អន្តរជាតិ
លោក ប្រាវីត អាចគ្មានមុខក្នុងគណៈរដ្ឋមន្ត្រីថៃថ្មី ព្រោះចង់សម្រាកថែទាំសុខភាព ឧបនាយករដ្ឋមន្ត្រីថៃ លោក ប្រាវីត វង់ស៊ូវ៉ុន (កណ្តាល) ប្រភពរូប៖ AFP
× ឧបនាយករដ្ឋមន្ត្រីថៃ លោក ប្រាវីត វង្សសុវណ្ណ (Prawit Wongsuwon) បានបង្ហើបថា លោកប្រហែលជាពុំចូលរួមក្នុងគណៈរដ្ឋមន្ត្រីថ្មីឡើយ។ យោងតាមប្រភពមួយដែលស្និទ្ធនឹងលោកប្រាវីត ជំនួសឲ្យតំណែងនេះ លោក នឹងក្លាយជាទីប្រឹក្សាឲ្យនាយករដ្ឋមន្ត្រីថៃ លោក ប្រាយុទ្ធ ចន្ទអូចា ។ ទាក់ទិននឹងដំណឹងពុំទាន់ច្បាស់ការនេះ ប្រភពដដែល ទម្លាយទៀតថា ឧបនាយករដ្ឋមន្ត្រីថៃវ័យ៧៣ឆ្នាំរូបនេះ ចង់សម្រាកពីកិច្ចការនយោបាយ និងទុកពេលមើលថែសុខភាពលោក។
កាលពីដើមសប្តាហ៍ សារព័ត៌មានថៃ បានចុះផ្សាយថា លោកឧត្តមសេនីយ៍ ប្រាវីត នឹងរក្សាតំណែងជាឧបនាយករដ្ឋមន្ត្រីថៃទទួលបន្ទុកកិច្ចការសន្តិសុខក្នុងរដ្ឋាភិបាលថ្មី ខណៈលោកឧត្តមសេនីយ៍ ប្រាយុទ្ធ ចន្ទអូចា នឹងកាន់តំណែងថែមមួយទៀតជារដ្ឋមន្ត្រីការពារជាតិថៃ ។ អ្វីដែលគួរឲ្យចាប់អារម្មណ៍នោះ តំណែងរដ្ឋមន្រ្តីការពារជាតិបច្ចុប្បន្ន ជារបស់លោកប្រាវីត។
តាមការចុះផ្សាយរបស់កាសែត បាងកកប៉ុស្តិ៍ អ្នកនាំពាក្យក្រសួងការពារជាតិថៃ លោក Kongcheep Tantravanich បានលើកឡើងថា លោក ប្រាវីត នឹងប្រកាសពីជំហររបស់លោកពាក់ព័ន្ធនឹងតួនាទីដែលលោកនឹងចូលកាន់ក្នុងរដ្ឋាភិបាលថ្មី។
យ៉ាងណាមិញ លោក ប្រាវីត បានប្រាប់សារព័ត៌មានកាលពីថ្មីៗនេះថា បច្ចុប្បន្ននេះ សុខភាពលោក ពុំសូវល្អប្រសើរ ហើយជើងរបស់លោក ចេះតែញ័រមិនឈប់។ ទាក់ទិននឹងសំដីនេះ លោក Kongcheep បកស្រាយថា លោកមិនអាចនិយាយអ្វីចេញពីគំនិតរបស់លោក ប្រាវីត បានឡើយ។ ប៉ុន្តែ តាមរយៈកាយវិការរបស់លោក និងការផ្តល់បទសម្ភាសនាពេលប៉ុន្មានថ្ងៃចុងក្រោយនេះ លោកប្រាវីត ប្រហែលជាផ្ញើសារដកថយមួយ។
លោក ប្រាវីត ដែលមានអាយុ ៧៣ឆ្នាំ មានបំណងសម្រាកពីកិច្ចការប្រទេសជាតិ និងផ្តោតសំខាន់លើការថែទាំរាងកាយ ក្រោយសុខភាពលោកចាប់ផ្តើមទន់ខ្សោយ។ នេះបើតាមការបញ្ជាក់ពីប្រភពដែលស្និទ្ធនឹងលោកឧត្តមសេនីយ៍ ប្រាវីត ដោយបន្ថែមថា ធ្វើការអស់រយៈ៥ឆ្នាំក្នុងរដ្ឋាភិបាល និងក្រុមប្រឹក្សាជាតិសម្រាប់សន្តិភាព និងសណ្តាប់ធ្នាប់ (NCPO) ធ្វើឲ្យលោកនឿយហត់ជាខ្លាំង។
ទោះជាបែបនេះក្តី «លោក នៅតែព្រួយបារម្ភពីប្អូនប្រុសបស់លោក គឺឧត្តមសេនីយ៍ ប្រាយុទ្ធ ។ ប៉ុន្តែ លោក នឹងធ្វើការនៅពីក្រោយឆាកជាទីប្រឹក្សា»។ ម្យ៉ាងវិញទៀត លោក ប្រាវីត លែងចង់ក្លាយជាគោលដៅរិះគន់ ដែលលោកកំពុងប្រឈមមុខ ជាពិសេសពាក់ព័ន្ធនឹង រឿងអាស្រូវនាឡិកាសេរ៊ីទំនើប។ ប្រភពដដែល លើកឡើងបែបនេះ។
តាមកាសែតបាងកកប៉ុស្តិ៍ អ្នកឃ្លាំមើលនយោបាយថៃ ជឿជាក់ថា លោកឧត្តមសេនីយ៍ នឹងបន្តធ្វើការនៅពីក្រោយឆាកនយោបាយថៃ ក៏ដូចជារក្សាឥទ្ធិពលយ៉ាងខ្លាំងលើក្រុមយោធា និងប៉ូលីស ដើម្បីជួយជ្រោមជ្រែងរដ្ឋាភិបាលថ្មី ដែលកើតចេញពីការបោះឆ្នោត៕
Tag:
ថៃ
ប្រាវីត វង់ស៊ូវ៉ុន
គណៈរដ្ឋមន្ត្រី
© រក្សាសិទ្ធិដោយ thmeythmey.com