អន្តរជាតិ
លោក ត្រាំ ថា អាចទទួលព័ត៌មានពីបរទេសទាក់ទងគូប្រជែងក្នុងការបោះឆ្នោតឆ្នាំ២០២០
រូបភាព AFP
×![]()
ដោយ: តន ចាន់រិទ្ធារ៉ា
ប្រធានាធិបតីអាមេរិក ដូណាល់ ត្រាំ នៅថ្ងៃទី១២ ខែមិថុនា និយាយថា លោកអាចទទួលយកព័ត៌មានទាក់ទងគូប្រជែងក្នុងការបោះឆ្នោតឆ្នាំ២០២០ ពីប្រទេសផ្សេង ប្រសិនបើមាន។ លោក ត្រាំ ថា ការទទួលព័ត៌មានមិនល្អរបស់គូភាគីម្ខាងទៀតនេះ មិនដល់ថ្នាក់ក្លាយទៅជាការជ្រៀតជ្រែកការបោះឆ្នោតអ្វីឡើយ។ លោក ត្រាំ និយាយបែបនេះ ស្របពេលដែលសំណុំរឿងរុស្ស៊ីលូកលាន់ការបោះឆ្នោតឆ្នាំ២០១៦ ហើយជួយលោកឲ្យក្លាយជាប្រធានាធិបតី មិនទាន់ចប់ផងនោះ។ 
លោក ដូណាល់ ត្រាំ ហាក់មិនញឹននឹងការស៊ើបអង្កេតករណីរុស្ស៊ីជ្រៀតជ្រែកការបោះឆ្នោតអាមេរិកសោះ។ ក្នុងកិច្ចសម្ភាសជាមួយប្រព័ន្ធផ្សព្វផ្សាយអាមេរិក ABC News លោកប្រធានាធិបតី ត្រាំ បង្ហាញជំហរទទួលយកព័ត៌មានទាំងឡាយរបស់គូបដិបក្ខសម្រាប់ការបោះឆ្នោតឆ្នាំ២០២០ ប្រសិនបើមានប្រទេសណាឲ្យលោក។
«ខ្ញុំគិតថា អ្នកចង់ស្ដាប់។ វាមិនទាស់ខុសឡើយបើគ្រាន់តែស្ដាប់នោះ។» នេះជាចម្លើយរបស់លោក ត្រាំ ទៅនឹងសំណួរថា លោកនឹងធ្វើបែបណា បើប្រទេសណាខ្លះដូចជារុស្ស៊ី ឬចិនប្រគល់ព័ត៌មានពីគូប្រជែងឲ្យលោក។ បើតាមទីភ្នាក់ងារព័ត៌មាន AFP លោក ត្រាំ និយាយការពារខ្លួនថា ការធ្វើបែបនោះ មិនអាចក្លាយទៅជាការកកូរកកាយកិច្ចការបោះឆ្នោតអាមេរិក ដ្បិតប្រទេសទាំងនោះមានព័ត៌មាន ហើយលោកអាចទទួលបានផងដែរ។
ទោះជាយ៉ាងណា លោក ត្រាំ មិនមែនទទួលយករាល់ព័ត៌មានទាំងអស់ឡើយ។ លោក ប្រាប់ ABC News ថា ប្រសិនបើលោកគិតថា មានបញ្ហាអ្វីនោះ លោកអាចទៅរកការិយាល័យស៊ើបអង្កេតសហព័ន្ធ (FBI) ឲ្យជួយរកវាយតម្លៃ។
បើសិនសម្ដីក្លាយជាការពិត រឿងរ៉ាវស្មុគស្មាញនឹងចោមរោមលោក ត្រាំ ទៀតមិនខាន។ ទំនាក់ទំនងរវាងក្រុមយុទ្ធនាការរបសលោកជាមួយភ្នាក់ងាររុស្ស៊ីក្នុងឆ្នាំ២០១៦ នាំឲ្យមានការស៊ើបអង្កេតរបស់ FBI លើទំនាក់ទំនងនេះ។ បញ្ហានេះ ប្រៀបបានស្រមោលអន្ទោលតាមប្រាណក្នុងរយៈពេលពីរឆ្នាំនៃអាណត្តិប្រធានាធិបតីរបស់លោក ត្រាំ ។ តាមរយៈសម្ដីខាងលើនេះ មេដឹកនាំអាមេរិករូបនេះទំនងបានន័យថា ការទទួលជំនួយពីបរទេស មិនមែនជារឿងខុសឆ្គងអ្វីទេ។
ភ្លាមក្រោយការលើកឡើងរបស់លោក ត្រាំ ការទាមទារឲ្យមានការដកតំណែងប្រធានាធិបតី ក៏លាន់សូរម្ដងទៀត។ បេក្ខជនប្រធានាធិបតីមកពីប្រជាធិបតេយ្យ Elizabeth Warren ដែលមិនត្រូវគ្នាជាមួយលោក ត្រាំ តាំងពីដើមមក បានទាមទារជាថ្មីឲ្យចាប់ផ្ដើមនីតិវិធីដកតំណែងនេះ។ លោកស្រីសរសេរលើ Twitter ថា របាយការណ៍រដ្ឋអាជ្ញាពិសេស Robert Mueller បង្ហាញច្បាស់ពីការជ្រៀតជ្រែករបស់បរទេសចូលការបោះឆ្នោតអាមេរិក ហើយជួយលោក ត្រាំ ឲ្យឈ្នះលោកស្រី ហ៊ីឡារី គ្លីនតុន ៕
Tag:
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com
