេញសេចក្តីណែនាំដល់ប្រធានមន្ទីររាជធានីខេត្ត និងម្ចាស់សិប្បកម្មផលិតឥដ្ឋទាំងអស់ ឲ្យអនុវត្តតាមការណែនាំរបស់ក្រសួង គឺត្រូវរៀបចំដាក់ស្លាកសញ្ញាធំៗ និងងាយមើលឃើញ សម្រាប់ហាមក្មេងចូលទៅក្នុងបរិវេណសិប្បកម្មផលិតឥដ្ឋ និងហាមដាច់ខាតការប្រើប្រាស់ទាសភាពបំណុល ដើម្បីដាក់បន្ទុកសេរីភាពការងារកម្មករ។
លើសពីនេះ ប្រធានមន្ទីរាជធានី ខេត្ត ត្រូវមានអ្នកឃ្លាំមើលជាប្រចាំ និងហាមក្មេងចូលបរិវេណឬធ្វើការក្នុងសិប្បកម្មផលិតឥដ្ឋ។ ក្រសួង ព្រមានដូច្នេះថា «ជនណានាំក្មេងចូលក្នុងបរិវេណសិប្បកម្មផលិតឥដ្ឋឬការប្រើប្រាស់ពលកម្មកុមារនៅសិប្បកម្មផលិតឥដ្ឋ អាចប្រឈមនឹងបទល្មើសព្រហ្មទណ្ឌ»។
ក្រៅពីនេះ ម្ចាស់សិប្បកម្ម ត្រូវរៀបចំកន្លែងស្នាក់នៅឲ្យឃ្លាតឆ្ងាយពីខ្សែចង្វាក់ផលិតកម្ម និងត្រូវមានរបងការងារសុវត្ថិភាព ដែលខណ្ឌចែកបរិវេណខ្សែចង្វាក់ផលិតកម្ម និងកន្លែងស្នាក់នៅ ជាពិសេស គឺហាមឃាត់ដាច់ខាតរាល់ទម្រង់នៃការកេងប្រវ័ញ្ចពលកម្មលើកុមារ និងការបង្ខំឲ្យកុមារធ្វើការ ដើម្បីដោះបំណុល។
តាមការបញ្ជាក់របស់ក្រសួងការងារ ការសម្រេចធ្វើបែបនេះ គឺដើម្បីបញ្ចៀសឧបទ្ទវហេតុដែលអាចកើតចំពោះក្មេងក្នុងសិប្បកម្មផលិតឥដ្ឋ។ សម្រាប់ម្ចាស់សិប្បកម្មណាមួយ មិនអនុវត្តឬខកខានតាមការណែនាំនេះ នឹងត្រូវទទួលនូវការផាកពិន័យ ឬអាចឈានដល់បិទអាជីវកម្ម និងបទល្មើសព្រហ្មទណ្ឌ៕
© រក្សាសិទ្ធិដោយ thmeythmey.com