លោក យី វាសនា អគ្គលេខាធិការនៃគណៈកម្មាធិការជាតិប៉ារ៉ាឡាំពិកកម្ពុជា(CPCC)រំពឹងថា ក្រុមបាល់ទះអង្គុយជនពិការកម្ពុជានឹងដណ្តើមបានកៅអីទៅចូលរួមព្រឹត្តិការណ៍ប៉ារ៉ាឡាំពិកនៅទីក្រុងតូក្យូប្រទេសជប៉ុន ពីការប្រកួតជើងឯកអាស៊ីប្រចាំតំបន់អូសេអានី ដែលរៀបចំនៅទីក្រុងបាងកកប្រទេសថៃ។ ជាមួយការជំរុញឲ្យកីឡាករប្រឹងប្រែងប្រកួតអស់ពីសមត្ថភាព លោកក្រើនរំលឹកឲ្យចេះសាមគ្គីគ្នា ស្តាប់គ្រូបង្វឹក និងប្រធានក្រុម ពិសេសកុំប្រព្រឹត្តអំពើ ដែលនាំឲ្យប៉ះពាល់កិត្តិយសជាតិ។
ក្រោយខកខានឱកាសក្នុងការប្រជែងកៅអីប៉ារ៉ាឡាំពិកនៅប្រទេសកូរ៉េម្តងកាលពីឆ្នាំ២០១៧ ក្រុមបាល់ទះអង្គុយជនពិការកម្ពុជាបានទៅប្រជែងដណ្តើមកៅអី Paralympic នៅទីក្រុងតូក្យូប្រទេសជប៉ុននាឆ្នាំ២០២០ សាជាថ្មី ក្នុងព្រឹត្តិការណ៍ប្រកួតជើងឯកអាស៊ីអូសេអានី ដែលរៀបចំនៅទីក្រុងបាងកកប្រទេសថៃ ចន្លោះពីថ្ងៃទី១០-១៦ ខែមិថុនា។ វានឹងក្លាយជាប្រវត្តិសាស្ត្រសម្រាប់វិស័យកីឡាជនពិការ ក៏ដូចជាកម្ពុជាទាំងមូល បើក្រុមកីឡាករបាល់ទះជនពិការអាចឈ្នះកៅអីពេញសិទ្ធិមែននោះ។ ខណៈកន្លងមកកម្ពុជាបានចូលរួមព្រឹត្តិការណ៍នេះ តាមរយៈសិទ្ធិអនុគ្រោះតែប៉ុណ្ណោះ។
កៅអីពេញសិទ្ធិទៅចូលរួមព្រឹត្តិការណ៍ប៉ារ៉ាឡាំពិកឆ្នាំ២០២០ នឹងអាចកើតមានសម្រាប់កម្ពុជា បើក្រុមកីឡាករបាល់ទះអង្គុយជនពិការអាចដណ្តើមបានមេដាយមាសពីការប្រកួតជើងឯកអាស៊ីប្រចាំតំបន់អូសេអានីនេះ។ កម្ពុជា ត្រូវប្រកួតបើកឆាកជាមួយក្រុមអ៊ីរ៉ង់នៅថ្ងៃទី១០ មិថុនានេះ មុនបន្តជួបក្រុមកាហ្សាក់ស្ថាន ជប៉ុន ចិន កូរ៉េ និងម្ចាស់ផ្ទះថៃ។
អគ្គលេខាធិការនៃគណៈកម្មាធិការជាតិប៉ារ៉ាឡាំពិកកម្ពុជាលោក យី វាសនា ដែលអះអាងថា ក្រុមកីឡាករបាល់ទះអង្គុយជនពិការកម្ពុជាបានហ្វឹកហាត់ពង្រឹងត្រៀមអស់រយៈពេល៤ខែ រំពឹងថា កម្ពុជានឹងទទួលបានលទ្ធផលល្អពីការប្រកួតនេះ។ ជាមួយគ្នានេះលោកជំរុញឲ្យកីឡាករត្រូវប្រឹងប្រែងប្រកួតឲ្យអស់ពីសមត្ថភាព ចេះសាមគ្គីគ្នា និងស្តាប់គ្រូបង្វឹក និងប្រធានក្រុម។
លោក យី វាសនា បានបន្ថែមថា៖«ខ្ញុំបានព្យាយាមជាមួយកីឡាជនពិការនេះ យូរណាស់មកហើយ ប៉ុន្តែយើងនៅមិនទាន់រកបានកៅអីទៅប្រកួតជើងឯកពិភពលោក និងប៉ារ៉ាឡាំពិកពេញសិទ្ធនៅឡើយទេ គឺយើងទៅចូលរួមតាមរយៈសិទ្ធអនុគ្រោះប៉ុណ្ណោះ។ យើងត្រូវតែក្លាហានឡើង ដើម្បីដណ្តើមកិត្តិយសមកស្រុកយើងវិញ។ ខ្ញុំសង្ឃឹមថា បងប្អូននឹងដណ្តើមបានកៅអី និងមេដាយជូនប្រទេសជាតិពីការប្រកួតជើងឯកអាស៊ីអូសេអានីនេះ»។
ជាមួយគ្នានេះ លោក យឹម វណ្ណា ដែលជាគ្រូបង្វឹកបានអះអាងថា តាមរយៈការបរាជ័យកន្លងមកនៅប្រទេសកូរ៉េ លោកបានកែប្រែចំណុចខ្សោយមួយចំនួន និងបានបញ្ជ្រាបបន្ថែមនូវបច្ចេកទេសថ្មីៗ។ «តាមបទពិសោធ ពេលទៅប្រកួតនៅកូរ៉េ គឺយើងបានផ្លាស់ប្តូរបច្ចេកទេសទាំងអស់ ដោយយើងបានបង្កើនទៅលើកម្លាំងកាយ តាក់ទិច និងបច្ចេកទេសល្អប្រសើរជាងមុន ហេតុនេះយើងនឹងប្រឹងប្រែងដណ្តើមយកកិត្តិយសជូនជាតិឲ្យបាន»។ នេះជាការលើកឡើងរបស់លោក យឹម វណ្ណា។
កីឡាករកម្ពុជាទាំង១០រូប កីឡាករ អ៊ូ ផល្លា, កៅ ហឿន, អ៊ីង ភីរៀម, តង់ រ៉ាវី, សាំង វាសនា, ម៉ន យ៉ារ៉ាញ់, ញូញ សុខ, ពូន ឌីណា, យ៉ុម ក្រឹម និង អឿន ណុត។ ក្រុមកីឡាបាល់ទះជនពិការកម្ពុជាដឹកនាំដោយលោក ប៉ឹង សារ៉េត (ប្រធានប្រតិភូ) លោក ស្រៀ ចន្ថា (អនុប្រធានប្រតិភូ) លោក យឹម វណ្ណា និងលោក យ៉ុង សុខុម (គ្រូជំនួយ)។ កីឡាករទាំងអស់ទទួលបានប្រាក់ហៅប៉ាវម្នាក់ៗ២០០ដុល្លារពីក្រសួងអប់រំ យុវជននិងកីឡា៕
ក្រុមកីឡាករបាល់ទះអង្គុយជនពិការកម្ពុជាហ្វឹកហាត់នៅថៃ, រូបភាពពី CPCC