លោក ស សុខា រដ្ឋលេខាធិការក្រសួងអប់រំ យុវជននិងកីឡា ជំរុញឲ្យអាជ្ញាកណ្តាលចៅក្រមកាត់ក្តីដោយយុត្តិធម៌ ដើម្បីលើកទឹកចិត្តដល់កីឡាករកីឡាការិនី។ លោក ក៏ស្នើឲ្យគ្រូបង្វឹក និងកីឡាករមានការអធ្យាស្រ័យផងដែរ បើសិនមានរឿងដែលពួកគេយល់ថា មានភាពអយុត្តិធម៌ពាក់ព័ន្ធការឲ្យពិន្ទុ។ ការជំរុញ និងស្នើនេះ ធ្វើឡើងក្នុងពិធីបើកការប្រកួតកីឡាសិស្សថ្នាក់ជាតិលើកទី១ កាលពីថ្ងៃទី១១ ខែមិថុនា ឆ្នាំ២០១៩ នៅវិមានពហុកីឡដ្ឋានជាតិ។
ដោយមើលឃើញពីភាពខ្វះចន្លោះក្នុងការកាត់ក្តី និងដាក់ពិន្ទុរបស់អាជ្ញាកណ្តាលចៅក្រមសម្រាប់ការប្រកួតកន្លងមក លោក ស សុខា រដ្ឋលេខាធិការក្រសួងអប់រំ យុវជននិងកីឡា ជំរុញអាជ្ញាកណ្តាលចៅក្រមដែលចូលរួមកាត់ក្តីក្នុងការប្រកួតកីឡាសិស្សថ្នាក់ជាតិ ត្រូវយកចិត្តទុកដាក់ខ្ពស់លើការកាត់ក្តីនិងដាក់ពិន្ទុ។ ពោលគឺត្រូវកាត់ក្តីនិងដាក់ពិន្ទុដោយយុត្តិធម៌ ហើយចៀសវាងការប្រើមនោសញ្ចេតនាដោយយល់ថា កូនសិស្សអ្នកនេះ ឬអ្នកនោះ។
រូបភាព ពីហ្វេសប៊ុក អគ្គនាយកដ្ឋាន កីឡា
ការជំរុញបែបនេះ គឺដើម្បីលើកទឹកចិត្តដល់កីឡាករកីឡាការិនី ក៏ដូចជាជំរុញឲ្យការប្រកួតកាន់តែមានភាពស្វិតស្វាញ និងទាក់ទាញ។ បើសិនអាជ្ញាកណ្តាលចៅក្រមកាត់ក្តី ឬដាក់ពិន្ទុមិនយុត្តិធម៌ វានឹងជះឥទ្ធិពលមិនល្អដល់វិស័យកីឡាកម្ពុជា តាមរយៈធ្វើឲ្យកីឡាករបាក់ទឹកចិត្តក្នុងការប្រកួត និងចូលរួមលេងកីឡាជាដើម។ លើសពីនេះ វានឹងធ្វើឲ្យវិស័យកីឡាកម្ពុជាទាំងមូលប្រឈមនឹងខ្វះធនធានកីឡាករនាពេលអនាគត។ ព្រោះសាលារៀនជាប្រភពធនធានមនុស្សដ៏សំខាន់សម្រាប់វិស័យកីឡា។
ជាមួយការស្នើឲ្យគណៈកម្មការរៀបចំការប្រកួត និងកីឡាករកីឡាការិនីគោរពច្បាប់និងបទបញ្ជាការប្រកួត រដ្ឋលេខាធិការក្រសួងអប់រំរូបនេះ ក៏ស្នើឲ្យគ្រូបង្វឹក និងកីឡាករកីឡាការិនីមានការអធ្យាស្រ័យ ក្នុងករណីមានភាពមិនត្រឹមត្រូវក្នុងការដាក់ពិន្ទុផងដែរ។ព្រោះលោកយល់ថា ការដាក់កាត់ក្តី ឬដាក់ពិន្ទុដោយប្រើភ្នែកក្នុងការវិនិច្ឆ័យ គឺចៀសមិនផុតពីកំហុសឆ្គងនោះឡើយ។ ប៉ុន្តែក្នុងករណីគ្រូបង្វឹក ឬកីឡាករយល់ឃើញថា អាជ្ញាកណ្តាលចៅក្រមកាត់ក្តីមិនយុត្តិធម៌ គួរចៀងវាងតវ៉ាក្នុងអំឡុងពេលប្រកួត ដែលនាំឲ្យប៉ះពាល់ដល់ដំណើរការប្រកួត។ ដោយពួកគេអាចតវ៉ានៅក្រោយការប្រកួត។
រូបភាព ពីហ្វេសប៊ុក អគ្គនាយកដ្ឋាន កីឡា
គោលបំណងនៃការប្រកួតកីឡាសិស្សថ្នាក់ជាតិ គឺដើម្បីចម្រាញ់រកធនធានមានសមត្ថភាព ក៏ដូចជាពង្រឹងសមត្ថភាពមន្ត្រីអាជ្ញាកណ្តាលចៅក្រមសម្រាប់ត្រៀមការប្រកួតកីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ ក្នុងន័យនេះកីឡាករដែលទទួលបានចំណាត់ថ្នាក់ល្អក្នុងការប្រកួតអាចមានឱកាសក្លាយជាយុវជនថ្នាលជម្រើសជាតិ តាមប្រភេទកីឡាជំនាញរបស់ពួកគេ។
ការបំផុសចលនាកីឡានៅតាមសាលារៀនឲ្យកាន់តែមានភាពផុសផុល ពិសេសទាក់ទាញយុវជនឲ្យចូលរួមលេងកីឡា និងផ្តល់ឱកាសឲ្យពួកគេបានបង្ហាញសមត្ថភាព ក៏ស្ថិតក្នុងគោលបំណងនៃការរៀបចំព្រឹត្តិការណ៍នេះផងដែរ។ ពិសេសការប្រកួតនេះ គឺដើម្បីឆ្លើយតបទៅនឹងការកំណែទម្រង់ស៊ីជម្រៅរបស់ក្រសួងអប់រំ យុវជន និងកីឡា ដែលត្រូវការធនធានមានសមត្ថភាពសម្រាប់ត្រៀមការប្រកួតអន្តរជាតិនានា ពិសេសស៊ីហ្គេមឆ្នាំ២០២៣។ បន្ថែមលើលនេះ គឺកម្ពុជាចង់ដើរឲ្យទាន់សភាពការនៃចលនាកីឡានាពេលបច្ចុប្បន្ន ដែលប្រទេសក្នុងតំបន់កំពុងអនុវត្ត។
ការប្រកួតនេះប្រព្រឹត្តទៅចន្លោះពីថ្ងៃទី១០-១៩ ខែមិថុនា ឆ្នាំ២០១៩ដោយមានកីឡាករកីឡាការិនីជាង៤១០០នាក់ចូលរួម។ ពួកគេទាំងនេះត្រូវប្រកួតប្រជែងលើ១១ប្រភេទកីឡារួមមានអត្តពលកម្ម, ហែលទឹក, បាល់ទាត់, បាល់ទះ, បាល់បោះ, ប៉េតង់, វាយកូនឃ្លីលើតុ, វាយសី, តេក្វាន់ដូ WTF, តេក្វាន់ដូ ITF និងកីឡាការ៉ាតេដូ៕
រូបភាព ពីហ្វេសប៊ុក អគ្គនាយកដ្ឋាន កីឡា