អន្តរជាតិ
ឥណ្ឌូណេស៊ី ត្រៀមកម្ទេចទូកនេសាទខុសច្បាប់ភាគច្រើនមកពីវៀតណាម និងចិន៣០គ្រឿងទៀត រដ្ឋមន្ត្រីកិច្ចការសមុទ្រនិងនេសាទលោកស្រី Susi Pudjiastuti (Netralnews)
× រដ្ឋាភិបាលក្រុងហ្សាការតា បន្តអនុវត្តគោលនយោបាយម៉ឺងម៉ាត់ និងគ្មានប្រណីទៅលើទូកនេសាទបរទេសទាំងឡាយណា ដែលចូលក្នុងដែនសមុទ្ររបស់ខ្លួនដោយខុសច្បាប់។ ជាក់ស្តែងតាមផែនការក្នុងខែនេះ ក្រុងហ្សាការតា នឹងបន្តកម្ទេចទូកនេសាទប្រមាណ ៣០ គ្រឿងបន្ថែម។
រដ្ឋមន្ត្រីទទួលបន្ទុកកិច្ចការដែនសមុទ្រ និងនេសាទឥណ្ឌូណេស៊ី លោកស្រី Susi Pudjiastuti នៅថ្ងៃ៦មិថុនាកន្លងទៅ បានឲ្យដឹងថា នៅក្នុងខែនេះ លោកស្រី នឹងដឹកនាំពន្លិចទូកនេសាទខុសច្បាប់៣០គ្រឿងបន្ថែមទៀត ដែលទូកនេសាទភាគច្រើនមកពីវៀតណាម និងចិន។ នេះបើយោងតាមការចុះផ្សាយរបស់សារព័ត៌មាន Jakarta Post។
ប្រភពព័ត៌មានដដែល លោកស្រីរដ្ឋមន្ត្រី បានអះអាងថា ទូកនេសាទដែលឥណ្ឌូណេស៊ី បានរឹបអូសនោះមកពីភូមិសាស្ត្រផ្សេងៗគ្នា ដែលចូលទៅនេសាទដោយគ្មានការអនុញ្ញាតពីអាជ្ញាធរ។ លោកស្រី បន្ថែមថា ចំណាត់ការនេះ ធ្វើឡើងក្រោយពីតុលាការ ក៏បានចេញសម្រេចផ្លូវការក្នុងការចោទប្រកាន់ពីសកម្មភាពខុសច្បាប់នេះរួចហើយដែរ។
បើតាមរបាយការណ៍របស់ក្រសួងកិច្ចការដែនសមុទ្រ និងជលផលឥណ្ឌូណេស៊ី គិតចាប់ពីខែមករា ឆ្នាំ២០១៩ នេះ ឥណ្ឌូណេស៊ីបានរឹបអូស និងពន្លិចទូកនេសាទបរទេសចំនួន៣២គ្រឿងមកហើយ ក្នុងនោះមកពីវៀតណាម មាន ១៥ គ្រឿង, ម៉ាឡេស៊ី ១៤ គ្រឿង និងមកពីហ្វីលីពីន មាន៣គ្រឿង។
ឥណ្ឌូណេស៊ី បានរឹបអូស និងកម្ទេចទូកនេសាទបរទេសខុសច្បាប់ ស្ទើរតែរៀងរាល់ខែទៅហើយ ខណៈដែលតួលេខសម្រាប់អាណត្តិទីមួយរបស់លោកប្រធានាធិបតីចូកូ វីដូដូ ឥណ្ឌូណេស៊ី បានកម្ទេចទូកនេសាទបរទេស ដែលភាគច្រើនមកពីវៀតណាម និងចិន រហូតដល់ជាង៥០០គ្រឿងទៅហើយនោះ។
ចំណាត់ការនេះ ក៏មានការរិះគន់ខ្លះពីក្រុមអ្នកតាមដានគោលនយោបាយ ដោយចាត់ទុកថា ការកម្ទេចទូកនេសាទបែបនេះ គឺជាគោលនយោបាយឃោរឃៅមួយ។ ក៏ប៉ុន្តែក្រុងហ្សាការតា នៅតែប្រកាន់ខ្ជាប់ និងប្រកាសអនុវត្តមិនដកថយ ដ្បិតកន្លងមក ដោយសារតែការលួចចូលនេសាទរបស់ទូកនេសាទបរទេស ធ្វើឲ្យឥណ្ឌូណេស៊ី បាត់បង់ចំណូលជាច្រើនលានដុល្លាររួចទៅហើយ៕
© រក្សាសិទ្ធិដោយ thmeythmey.com