អន្តរជាតិ
លោក ពូទីន ដកប៉ូលិសជាន់ខ្ពស់២នាក់ ក្រោយប្រឌិតភស្តុតាងចាប់ខ្លួនអ្នកកាសែតម្នាក់ ប្រធានាធិបតីរុស្ស៊ី វ្ល៉ាឌីមៀ ពូទីន (ប្រភពរូប៖ AFP)
× ប្រធានាធិបតីរុស្ស៊ី លោក វ្ល៉ាឌីមៀ ពូទីន បានសម្រេចដកហូតតំណែងមន្ត្រីប៉ូលិសជាន់ខ្ពស់ប្រចាំរដ្ឋធានីមូស្គូ ២នាក់ ។ ការចេញបញ្ជារបស់ប្រមុខដឹកនាំរុស្ស៊ីរូបនេះ ធ្វើឡើងប៉ុន្មានថ្ងៃប៉ុណ្ណោះ ក្រោយពីមានការចាប់ខ្លួនអ្នកកាសែតស៊ើបអង្កេតរុស្ស៊ីម្នាក់ ដោយប្រឌិតបទចោទប្រកាន់ពាក់ព័ន្ធនឹងសំណុំរឿងគ្រឿងញៀន។
ហេតុការណ៍ដ៏ចម្រូងចម្រាស់នេះ បានកើតឡើងកាលពីសប្តាហ៍មុនមកម្ល៉េះ ដោយការចាប់ខ្លួនលើលោក Ivan Golunov ដែលអ្នកកាសែតស៊ើបអង្កេត ត្រូវបានគេមើលឃើញថា គឺជាការដាក់ទោសលើការងារស៊ើបអង្កេតរបស់លោក ។ ការឃាត់ខ្លួននេះ ក៏បានបង្កការតវ៉ាយ៉ាងច្រើនក្នុងសង្គមរុស្ស៊ីពាក់ព័ន្ធនឹងសុក្រឹតភាពនៃប្រតិបត្តិការរបស់ប៉ូលិស។
តាមរយៈសំណើរបស់រដ្ឋមន្ត្រីមហាផ្ទៃរុស្ស៊ី នៅថ្ងៃទី ១៣ មិថុនា លោក វ្ល៉ាឌីមៀ ពូទីន បានសម្រេចចុះហត្ថលេខាលើអនុក្រឹតដើម្បីដកហូតតំណែងរបស់ស្នងការប៉ូលិសក្រុងម៉ូស្កូខាងលិច លោក Andrei Puchkov និងប្រធាននាយកដ្ឋានគ្រប់គ្រងគ្រឿងញៀននៃស្នងការប៉ូលិសក្រុងម៉ូស្កូ លោក Yury Devyatkin ។
ការបញ្ជាដកហូតនេះ ធ្វើឡើងបន្ទាប់ពី លោករដ្ឋមន្ត្រីមហាផ្ទៃរុស្ស៊ី Vladimir Kolokoltsev កាលពីថ្ងៃអង្គារទី ១១ ខែមិថុនាកន្លងទៅ បាននិយាយថា លោក បានដាក់សំណើទៅកាន់លោកប្រធានាធីបតី ពូទីន ដើម្បីដកតំណែងមន្ត្រីប៉ូលិសទាំងពីរនេះ ក្រោយពីលុបចោលបទចោទប្រឆាំងនឹងអ្នកកាសែត លោក Golunov ។ ត្រង់ចំណុចនេះ លោក អះអាងថា ការឃាត់ខ្លួនអ្នកកាសែតស៊ើបអង្កេតរុស្ស៊ីរូបនេះ បានធ្វើឡើងដោយខ្វះភស្តុតាង។
លោក Golunov គឺជាអ្នកយកព័ត៌មានម្នាក់ឲ្យវេបសាយព័ត៌មានមួយឈ្មោះថា Meduza ដែលមានមូលដ្ឋានក្នុងប្រទេសឡេតូនីក្នុងតំបន់អឺរ៉ុប។ លោក ត្រូវបានគេដោះលែងឲ្យមានសេរីភាពឡើងវិញ កាលពីថ្ងៃទី១១ មិថុនា បន្ទាប់ពីការឃាត់ខ្លួនជាបណ្តោះអាសន្នរបស់លោក។
ប៉ូលិសក្រុងមូស្កូ បានចោទប្រកាន់លោកដោយថាលោកប៉ុនប៉ង់ចែកចាយគ្រឿងញៀន។ ពួកគេ អះអាងថា មន្ត្រីប៉ូលិស បានរកឃើញថ្នាំញៀនក្នុងខ្លួនលោក។ យ៉ាងណាមិញ ខណៈមហាជន ចាប់ផ្តើមចាប់អារម្មណ៍កាន់តែខ្លាំងលើសំណុំរឿងនេះ ចុងក្រោយប៉ូលិសក្រុងមូស្កូ បានសារភាពថា ពួកគេបានប្រឌិតភស្តុតាងនោះឡើង ដើម្បីមួលបង្កាច់អ្នកកាសែតរូបនោះ៕
Tag:
រុស្ស៊ី
វ្លាឌីមៀ ពូទីន
© រក្សាសិទ្ធិដោយ thmeythmey.com