អន្តរជាតិ
នាយករដ្ឋមន្ត្រី មហាធៀ ប្រាប់មន្ត្រីរាជការឲ្យចេះទន់ភ្លន់ដាក់ពលរដ្ឋ លោក មហាធៀ មហាម៉ាត់ នាយករដ្ឋមន្ត្រីម៉ាឡេស៊ី (ប្រភពរូប៖ Bernama )
× នាយករដ្ឋមន្ត្រីម៉ាឡេស៊ី លោក មហាធៀ មហាម៉ាត់ បានលើកឡើងថា មន្ត្រីរាជការ ត្រូវតែអាចគ្រប់គ្រងអារម្មណ៍របស់ពួកគេ នៅពេលដោះស្រាយជាមួយប្រជាពលរដ្ឋ។ មេដឹកនាំរូប បញ្ជាក់បែបនេះថា ភ្នាក់ងាររដ្ឋាភិបាលគ្រប់កម្រិតថ្នាក់ទាំងអស់់ ត្រូវតែផ្តល់សេវាសាធារណៈ ដែលមានប្រសិទ្ធភាព និងល្អបំផុតដល់ប្រជាជន។
ថ្លែងនៅមុខមន្ត្រីរាជការរាប់រយនាក់ក្នុងកម្មវិធីមួយ នៅថ្ងៃចន្ទទី១០ ខែមិថុនា លោក មហាធៀ និយាយបែបនេះថា៖ «ការបម្រើប្រជាជនក្នុងនាមជាមន្ត្រីរាជការ គឺជាកាតព្វកិច្ចដ៏ខ្ពង់ខ្ពស់បំផុតមួយ ក៏ដូចជាទំនួលខុសត្រូវរបស់មន្ត្រីរបស់រដ្ឋាភិបាលផងដែរ»។ មេដឹកនាំចាស់វស្សារូបនេះ បន្ថែមទៀតថា ភាពជោគជ័យរបស់អង្គភាពរដ្ឋាភិបាល គឺអាស្រ័យលើការគ្រប់គ្រងដ៏មានប្រសិទ្ធភាពរបស់មន្ត្រីរាជការ។
យោងតាមការចុះផ្សាយរបស់សារព័ត៌មាន Bernama លោកនាយករដ្ឋមន្ត្រី មហាធៀ អះអាងទៀតថា រដ្ឋាភិបាល ក៏កំពុងធ្វើកាយ៉ាងសកម្ម ដើម្បីប្រយុទ្ធប្រឆាំងនឹងអំពើពុករលួយ ពង្រឹងករណីយកិច្ច និងធានាឲ្យបាននូវអភិបាលកិច្ចល្អ ក៏ដូចជាបូរណភាពក្នុងចំណោមរចនាសម្ព័ន្ធមុខងារសាធារណៈផងដែរ។
ក្រៅពីនេះ លោក មហាធៀ ដែលមានវ័យ ៩៣ឆ្នាំ ក៏បានដាស់តឿនមន្ត្រីរាជការម៉ាឡេស៊ីបន្ថែមទៀតថា ពួកគេ ត្រូវហ៊ានអនុវត្តតួនាទីដោយអព្យាក្រឹត និងកុំជាប់ចំណងតែជាមួយនឹងគណបក្សកាន់អំណាចពេក។ យ៉ាងណាមិញ លោក មហាធៀ បែរជានិយាយបកវិញថា មន្ត្រី ក៏ត្រូវតែដឹងដែរថា ពួកគេ មានកាតព្វកិច្ចគោរពតាមសកម្មភាព និងគោលនយោបាយរបស់រដ្ឋាភិបាល ដែលដឹកនាំដោយបក្សកាន់អំណាច ដើម្បីធានាឲ្យបានថា ការដឹកនាំប្រទេសប្រព្រឹត្តទៅដោយរលូន។
តាម Bernama លោក មហាធៀ ក៏ប្រាប់ឲ្យមន្ត្រីរាជការ ត្រូវមានចំណេះដឹង និងជំនាញដើម្បីត្រៀមលក្ខណៈចូលប្រឡូកក្នុងបដិវត្តន៍ឧស្សាហកម្មដំណាក់កាលទីបួន (IR 4.0) ។ ត្រង់ចំណុចនេះ លោក សង្កត់ធ្ងន់ថា នេះជារឿងសំខាន់បំផុត ព្រោះថា ប្រទេសកំពុងប្រឈមមុខនឹង បដិវត្តន៍ឧស្សាហកម្ម 4.0 ដែលរាប់បញ្ចូល បច្ចេកវិទ្យាស្វ័យប្រវត្តិ រួមមាន Big Data, System Integration និង Cloud ជាដើម។ លោក ថា ឧស្សាហកម្ម 4.0 នេះ នឹងក្លាយជាកាតាលីករសម្រាប់កែប្រែមុខមាត់ប្រព័ន្ធរដ្ឋបាលម៉ាឡេស៊ីឲ្យកាន់តែប្រសើរ៕
Tag:
ម៉ាឡេស៊ី
មហាធៀមហាម៉ាត់
© រក្សាសិទ្ធិដោយ thmeythmey.com