កីឡាអន្តរជាតិ
អន្តរជាតិ
×![]()
ដោយ: ទេព ពិទូរ្យ
ក្រុមកីឡាបាល់ទាត់អាមេរិកផ្នែកនារីបានសាងកំណត់ត្រាថ្មីជាមួយជ័យជម្នះដ៏ច្រើនលើសលុបលើក្រុមថៃ ក្នុងលទ្ធផល ១៣-០ នាការប្រកួតពានរង្វាន់ FIFA Women's World Cup ឆ្នាំ២០១៩ នៅយប់ថ្ងៃទី១២ ខែមិថុនា ដែលរៀបចំឡើងនៅប្រទេសបារាំង។
ម្ចាស់ការពារតំណែងជើងឯកឆ្នាំ ២០១៥ អាចរកគ្រាប់ស៊ុតបញ្ចូលទីបាន៣គ្រាប់នៅវគ្គទី១ និង ១០គ្រាប់នៅតង់ទី២។ កីឡាការិនី Alex Morgan រកបានចំនួន៥គ្រាប់ម្នាក់ឯងក្នុងជ័យជម្នះរបស់អាមេរិកសម្រាប់ការប្រកួតបើកឆាកពូល F នេះ។
នេះជាជ័យជម្នះដោយទទួលបានចំនួនគ្រាប់ច្រើនបំផុតមិនធ្លាប់មានរបស់ក្រុមនារីអាមេរិចនៅក្នុងព្រឹត្តិការណ៍កីឡាបាល់ទាត់ពិភពលោកចាប់តាំងពីពួកគេឈ្នះឆាយនីសតៃប៉ិដោយលទ្ធផល ៧-០ កាលពីឆ្នាំ១៩៩១ ខណៈក្រុមនារីអាល្លឺម៉ង់បានលត់អាហ្សង់ទីន ១១-០ ក្នុងឆ្នាំ២០០៧។
ក្នុងពូល F នេះដែរ ស៊ុតអែតបានយកឈ្នះស៊ីលី ២-០ សម្រាប់ជំនួបដំបូងនេះ។ ដោយសារមានគ្រាប់បាល់ស៊ុតបញ្ចូលទីច្រើនជាង អាមេរិកឈរនៅកំពូលតារាងមាន៣ពិន្ទុ ខណៈស៊ុតអ៊ែតនៅលំដាប់ទី២ ស៊ីលីលេខ៣ និងថៃនៅបាតតារាង។
ព្រឹត្តិការណ៍ World Cup នារីឆ្នាំ២០១៩ នៅប្រទេសបារាំងដែលចាប់ផ្តើមដំណើរការតាំងពីថ្ងៃទី៧ ខែមិថុនា បានប្រកួតក្នុងជំនួបបើកឆាកតាមពូលពី A ដល់ F រួចរាល់អស់ហើយ និងត្រៀមប្រកួតលើកទី២ នៅយប់ថ្ងៃទី១២ ខែមិថុនានេះ។
ម្ចាស់ផ្ទះបារាំងក៏កំពុងឈរកំពូលតារាងពូល A ផងដែរបន្ទាប់ពីឈ្នះកូរ៉េខាងត្បូង ៤-០ នៅជំនួបបើកឆាក។ ន័រវែសដែលឈ្នះនីហ្សេរីយ៉ា ៣-០ ឈរនៅលេខរៀងទី២បណ្តោះអាសន្ន៕
Tag:
បាល់ទាត់
World Cup Women
© រក្សាសិទ្ធិដោយ thmeythmey.com
