អន្តរជាតិ
ប្រភពរូប៖ AFP
×![]()
តម្លៃផ្លែស្វាយនៅហ្វីលីពីន បានធ្លាក់ថ្លៃយ៉ាងគំហុក ខណៈប្រទេសនេះ ប្រឈមមុខនឹងការផ្គត់ផ្គង់ផ្លែស្វាយលើសតម្រូវការដល់ទៅ ២២០៤តោន។ ទាក់ទិននឹងរឿងនេះ អាជ្ញាធរហ្វីលីពីន បានព្រមានថា ផ្លែស្វាយស្រស់ទាំងនេះ នឹងក្លាយជាស្អុយរលួយ ប្រសិនបើកសិករពុំអាចលក់វាឲ្យអស់ ក្នុងរយៈពេល២សប្តាហ៍ខាងមុខទេនោះ។ ដើម្បីដោះស្រាយបញ្ហានេះ រដ្ឋាភិបាលបានបង្កើតយុទ្ធនាការដើម្បីជួយគាំទ្រកសិករ។ 
នៅថ្ងៃទី១០ ខែមិថុនា លោក Emmanuel Pinol រដ្ឋមន្ត្រីក្រសួងកសិកម្មហ្វីលីពីន បាននិយាយថា បច្ចុប្បន្ននេះ ផ្លែស្វាយលើសចំនួន ២លានគីឡូក្រាម ក្នុងខេត្ត Luzon ភាគខាងជើងនៃប្រទេសហ្វីលីពីន។ តាមការផ្សាយរបស់ទូរទស្សន៍សិង្ហបុរី Channel News Asia តម្លៃនៃផ្លែស្វាយនេះបានធ្លាក់ចុះមកត្រឹម ០,២០ ដុល្លារក្នុងមួយគីឡូក្រាមក្នុងខេត្ត Luzon និងបណ្តាខេត្តផ្សេងៗទៀត ដូចជា Mindanao ។
ក្នុងគោលដៅជួយប្រជាកសិករលក់ផលិតផលរបស់ពួកគេ ក្រសួងកសិកម្មហ្វីលីពីន បានដាក់ដំណើរកម្មវិធីទីផ្សារមួយ ឈ្មោះថា «Metro Mango» ដែលបង្កើតហាងទំនិញតូចៗនៅជុំវិញទីក្រុងដើម្បីលក់ផ្លែស្វាយទាំងនេះ។ ទាក់ទិននឹងយុទ្ធនាការជួយគាំទ្រកសិករក្នុងស្រុកនេះ លោករដ្ឋមន្ត្រី Pinol បញ្ជាក់ឲ្យដឹងថា ផ្លែស្វាយស្រស់ប្រមាណ ១៥០០០គីឡូក្រាម ត្រូវបានគេទិញខ្ទេចគ្មានសល់ ត្រឹមតែ៣ម៉ោងដំបូងប៉ុណ្ណោះ ក្រោយពីអាជ្ញាធរបានចាប់ផ្តើមកម្មវិធីទីផ្សារនេះ។
ទន្ទឹមនឹងគ្នានេះ ក្រសួងកសិកម្មហ្វីលីពីន ក៏បានបើកវគ្គសិក្សាធ្វើម្ហូបមួយ ដែលបង្រៀនប្រជាជនឲ្យចេះចម្អិនម្ហូបដោយប្រើប្រាស់ផ្លែស្វាយ ហើយក៏ត្រៀមរៀបចំពិធីបុណ្យផ្លែស្វាយ នាពាក់កណ្តាលខែមិថុនានេះផងដែរ ក្នុងគោលដៅបង្កើនការចាប់អារម្មណ៍របស់ប្រជាជនលើផ្លែស្វាយ។ ម្យ៉ាងវិញទៀត ក្រសួងដដែល ក៏កំពុងធ្វើការយ៉ាងញាប់ដៃញាប់ជើងបំផុតដើម្បីជំរុញការនាំចេញផ្លែស្វាយទៅកាន់បរទេស រួមមាន ជប៉ុន រុស្ស៊ី ហុងកុង និងកូរ៉េខាងត្បូងជាដើម។
សូមបញ្ជាក់ថា បញ្ហាទិន្នផលផ្លែស្វាយច្រើនជាងតម្រូវការនេះ កើតឡើងដោយសារបាតុភូតធម្មជាតិ El Niño ដែលបង្កឲ្យមានអាកាសធាតុក្តៅ និងស្ងួតខុសធម្មតា ទើបបានជា អ្នកដាំស្វាយហ្វីលីពីនប្រញាប់ប្រមូលផលស្វាយរបស់ពួកគេលឿនខុសប្រក្រតីបែបនេះ៕
Tag:
ហ្វីលីពីន
កសិកម្ម
ផ្លែស្វាយ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
