អន្តរជាតិ
លោក រ៉ូឌ្រីហ្កោ ឌូទើតេ ប្រធានាធិបតីហ្វីលីពីន (ប្រភពរូប៖ AFP)
×![]()
៣ឆ្នាំក្រោយចូលកាន់តំណែងជាប្រធានាធិបតីហ្វីលីពីន លោក រ៉ូឌ្រីហ្កោ ឌូទើតេ នៅថ្ងៃទី១២ មិថុនា បានសារភាពថា លោកសោកស្តាយជាខ្លាំងចំពោះការសម្រេចចិត្តរបស់លោកក្នុងការចូលប្រកួតប្រជែងសម្រាប់តំណែងកំពូលនេះ ។ លើសពីនេះ មេដឹកនាំរូបនេះ ក៏បានព្រមានកូនស្រីរបស់លោក គឺលោកស្រី Sara Duterte-Carpio ដែលជាអភិបាលក្រុង Davao ពីការចូលរួមក្នុងការប្រណាំងប្រជែងយកតំណែងប្រធានាធិបតីថែមទៀតផង។
ថ្លែងនៅមុខមន្ត្រីរដ្ឋាភិបាលជាច្រើន ក្នុងកម្មវិធីមួយនាទីក្រុង Cagayan De Oro នៃប្រទេសហ្វីលីពីន លោក រ៉ូឌ្រីហ្គោ ឌូទើតេ លើកឡើងថា លោកបាត់បង់ចំណាប់អារម្មណ៍លើការងាររបស់លោក ហើយលោកក៏បានប្រាប់កូនស្រីរបស់លោកកុំឲ្យចូលប្រជែងសម្រាប់តំណែងប្រធានាធិបតីនេះ។ ត្រង់ចំណុចនេះ មេដឹកនាំរូបនេះ ព្រមានថា រូបនាង នឹងមិនទទួលការគោរពពីក្រុមអ្នករិះគន់។
«ខ្ញុំបាត់បង់កម្លាំងចិត្តក្នុងការធ្វើការ។ ខ្ញុំពិតជាស្តាយក្រោយខ្លាំងបំផុត។ ខ្ញុំ សោកស្តាយចំពោះការសម្រេចចិត្តរបស់ខ្ញុំ ក្នុងការចូលប្រកួតប្រជែងសម្រាប់តំណែងប្រធានាធិបតី»។ នេះជាការបញ្ជាក់របស់លោក ឌូទើតេ ដោយបន្ថែមថា នេះគឺជាហេតុផលដែលមនុស្សជាច្រើនស្ទាក់ស្ទើរនឹងចូលប្រជែងសម្រាប់តំណែងកំពូលនេះ។
តាមការចុះផ្សាយរបស់សារព័ត៌មាន Philippine Star លោកប្រធានាធិបតីវ័យ ៧៤ឆ្នាំរូបនេះ លើកឡើងថា អំពើពុករលួយជាប្រព័ន្ធក្នុងក្របខណ្ឌរដ្ឋាភិបាល ធ្វើឲ្យលោកមិនសប្បាយចិត្ត។
ការលើកឡើងរបស់លោក ឌូទើតេ បែបនេះ ធ្វើឡើងក្រោយពី លោក បានបណ្តេញសមាជិកជាន់ខ្ពស់ទាំងអស់នៃអង្គការក្រៅរដ្ឋាភិបាលមួយឈ្មោះថា Nayong Pilipino Foundation ដែលពាក់ព័ន្ធនឹងរឿងអាស្រូវពុករលួយ កាលពីសីហា ឆ្នាំ២០១៨។ កាលនោះ អាជ្ញាធរហ្វីលីពីន បានរកឃើញថា អង្គការដែលសហការជាមួយរដ្ឋាភិបាលហ្វីលីពីននេះ បានបង្កើតកិច្ចព្រមព្រៀងមិនប្រក្រតីមួយជាមួយ ក្រុមហ៊ុនល្បែងស៊ីសងមួយឈ្មោះថា Landing Resorts Philippines Development Corporation ដែលបណ្តាលឲ្យរដ្ឋាភិបាលហ្វីលីពីនខាតបង់ប្រាក់អស់ប្រមាណជាង ៤៨១លានដុល្លារ៕
Tag:
ហ្វីលីពីន
ឌូទើតេ
© រក្សាសិទ្ធិដោយ thmeythmey.com
