កីឡាអន្តរជាតិ
អន្តរជាតិ
ករណីរំលោភ៖ មេធាវីនឹងដកបណ្តឹងវិញ បើនារីដែលប្តឹង Neymar គ្មានភស្តុតាងបន្ថែម
× មេធាវីថ្មីរបស់ស្ត្រីម្នាក់ដែលប្តឹងផ្តល់រឿងអាស្រូវក្នុងបទរំលោភប្រឆាំងនឹងកីឡាករ Neymar កំពុងពិចារណាដកពាក្យបណ្តឹងវិញ ប្រសិនបើកូនក្តីខ្លួនមិនផ្តល់ភស្តុតាងបន្ថែមទៀតទេនោះ។ នេះបើតាមសេចក្តីរាយការណ៍របស់គេហទំព័រពត៌មានប្រេស៊ីល G1 នៅថ្ងៃទី១០ ខែមិថុនានេះ។
លោកមេធាវី Danilo Garcia Andrade បានចូលរួមក្នុងបណ្តឹងរបស់នាង Najila Trindade Mendes de Souza កាលពីដើមសប្ដាហ៍កន្លងទៅ។ លោកចង់ឃើញខ្លឹមសារក្នុងឃ្លីបវីដេអូទី២ដែលមានរយៈពេល៧ នាទីដែលថតអំឡុងពេលការជួបគ្នារវាងតារាម៉ូឌែលរូបនេះជាមួយខ្សែប្រយុទ្ធ Paris Saint-Germain នៅឯសណ្ឋាគារមួយក្នុងក្រុងប៉ារីស ប្រទេសបារាំង។
នាង Najila Trindade បានបង្ហោះឃ្លីបវីដេអូដំបូងរបស់នាងដែលមានរយៈពេលជាងមួយនាទីលើបណ្តាញសង្គមរួចមកហើយ រួមទាំងភស្តុតាងជាក់ស្តែងមួយចំនួនទៀតផង។ វីដេអូ និងភស្តុតាងទាំងនោះគឺនាងធ្លាប់បានផ្តល់ទៅឲ្យប៉ូលីសប្រេស៊ីលកាលពីថ្ងៃទី៧ ខែមិថុនារួចមកហើយដែរ។
បើតាមខ្សែវីដេអូដំបូងដែលនាង Najila Trindade បានបង្ហោះនោះ មើលទៅហាក់ដូចជាមិនមានឥទ្ធិពលអ្វីទៅលើ Neymar នោះទេ ដ្បិតមិនបានបង្ហាញពីសកម្មភាពរំលោភណាមួយឡើយ ផ្ទុយទៅវិញគឺភាគីខាងស្រីទេដែលផ្តួលខ្លួលទៅលើភាគីប្រុសនិងព្រមទាំងមានហិង្សាទៅខាងប្រុសមុនទៀត។
យ៉ាងណាក៏ដោយបើយោងទៅតាម G1 តារាម៉ូឌែលសញ្ជាតិប្រេស៊ីលរូបនេះអះអាងទៀតថានាងមានភស្តុតាងជាវីដេអូផ្សេងទៀតដែលកំពុងរក្សាទុកនៅកន្លែងសុវត្ថិភាព។ លោក Garcia Andrade គឺចង់បានវីដេអូទីពីរនេះពីកូនក្តីរបស់លោក ប៉ុន្តែបើមិនមានទេលោកនឹងដកពាក្យបណ្តឹងនេះពីតុលាការវិញ។
លោកមេធាវីមុនដែលត្រូវជំនួសដោយលោក Andrade បានឈប់កាន់ករណីរបស់ Najila ក៏ដោយសាតែនាងបានផ្លាស់ប្តូរពាក្យបណ្តឹងពីបទរំលោភសេពសន្ថវៈ ទៅជាបទប្រើហិង្សាលើរាងកាយទៅវិញ៕
© រក្សាសិទ្ធិដោយ thmeythmey.com